1 ⴰⵡⴰⵔⵏⵉ ⵍⴰⵎⵉ ⵉⴽⴻⵎⵎⴻⵍ ⵢⴰⵙⵓⵄ ⵍⵓⵎⵓⵔ ⵏⵏⴻⵙ ⵉ ⵜⴻⵏⵄⴰⵛ ⵏ ⵉⵎⴻⵃⴹⴰⵔⴻⵏ ⵏⵏⴻⵙ, ⵢⵓⵢⵓⵔ ⵙⵙⴻⵏⵏⵉ ⵃⵉⵎⴰ ⴰⴷ ⵉⵙⵙⴻⵍⵎⴻⴷ ⵓ ⴰⴷ ⵉⴱⴰⵔⵔⴻⵃ ⴷⵉ ⵜⵏⴻⴷⴷⴰⵎ ⵏⵙⴻⵏ. [a]

2 ⵍⴰⵎⵉ ⵜⵓⵖⴰ ⵢⵓⵃⴰⵏⵏⴰ ⵉⵜⵜⴻⵙⵍⴰ ⴷⵉ ⵍⴻⵃⴱⴻⵙ ⵅ ⵍⴻⵅⴷⴰⵢⴻⵎ ⵏ ⵍⵎⴰⵙⵉⵃ, ⵉⵙⵙⴻⴽⴽ ⵛⴰ ⵣⴻⴳ ⵉⵎⴻⵃⴹⴰⵔⴻⵏ ⵏⵏⴻⵙ. [b] 3 ⵉⵏⵏⴰ ⴰⵙ: “ⵎⴰ ⴷ ⵛⴻⴽ ⴷ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ ⵏⵉⵖ ⵉⵜⵜⵅⴻⵚⵚⴰ ⴰⴷ ⵏⵔⴰⵊⴰ ⵉⵊⵊⴻⵏ ⵏⵏⴻⵖⵏⵉ?” 4 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙⴻⵏ: “ⵔⵓⵃⴻⵎ, ⵜⵄⴰⵡⴷⴻⵎ ⵉ ⵢⵓⵃⴰⵏⵏⴰ ⵎⵉⵏ ⵜⴻⵙⵍⴰⵎ ⴷ ⵎⵉⵏ ⵜⴻⵥⵔⵉⵎ! 5 ⴰⵇⴰ ⵉⴷⴰⵔⵖⴰⵍⴻⵏ ⵜⵜⵡⴰⵍⴰⵏ, ⵉⵏⴻⵄⴹⴰⴱⴻⵏ ⴳⴳⵓⵔⴻⵏ ⴷ ⵢⵉⵏⵏⵉ ⴷⵉ ⵉⴵⴰ ⵍⴱⴰⵔⵚ ⵜⵜⵡⴰⵙⵙⵉⵣⴷⵉⴳⴻⵏ, ⵉⴷⴻⵀⵛⴰⵔ ⴷⴻⵡⵍⴻⵏ ⵜⵜⴻⵙⵍⴰⵏ, ⵉⵎⴻⵜⵜⵉⵏⴻⵏ ⵜⵜⵡⴰⵙⵙⵏⴻⴽⴽⴰⵔⴻⵏ-ⴷⴷ ⵓ ⵍⴻⵅⴱⴰⵔ ⴰⵚⴻⴱⵃⴰⵏ ⵉⵜⵜⵡⴰⴱⴰⵔⵔⴰⵃ ⵉ ⵉⵎⴻⵣⵍⴰⴹ. [c] 6 ⵙⵙⴻⵄⴷ ⵏ ⵡⴻⵏⵏⵉ ⵡⴰⵔ ⴷⴰⵢⵉ ⵉⵜⵜⴻⵏⴷⵔⵉⴼⴻⵏ.”

