1 Ɓaah ciŋ ɓoo, ɗu ŋ haf ɗu, ɗu inhiɗ ne hayi ɓoo hayee nga ɗu nikeeɗi ɓarang ɓarang. 2 Ɗu namiɗ inah ne bala ineem, ɓoo torhiɗuuɗ, ɓasuusa ngaŋ kur-taahaŋ Filippi. Waaye Kooh tufkohiɗ ɓoo po ɓoo minnda ɗu woo Yegɗohiŋ ɗe ŋ ini kaɗ ŋ Muci, ngaŋ hiñoh miskiɗ. 3 Ŋ ineem, ɓeeɗkohi ɓoo na ɓeeɗke ɓooɓi jen degukɗi ŋ ini raakɗi wala ŋ liiɓohaaɗ moɗaaɗi, te ɓoo waakɗi ñaañoh ali ɓo' nga. 4 Kooh hotiɗ ne ɓoo cariɗ oolku, a dengkohha ɓoo Yegɗohiŋ Muci, weɗ tah ɓoo waakɗi ini neɓ ɓooɓi, waaye ini neɓ Kooh yi na markiske keeñ ciŋ ɓoo.

5 Ɗu inhiɗa baahiɗ, ɓoo moosɗi jayoh ɓo' ne raak in nga ɗe ; te ɓoo moosɗi leyoh ɓo' sagu waaɗ raak, Kooh seede'iɗ ineem. 6 Ɓoo waakɗi ne ɓo' ɗaap ɓoo, wa nga ɗu haa, wa ŋ ɓinooɓi haa ; 7 te kat, ɓoo mineen ɗu teeɓ ne ɓoo kilifaaciŋ ɗu ŋ niki ɓoo nik Apootar ciŋ Kiristaani. Waaye ɓoo tumɗaa, ɓoo soos soos nga ɗu findi yaayi ɓop kuɓuuciŋ ɗe. 8 Waaɗi ɓoo waaɗ ɗu topeeɗi ŋ woo ɗu Yegɗohiŋ Muci dong, waaye, ɓoo teyɗukeen ɓaah na ɗu kipes kiŋ ɓoo[a]. Ɓoo keeñkoheen ɗu lool !

9 Ɓaah ciŋ ɓoo, ɗu naandsukiɗ panguk ciŋ ɓoo miskiɗ ci na yaaɓi ɓoo yaaɓ. Ɓoo pangkee noh na wek ne ɓoo deguu ali ɓo' nga ɗu in, ɓoo woo ɗu Yegɗohiŋ Kooh ŋ ini kaɗ ŋ Muci. 10 Ɗu seedeeciŋ ɓoo, Kooh namiɗa nik : Ɗu ɓi kosiɗ ci, findi ɓoo mandee nga ɗu, wa hooliɗ, wa yurhiɗ te wa raakɗi sikka. 11 Ɗu namiɗ inah ne ɓoo tumohee na yaa nu nga ɗu findi baabu na tumohe na kuɓuuciŋ ɗe. 12 Ɓoo ñaahiɗ ɗu, ɓoo giifɗiɗ ɗu, ɓoo woyiɗ na ɗu keeh-keeh ne ɗu pes findi ɓoyi nik na Kooh na pesohe, Kooh yi ɓeeɗuk ɗu ne ɗu ɓaah ŋ yaki Nguuriŋ ɗe yak.

13 Ɓoo gen ŋ corkiɗ Kooh sagu inii : Wa ɗu rahas woo kiŋ Kooh ɓoo woo ɗu, ɗu teyɗukɗi wa findi woo ɓo', waaye ɗu teyɗuka findi woo kiŋ Kooh, te weɗ wa nik keeh-keeh. Ŋ ineem, weɗi ɓay ɓoƴsoh nga ɗu, ɗu ɓi kosiɗ ci.

14 Ɓaah ciŋ ɓoo, ɗu taamb ŋ ɗiski Janguuciŋ Yudee taamb, Janguuci ɓaah ŋ Kooh te ca kossa Kiristaani Yeesu. Laam, ɓi gen na ɗu namiɗ ɗu torhiɗ torhiɗ miskiɗ, findi Yawuut ci torhiɗohee Janguucaam. 15 Ɓeɗ ap Yeesu Heɗi, ɓeɗ namee ap woosuuɗ ci, te ɓeɗ tolfiɗee ɓoo. Ɓa neɓɗi Kooh te ɓa sangiɗ ciŋ ɓooɓiŋ Adina jen. 16 Ɓa sangiɗ ciŋ ɓooɓi ŋ ini ɓa na jeeme hondoh ɓoo woo Yegɗohiŋ Muci ɓooɓi nikɗi Yawuut ne ɓa mucɗu. Ŋ ineem, ɓa na mitɗe bakaaɗ ci ɓa tum ŋ jamanooci jen. Waaye ayrukiŋ Kooh mirndohiɗ keen ŋ ɗafuk ɓa.

17 Ini kaɗ nga ɓoo, ɓaah ci, ɓoo saɓsohuuɗ na ɗu ɓi jamano ɓoo hotohisɗi, waaye ɗu ɓii ŋ keeñ ciŋ ɓoo. Ɓoo waaɗiɗ ɗu hotis lool te ɓoo tumiɗ in nu in ne wa nik. 18 Ɓoo waaɗeen hayis ɗiskiŋ ɗu, te mi ŋ haf fo, ŋ jeemiɗ ɗu hay marke waas laayiɗ. Waaye Seytaani hondohha ɓoo tuma. 19 Mbehi Heɗ ɓoo Yeesu hayissan, ya ɓa nikan yaakaariŋ ɓoo, wala sumiŋ ɓoo, wala raayaaniŋ ɓoo po ɓoo min neɓu ŋ fikiice ? Ali wa mand na, ɗu ɓaah nga ! 20 Ee, e ɗu ndamiŋ ɓoo na sumiŋ ɓoo !

<- 1 Tessalonik 11 Tessalonik 3 ->