— Дэ манди бэятонэн, а то мэ мэрава!

2 О Яково холяйля пэр латэ и пхэндя:

— Мэ со, сым о Дэл, Саво на дэл тути бэятонэн?

3 Тунче вой пхэндя:

— Акэ э Вала, мэрни копэльница. Сов ласа, соб вой тэ анэл бэятос мандэ пэ чянга, тай кадя и мандэ авэна бэяцэ пар латэ.

4 Кадя вой дя лэсти пэстеря бутярня ла Вала, сар ромня, о Яково сутя ласа. 5 Вой ашыля пхари тай андя лэсти шавэс. 6 Тунче э Рахиль пхэндя: «О Дэл сыкадя мэрно чячимос, Вов ашундя мэрно мангимос тай дя манди шавэс». Пала кода вой дя лэсти алав Дано[a].

7 Э Вала, э бутярни ла Рахиляти, упалэ ашыля пхари тай андя лэ Яковости дуйтонэ шавэс. 8 Тунче э Рахиль пхэндя: «Барэ маримаса мэ мараваспэ мэрня пхьяса тай биросардэм». И вой дя лэсти алав Нефалимо[b].

9 Кала э Лия дикхля, кай вой парашыля тэ анэл бэятонэн, вой ля пэстеря бутярня ла Зелфа тай дя ла лэ Яковости сар ромня. 10 Ла Лиятери бутярни э Зелфа андя лэ Яковости шавэс. 11 Э Лия пхэндя: «Сави бахт!» Тай дя лэсти алав Гадо[c].

12 Лэ Лиятери бутярни э Зелфа андя лэ Яковости дуйтонэ шавэс. 13 Э Лия пхэндя: «Сави мэ сым бахтали! Э жувля пхэнэна пэр мандэ сави бахтали!» Тай дя лэсти алав Асиро[d].

14 Андэ кодыя время, кала э мануша стидэн э пшэница, о Рувимо жыля андэ мал, аракхля мандрагоруря[e] тай андя лэн пэстеря дати. Э Рахиль пхэндя ла Лияти:

— Мангав тут, дэ манди найбут терэ шавэсти мандрагоруря.

15 Ай кадыя пхэндя лати:

— Ту залян мандар лэ ромэс, ай акана камэс тэ залэс мэрнэ шавэстерэ мандрагоруря?

— Драго, — пхэндя э Рахиль, — мэк вов совэл туса кадыя рят, ай ту отдэса манди терэ шавэстерэ мандрагоруря.

16 Кала каринг э рят о Яково авилятар лэ маляндар, э Лия вижыля англа лэстэ и пхэндя:

— Ту трэбуй тэ совэс манца. Мэ потиндэм важ тутэ лэ шавэстерэ мандрагоронэнца.

И вов сутя ласа андэ кодыя рят. 17 О Дэл ашундя ла Лия, вой ашыля пхари тай андя лэ Яковости панчтонэ шавэс. 18 Тунче э Лия пхэндя: «О Дэл дя манди награда пала кода, со мэ дэм лэ ромэсти мэрня бутярня». Тай дэл лэсти алав Исахаро[f].

19 Э Лия упалэ ашыля пхари тай андя лэ Яковости шовтонэ шавэс. 20 Вой пхэндя: «О Дэл дя манди кучютно подарко. Акана мэрно ром дэла манди патив, пала кода со мэ андэм лэсти шовэн шавэн». И Лия дя лэсти алав Завулоно[g].

21 Пай варисави-то время вой андя щеёра и дя лати алав Дина.

22 О Дэл сэрэсардя пала э Рахиль, ашундя лако мангимос тай терэл кадя, соп вой тэ анэл бэятонэн. 23 Вой ашыля пхари тай андя лэ шавэс и пхэндя: «О Дэл изля пар мандэ мэрно лажавимос». 24 Вой дя лэсти алав Иосифо[h], пала кода со вой пхэндя: «Тэ дэл манди о РАЙ инке екхэ шавэс».