7 ⵍⴰⵎⵉ ⵓⵢⵓⵔⴻⵏ ⵉⵏⴰ, ⵉⴱⴷⴰ ⵢⴰⵙⵓⵄ ⵉⵙⵙⴰⵡⴰⵍ ⴰⴽ-ⴷ ⵍⵖⴰⵛⵉ ⵅ ⵢⵓⵃⴰⵏⵏⴰ, ⵉⵏⵏⴰ: “ⵎⵉⵏ ⵖⴰⵔ ⴷⴷ-ⵜⴻⴼⴼⵖⴻⵎ ⵖⴰⵔ ⵍⴻⵅⵍⴰ ⵎⴰⵃⴻⵏⴷ ⴰⴷ ⵜ ⵜⵥⴰⵔⴻⵎ? ⵎⴰ ⵖⴰⵔ ⵉⵊⵊ ⵏ ⵓⵖⴰⵏⵉⵎ ⵉⵙⵙⴻⵏⵀⴻⵣⵣⴰ ⵜ ⵓⵙⴻⵎⵎⵉⴹ? [d] 8 ⵎⴰⵍⴰ ⵍⵍⴰ, ⵎⵉⵏ ⵖⴰⵔ ⴷⴷ-ⵜⴻⴼⴼⵖⴻⵎ ⴰⴷ ⵜ ⵜⵥⴰⵔⴻⵎ? ⵎⴰ ⵖⴰⵔ ⵉⵊⵊ ⵏ ⴱⵏⴰⴷⴻⵎ ⵙ ⵡⴰⵔⵔⵓⴹ ⵢⴰⵔⴹⴻⴱ? ⵅⵣⴰⵔ, ⵉⵏⵏⵉ ⵢⴰⵔⵔⴹⴻⵏ ⴰⵔⵔⵓⴹ ⵉⵖⵍⴰⵏ ⵢⴰⵔⴹⴻⴱ, ⴰⵇⴰ ⴰⵜⴻⵏ ⴷⵉ ⵜⵓⴷⵔⵉⵏ ⵏ ⵓⵊⴻⴵⵉⴷ. 9 ⵎⵉⵏ ⵖⴰⵔ ⴷⴷ-ⵜⴻⴼⴼⵖⴻⵎ ⵅⴻⵏⵏⵉ ⵎⴰⵃⴻⵏⴷ ⴰⴷ ⵜ ⵜⵥⴰⵔⴻⵎ? ⵉⵊⵊ ⵏ ⵓⵏⴰⴱⵉ? ⵡⴰⵀ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⴷ ⴰⵎⴻⵇⵇⵔⴰⵏ ⵄⴰⴷ ⵅ ⵓⵏⴰⴱⵉ. 10 ⵎⴰⵖⴰⵔ ⴰⵇⴰ ⴷ ⵡⴰ ⴷ ⵡⴻⵏⵏⵉ ⵉ ⵅⴻⴼ ⵉⵜⵜⵡⴰⵔⵉ ⵡⴰⵡⴰⵍ-ⴰ: ‘ⵅⵥⴰⵔ, ⴰⴷ ⴷⴷ-ⵙⵙⴻⴽⴽⴻⵖ ⵍⵎⴰⵍⴰⴽ ⵉⵏⵓ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⵡⴻⵏⵏⵉ ⵉ ⵖⴰ ⵉⵙⵙⵡⴻⵊⴷⴻⵏ ⴰⴱⵔⵉⴷ ⵏⵏⴻⵛ ⵣⵣⴰⵜⴻⴽ.’ [e] 11 ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵊⴰⵔ ⵉⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⵜⴻⵎⵖⴰⵔⵉⵏ, ⵡⴰⵔ ⴷⴷ-ⵉⴼⴼⵉⵖ ⵓⵍⴰ ⴷ ⵉⵊⵊ ⴷ ⴰⵎⴻⵇⵇⵔⴰⵏ ⵅ ⵢⵓⵃⴰⵏⵏⴰ ⴰⵎⵙⴻⵖⴹⴰⵚ. ⵡⴰⵅⵅⴰ ⴰⵎⴻⵏⵏⵉ ⴰⵎⴻⵥⵢⴰⵏ ⴷⵉ ⵜⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴷ ⴰⵎⴻⵇⵇⵔⴰⵏ ⵅⴰⵙ. 12 ⵣⴻⴳ ⵡⵓⵙⵙⴰⵏ ⵏ ⵢⵓⵃⴰⵏⵏⴰ ⴰⵎⵙⴻⵖⴹⴰⵚ ⴰⵍ ⵉⴹⴰ ⵜⴻⵎⵎⴰⵔⵙ ⵜⴳⴻⵍⴷⵉⵜ ⵏ ⵉⵊⴻⵏⵡⴰⵏ ⵉ ⵍⵄⵓⵏⴼ, ⵓⵛⴰ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⴰⵔⴻⵣⵣⵓⵏ ⵜⵜᵉⵟⵟⴼⴻⵏ ⵜⵜ. [f] 13 ⵎⵉⵏⵣⵉ ⵎⴰⵔⵔⴰ ⵉⵏⴰⴱⵉⵢⵢⴻⵏ ⴷ ⵛⵛⴰⵔⵉⵄⴰ ⵜⵓⵖⴰ ⵜⵜⵏⴰⴱⴱⴰⵏ ⴰⵍ ⴷⴷ-ⵢⴰⵙ ⵢⵓⵃⴰⵏⵏⴰ. [g] 14 ⵎⴰⵍⴰ ⵜⴻⵅⵙⴻⵎ, ⵇⴻⴱⵍⴻⵎ ⴰⵇⴰ ⵡⴰⵏⵉⵜⴰ ⴷ ⵉⵍⵉⵢⴰ ⵡⴻⵏⵏⵉ ⵜⵓⵖⴰ ⵉⴳⴳⴰ ⴰⴷ ⴷⴷ-ⵢⴰⵙ. [h] 15 ⵡⴻⵏⵏⵉ ⵖⴰⵔ ⵉⴵⴰ ⵉⵎⴻⵣⵣⵓⵖⴻⵏ ⵉ ⵓⵙⴻⴵⵉ ⴰⴷ ⵉⵙⴻⵍ.”

16 “ⵡⵉ ⴰⴽ-ⴷ ⵉ ⵖⴰ ⵙⵙⴻⵎⵇⵓⴷⴷⴻⵖ ⵊⵊⵉⵍ-ⴰ? ⴰⵇⴰ-ⵜ ⴰⵎⴻⵛⵏⴰⵡ ⵉⵃⴻⵏⵊⵉⵔⴻⵏ ⵉⵇⵇⵉⵎⴻⵏ ⴷⵉ ⵍⴻⵙⵡⴰⵇ ⵜⵜⵍⴰⵖⴰⵏ ⵅ ⵉⵎⴻⴷⴷⵓⴽⴽⴰⵍ ⵏⵙⴻⵏ, [i] 17 ⵇⵇⴰⵔⴻⵏ: ‘ⴰⵇⴰ ⵏⵖⴻⵏⵏⴻⵊ ⵉ ⴽⴻⵏⵏⵉⵡ, ⴽⴻⵏⵏⵉⵡ ⵡⴰⵔ ⵜⴻⵛⴹⵉⵃⴻⵎ. ⴰⵇⴰ ⵏⴻⵡⵜⴰ ⴰⵡⴻⵎ ⴰⴳⴻⵊⴷⵓⵔ, ⵡⴰⵔ ⵜⴻⵛⴹⵉⵏⴻⵎ.’

18 ⵎⴰⵖⴰⵔ ⵢⵓⵙⴰ-ⴷⴷ ⵢⵓⵃⴰⵏⵏⴰ, ⵡⴰⵔ ⵉⵜⵜⴻⵜⵜ, ⵡⴰⵔ ⵉⵙⴻⵙⵙ, ⵓⵛⴰ ⵇⵇⴰⵔⴻⵏ ⵏⵉⵜⵏⵉ: ‘ⴷⴰⵢⴻⵙ ⵉⵊⵊ ⵏ ⵛⵛⵉⵟⴰⵏ!’ [j] 19 ⴰⵇⴰ ⵎⵎⵉⵙ ⵏ ⴱⵏⴰⴷⴻⵎ ⵢⵓⵙⴰ-ⴷⴷ, ⵉⵜⵜᵉⵜⵜ, ⵉⵙⴻⵙⵙ, ⵓⵛⴰ ⵏⵉⵜⵏⵉ ⵇⵇⴰⵔⴻⵏ: ‘ⴰⵇⴰ ⴷⵉⵏ ⴱⵏⴰⴷⴻⵎ ⵉⵍⵀⴻⴼ ⵅ ⵎⴰⵛⵛⴰ ⴷ ⴱⵉⵏⵓ, ⵏⴻⵜⵜⴰ ⴷ ⴰⵎⴻⴷⴷⵓⴽⴽⴻⵍ ⵏ ⴰⵢⵜ ⵏ ⴹⴹⴰⵔⵉⴱⴰ ⴷ ⵉⵎⴻⴷⵏⴰⴱ!’ ⵎⴰⵛⴰ ⵜⵉⵖⵉⵜ ⵜᵉⵜⵜⵡⴰⵙⴻⴳⴳⴻⴷ ⵙ ⵍⴻⵅⴷⴰⵢⴻⵎ ⵏⵏⴻⵙ.”