25 Пала кода сар э Рахиль андя лэ Иосифос, о Яково пхэндя лэ Лаваности:

— Отмэк ман, соп мэ тэ рисайвав пэ пхув, кай аракхадилэмас. 26 Дэ манди мэрнэ ромнян тай лэ бэятонэн, пала савэ мэ теравас бути тути, тай мэ жаватар андо дром. Ту ганэс, сар бут мэ теравас бути тути.

27 Ай о Лавано пхэндя лэсти:

— Сар кай мэ аракхлэм лашымос англа терэ якха, мангав тут, ашпэ: мэ уганглэм пай врэжа, со о РАЙ бахталисардя ман пала тутэ. 28 Пхэн тери цымин, мэ потинава ла.

29 О Яково пхэндя лэсти:

— Ту ганэс, сар мэ теравас бути тути тай савэ терэ гуртуря ашылэ, сар мэ лэн праваравас. 30 Жы мандэ лэн на сас бут, ай акана вонэ тердэпэ пэ бутэстэ майбут, тай о РАЙ бахталисардя тут пала мандэ. Кала жэ акана мэ стидава варисо важ мэрно чер?

31 О Лавано пушля:

— Со тути тэ дав?

— Манди нисо на трэбуй, — пхэндя о Яково. — Стер важ мандэ кати екх, тай мэ лава и майдур тэ праварав тай тэ фирисарав теро цыкно тай баро ското. 32 Мэк ман тэ обжав саворэ гуртуря тай тэ стхав ригатар саворэ пятнисти и э крапчяти бакрэн и бузнэн тай саворэ калэ бакрорэн. Вонэ авэна мэрно потинимос. 33 О чячимос мэрно дичёлапэ ангэ, кала закамэса ту тэ дикхэс о потинимос, саво дян манди. Тай сар кай ту аракхэса мандэ най крапчято тай най пятнисто бузно тай кало бакроро, вонэ лэна тэ ангиченпэ чёрданэ.

34 — Допхэндямпэ, — пхэндя о Лавано. — Мэк авэла кадя, сар ту пхэндян.

35 Тай андэ кодыва жэ дес вов отходя ригатар саворэ бузнэн лэ крапинэнца тай лэ латкэнца, саворэ пятнисти тай крапчяти бузнян — колэ, пэ савэ сас парнимос, — тай саворэн калэ бакрорэн тай отдя лэн тэ дикхэн лэсти шавэ. 36 Вов тердя тэ авэл машкара пэстэ и Яково тринэ десэнго дром, ай о Яково кадя ж праварэлас лэ Лаваностерэ бакрэн, савэ ашылэпэ.

37 О Яково вишындя зэлэни рувля па тополи, миндалё тай пай чинаря, зля э шкорка и стердя пэр лэндэ парнэ тхана. 38 Вов стходя э опшындэ рувля андэ саворэ балая, соп вонэ тэ авэн ворта англа ското, кала о ското авэл тэ пэл паи. Андэ кодыя время, кала э бакря ашэн пхарэ, сар авэнас тэ пэн паи, 39 вонэ терэнас кода англа рувля, тай э бакрорэ аркхадёнаспэ лэндэ пёстри, крапчяти тай пятнисти. 40 Инке о Яково бандярэлас лэ бакрэн каринг э пёстри тай каринг э калэ ското, саво сас лэ Лаваноско, ай лэ тэрнэн стхолас ригатар. Кадя лэстэ ашылэ пэсти гуртуря, тай вов ритярэлас лэн ригатар лэ Лаваностерэ бакрэндар. 41 Кала авэнас тэ пэн зоралэ бакря тай бузня, о Яково шолас англа лэндэ андэ балая э рувля, кай вонэ тэ терэн бакрорэн англа э рувля. 42 Ай кала авэнас э бакря найзоралэ, вов на шолас э рувля. Кадя ковло ското доросэласпэ лэ Лаваности, ай зорало лэ Яковости. 43 Кадя о Яково ашыля барвало, лэстэ сас акана бут цыкно тай баро ското, бутярнэ тай бутярня, вэрблюдоря тай ослуря.

<- Англунимос 29Англунимос 31 ->