20 ⵍⴻⵅⴷⴻⵏⵏⵉ ⵉⴱⴷⴰ ⵉⵜⵜⵡⴻⴱⴱⴻⵅ ⵜⵉⵏⴻⴷⴷⴰⵎ ⵉ ⴷⵉ ⵉⴳⴳⴰ ⴰⵟⵟⴰⵙ ⵏ ⵍⴻⵄⵊⴰⵢⴻⴱ ⵏⵏⴻⵙ, ⵎⵉⵏⵣⵉ ⵏⵉⵜⴻⵏⵜⵉ ⵡⴰⵔ ⵜⵓⴱⴻⵏⵜ ⵛⴰ. [k] 21 “ⵓⵛⵜ ⵅⴰⵎ, ⴰ ⵅⵓⵔⴰⵣⵉⵏ, ⵓⵛⵜ ⵅⴰⵎ, ⴰ ⴱⴰⵢⵜ-ⵚⴰⵢⴷⴰ! ⵎⵍⵉ ⵜⵓⵖⴰ ⵜⵜⵡⴰⴳⴳⴻⵏⵜ ⴷⵉ ⵚⵓⵔ ⴷ ⵚⴰⵢⴷⵓⵏ ⵍⴻⵄⵊⴰⵢⴻⴱ ⵉⵊⴻⵀⴷⴻⵏ ⵜⵉⵏⵏⵉ ⵉⵜⵜⵡⴰⴳⴳⴻⵏ ⴷⴰⵢⴽⴻⵏⵜ, ⵉⵍⵉ ⴰⵇⴰ ⵜⵓⴱⴻⵏⵜ ⴰⵟⵟⴰⵙ ⵣⴻⴳ ⵡⴰⵎⵉ ⵙ ⵜⵅⴰⵏⵛⴻⵜ ⵏ ⵡⴻⵛⴹⴰⵏ ⴷ ⵢⵉⵖⵖⴻⴹ ⵅ ⵉⵣⴻⴵⵉⴼⴻⵏ ⵏⵙⴻⵏⵜ. [l] 22 ⵎⴰⵛⴰ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ⴰⴷ ⵢⵉⵍⵉ ⵍⵃⴰⵍ ⵉ ⵜⴻⵏⴷⵉⵏⵜ ⵏ ⵚⵓⵔ ⴷ ⵚⴰⵢⴷⵓⵏ ⵉⵀⵡⴻⵏ ⵣⵉ ⵍⵃⴰⵍ ⵏⵡⴻⵎ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ. [m] 23 ⵉ ⵛⴻⵎ, ⴰ ⵜⴰⵏⴷⵉⵏⵜ ⵏ ⴽⴰⴼⴰⵔⵏⴰⵃⵓⵎ, ⵜⴻⵏⵏⵉ ⵉⵜⵜⵡⴰⵙⵙⴳⴻⵄⵄⴷⴻⵏ ⴰⵍ ⴰⵊⴻⵏⵏⴰ? ⵖⴰⵔ ⵍⴰⵅⴰⵔⵜ ⵉ ⵖⴰⵔ ⴷⴷ ⵖⴰ ⵜⴻⵀⵡⵉⴷ. ⵎⵉⵏⵣⵉ ⵎⴰⵍⴰ ⵜⵜⵡⴰⴳⴳⴻⵏⵜ ⴷⵉ ⵙⴰⴷⵓⵎ ⵍⴻⵄⵊⴰⵢⴻⴱ ⵉⵊⴻⵀⴷⴻⵏ ⵉ ⴷⴰⵢⴻⵎ ⵉⵜⵜⵡⴰⴳⴳⴻⵏ, ⵉⵍⵉ ⴰⵇⴰ ⵜⴻⵇⵇⵉⵎ ⴰⵍ ⴰⵙⵙ ⵏ ⵢⵉⴹⴰ. 24 ⵎⴰⵛⴰ ⵏⴻⵛⵛ ⴰⴷ ⴰⵎ ⵉⵏⵉⵖ, ⴰⴷ ⵢⵉⵍⵉ ⵍⵃⴰⵍ ⵉ ⵜⴻⵎⵎⵓⵔⵜ ⵏ ⵙⴰⴷⵓⵎ ⵉⵀⵡⴻⵏ ⵣⵉ ⵍⵃⴰⵍ ⵏⵏⴻⵎ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ.” [n]

25 ⴷⵉ ⵍⵡⴻⵇⵜ ⵏⵏⵉ ⵉⴱⴷⴰ ⵢⴰⵙⵓⵄ ⴰⴷ ⵢⵉⵏⵉ: “ⵃⴻⵎⴷⴻⵖ ⵛⴻⴽ ⴰ ⴱⴰⴱⴰ, ⵙⵉⴷⵉ ⵏ ⵓⵊⴻⵏⵏⴰ ⴷ ⵜⴻⵎⵎⵓⵔⵜ, ⵎⵉⵏⵣⵉ ⵜⴻⵙⵙⵏⵓⴼⴼⴰⵔⴻⴷ ⴰⵢⴰ ⵅ ⵉⵎⵉⵖⵉⵙⴻⵏ ⴷ ⵉⵎⵓⵙⵏⴰⵡⴻⵏ, ⵎⴰⵛⴰ ⵜⴻⵙⵙⴰⵔⴻⴳⴱⴻⴷ ⴰⵢⴰ ⵉ ⵉⵃⴻⵏⵊⵉⵔⴻⵏ. [o] 26 ⵡⴰⵀ, ⴰ ⴱⴰⴱⴰ, ⵎⵉⵏⵣⵉ ⴷ ⵡⴰ ⴷ ⴰⵔⴹⴰ ⵉ ⵛⴻⴽ. 27 ⵎⴰⵔⵔⴰ ⵎⵉⵏ ⵉⴵⴰⵏ ⵉⵎⵎⴻⵡⵛ ⴰⵢⵉ-ⴷⴷ ⵣⵉ ⴱⴰⴱⴰ, ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵏ ⵎⵎⵉⵙ ⵎⵖⵉⵔ ⴱⴰⴱⴰⵙ, ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵏ ⴱⴰⴱⴰⵙ ⵎⵖⵉⵔ ⵎⵎⵉⵙ ⵓ ⵡⵉ ⵓⵎⵉ ⵉⵅⵙ ⵎⵎⵉⵙ ⴰⴷ ⵜ ⵉⵙⵙⴰⵔⴳⴻⴱ.” [p]

28 “ⴰⵙⴻⵎ-ⴷⴷ ⵖⴰⵔⵉ ⵎⴰⵔⵔⴰ ⴽⴻⵏⵏⵉⵡ, ⵉⵏⵏⵉ ⵢⵓⵃⵍⴻⵏ ⴷ ⵢⵉⵏⵏⵉ ⵢⴰⵔⴱⵓⵏ ⴷⴷⵇⴻⵍ, ⵓⵛⴰ ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⴰⵔⵔⴰⵃⴻⵜ, 29 ⴽⵙⵉⵎ-ⴷⴷ ⴰⵣⴰⵢⵍⵓ ⵉⵏⵓ ⵅⴰⵡⴻⵎ, ⵍⴻⵎⴷⴻⵎ ⵣⵣⴰⵢⵉ, ⵎⵉⵏⵣⵉ ⵏⴻⵛⵛ ⴷ ⴰⵎⵀⵉⵏ ⴷ ⴰⵎⵡⴰⴹⴻⵄ ⵏ ⵡⵓⵍ ⵓⵛⴰ ⴰⴷ ⵜⴰⴼⴻⵎ ⴰⵔⵔⴰⵃⴻⵜ ⵉ ⵍⴻⵄⵎⵓⵔ ⵏⵡⴻⵎ. [q] 30 ⵎⵉⵏⵣⵉ ⴰⵣⴰⵢⵍⵓ ⴷ ⵍⴻⵃⵎⴻⵍ ⵉⵏⵓ ⴼⵙⵓⵙⴻⵏ.” [r]