1 ⵉⵍⴰⵖⴰ ⵢⴰⵙⵓⵄ ⵅ ⵜⴻⵏⵄⴰⵛ ⵏ ⵉⵎⴻⵃⴹⴰⵔⴻⵏ ⵏⵏⴻⵙ, ⵉⵡⵛⴰ ⴰⵙⴻⵏ ⵚⵚⵓⵍⵟⴰ ⵃⵉⵎⴰ ⴰⴷ ⵙⵙⵓⴼⴼⵖⴻⵏ ⵍⴰⵔⵢⴰⵃ ⵉⵎⴻⵏⴳⴰⵙ ⵓ ⵃⵉⵎⴰ ⴰⴷ ⵙⵙⴳⴻⵏⴼⴰⵏ ⵎⴰⵔⵔⴰ ⵍⴻⵄⵢⵓⴱⴰⵜ ⴷ ⵍⴻⵀⵍⴰⵛⴰⵜ. [a] 2 ⵉⵙⵎⴰⵡⴻⵏ ⵏ ⵜⴻⵏⵄⴰⵛ ⵏ ⵔⵔⵓⵙⵓⵍ ⴷ ⵢⵉⵏⴰ: ⴰⵎⴻⵣⵡⴰⵔⵓ ⵏⵙⴻⵏ ⵛⵉⵎⵄⵓⵏ ⵓⵎⵉ ⵇⵇⴰⵔⴻⵏ ⴱⵓⵟⵔⵓⵙ, ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵥⵔⵓ’, ⴷ ⵓⵎⴰⵙ ⴰⵏⴷⵔⴰⵡⵓⵙ, ⴷ ⵢⴰⵄⵇⵓⴱ, ⵎⵎⵉⵙ ⵏ ⵣⴰⴱⴷⵉ, ⴷ ⵓⵎⴰⵙ ⵢⵓⵃⴰⵏⵏⴰ, [b] 3 ⴷ ⴼⵉⵍⵉⴱⴱⵓⵙ ⴷ ⴱⴰⵔ-ⵜⵓⵍⵓⵎⴰⵡⵓⵙ, ⵜⵓⵎⴰ ⴷ ⵎⴰⵜⵜⴰ, ⵡⴻⵏⵏⵉ ⴷ ⴱⵓ-ⴹⴹⴰⵔⵉⴱⴰ, ⴷ ⵢⴰⵄⵇⵓⴱ, ⵎⵎⵉⵙ ⵏ ⵃⴰⵍⴼⴰ, ⴷ ⵍⴰⴱⴱⴰⵡⵓⵙ, ⵓⵎⵉ ⵇⵇⴰⵔⴻⵏ ⵜⴰⴷⴷⴰⵢ, 4 ⴷ ⵛⵉⵎⵄⵓⵏ, ⵡⴻⵏⵏⵉ ⴷ ⴰⵎⵄⴻⵙⵙⴰⴱ, ⴷ ⵢⴰⵀⵓⴷⴰ ⵉⵙⵅⴰⵔⵉⵢⵓⵟⵉ ⵡⴻⵏⵏⵉ ⵜ ⵉⵙⴻⵍⵍⵎⴻⵏ. 5 ⵢⴰⵙⵓⵄ ⵉⵙⵙⴻⴽⴽ ⵜⴻⵏⵄⴰⵛ-ⴰ, ⵢⵓⵎⵓⵔ ⵉ-ⵜⴻⵏ, ⵉⵏⵏⴰ: “ⵡⴰⵔ ⵜⵜⵔⵓⵃⴻⵎ ⵛⴰ ⵅ ⵡⴻⴱⵔⵉⴷ ⵏ ⵍⴽⵓⴼⴼⴰⵔ, ⵡⴰⵔ ⵜⵜⴰⴷⴼⴻⵎ ⵛⴰ ⵖⴰⵔ ⵜⴻⵏⴷⵉⵏⵜ ⵏ ⵉⵙⴰⵎⴰⵔⵉⵢⵢⴻⵏ, 6 ⵎⴰⵛⴰ ⵃⵙⴻⵏ ⴰⴷ ⵜⵔⴰⵃⴻⵎ ⵖⴰⵔ ⵡⵓⴵⵉ ⵉⵡⴻⴷⴷⴰⵔⴻⵏ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. [c] 7 ⵅⵎⵉ ⵖⴰ ⵜⵔⴰⵃⴻⵎ, ⴱⴰⵔⵔⵃⴻⵎ ⴰⵎ ⵜⴻⵇⵇⴰⵔⴻⵎ: ‘ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴰⵇⴰ ⵜⵉⵡⴻⴹ-ⴷⴷ!’ [d] 8 ⵙⴳⴻⵏⴼⴰⵎ ⵉⵎⴻⵀⵍⴰⵛ, ⵙⵉⵣⴷⴳⴻⵎ ⵉⵏⵏⵉ ⴷⵉ ⵉⴵⴰ ⵍⴱⴰⵔⵚ, ⵙⵓⴼⴼⵖⴻⵎ ⵛⵛⵡⴰⵟⴻⵏ. ⴽⴻⵏⵏⵉⵡ ⵜⴻⴽⵙⵉⵎ ⴱⵍⴰ ⵛⴰ, ⵅⴻⵏⵏⵉ ⵡⵛⴻⵎ ⵜⵜ ⴱⵍⴰ ⵛⴰ. [e] 9 ⵡⴰⵔ ⴽⴻⵙⵙⵉⵎ ⵛⴰ ⵡⵓⵔⴻⵖ ⵓⵍⴰ ⴷ ⵏⵏⵓⵇⴰⵔⵜ ⵓⵍⴰ ⴷ ⵏⵏⵃⴰⵙ ⴷⴻⴳ ⵉⴱⵓⵢⴰⵙ ⵏⵡⴻⵎ, [f] 10 ⵡⴰⵔ ⴽⴻⵙⵙⵉⵎ ⵛⴰ ⵜⵜⴻⵙⵟⵉⵎ ⵉ ⵡⴻⴱⵔⵉⴷ ⵍⴰ ⴷ ⵜⵏⴰⵢⴻⵏ ⵏ ⵜⵛⴰⵎⵉⵔⴰⵜ ⵍⴰ ⴷ ⵙⴰⵏⴷⴰⵍⵉⵢⴰⵜ ⵓⵍⴰ ⴷ ⵜⴰⵖⵖⴰⵔⵛⵜ ⵏⵏⴻⵖⵏⵉ, ⵎⵉⵏⵣⵉ ⴰⵅⴻⴷⴷⴰⵎ ⵉⵙⴷⴰⵀⴻⴵ ⵎⴰⵛⵛⴰ ⵏⵏⴻⵙ. [g] 11 ⵎⴰⵏ ⵜⴰⵏⴷⵉⵏⵜ ⵏⵉⵖ ⴷⵛⴰⵔ ⵉ ⵖⴰ ⵜⴰⴷⴼⴻⵎ, ⴰⵔⵣⵓⵎ ⵡⵉ ⴷⴰⵢⴻⵙ ⵉⵙⴷⴰⵀⴻⴵ, ⵓⵛⴰ ⵇⵇⵉⵎⴻⵎ ⴷⵉⵏ ⴰⵍ ⴷ ⵜⵔⴰⵃⴻⵎ. [h] 12 ⵎⴰⵍⴰ ⵜⵓⴷⴼⴻⵎ ⵖⴰⵔ ⵜⴰⴷⴷⴰⵔⵜ, ⵙⴻⴵⵎⴻⵎ ⵅ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵙ ⵍⴻⵀⵏⴰ. 13 ⵎⴰⵍⴰ ⵜⴰⴷⴷⴰⵔⵜ ⵜⴻⵙⴷⴰⵀⴻⴵ, ⵊⵊⴻⵎ ⵅⴰⵙ ⵍⴻⵀⵏⴰ ⵏⵡⴻⵎ, ⵎⴰⵍⴰ ⵡⴰⵔ ⵜ ⵜⴻⵙⴷⵉⵀⴻⴵ, ⵅⴻⵏⵏⵉ ⵍⴻⵀⵏⴰ ⵏⵡⴻⵎ ⴰⴷ ⵖⴰⵔⵡⴻⵎ ⴷⴷ-ⵉⵄⵇⴻⴱ. 14 ⵎⴰⵍⴰ ⵜⵓⴼⵉⵎ ⵛⴰ ⵏ ⵢⵉⵊⵊⴻⵏ ⵡⴰⵔ ⴽⴻⵏⵏⵉⵡ ⵉⵇⴻⴱⴱⴻⵍ ⵓ ⵡⴰⵔ ⵉⵜⵜⴻⵙⵍⵉ ⵉ ⵡⴰⵡⴰⵍⴻⵏ ⵏⵡⴻⵎ, ⴼⴼⵖⴻⵎ ⵣⵉ ⵜⴰⴷⴷⴰⵔⵜ ⵏⵏⵉ ⵏⵉⵖ ⵣⵉ ⴷⵛⴰⵔ ⵏⵏⵉ, ⵣⵣⴻⵔⵣⴻⵎ ⵜⴰⵄⴻⵊⵊⴰⵊⵜ ⵣⴻⴳ ⵉⴹⴰⵔⴻⵏ ⵏⵡⴻⵎ. [i] 15 ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ⴰⴷ ⵢⵉⵍⵉ ⵍⵃⴰⵍ ⵉ ⵜⴻⵎⵎⵓⵔⵜ ⵏ ⵙⴰⴷⵓⵎ ⴷ ⵄⴰⵎⵓⵔⵔⴰ ⵉⵀⵡⴻⵏ ⵣⵉ ⵜⴻⵏⴷⵉⵏⵜ ⵏⵏⵉ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ.” [j]

16 “ⵅⵣⴰⵔⴻⵎ, ⵍⴻⵅⵅⵓ ⴰⴷ ⴽⴻⵏⵏⵉⵡ ⵙⵙⴻⴽⴽⴻⵖ ⴰⵎ ⵓⴵⵉ ⴷⵉ ⵍⵡⴻⵙⵟ ⵏ ⵡⵓⵛⵛⴰⵏⴻⵏ. ⵉⵍⵉⵎ ⵜⴼⴻⵜⵜⵏⴻⵎ ⴰⵎⴻⵛⵏⴰⵡ ⵉⴼⵉⵖⵔⴰⵏ ⵓ ⵖⴻⴼⴼⵍⴻⵎ ⴰⵎⴻⵛⵏⴰⵡ ⵉⴷⴱⵉⵔⴻⵏ. [k] 17 ⵎⴰⵛⴰ ⵃⴹⴰⵎ ⵉⵅⴻⴼ ⵏⵡⴻⵎ ⵣⴻⴳ ⵉⵡⴷⴰⵏ, ⵎⵉⵏⵣⵉ ⵏⵉⵜⵏⵉ ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ ⵉ ⵜⴰⴷⴷⴰⵔⵜ ⵏ ⵛⵛⵔⴻⵄ, ⴰⴷ ⴽⴻⵏⵏⵉⵡ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ ⴷⵉ ⵜⴻⵎⵣⵉⴷⴰⵡⵉⵏ ⵏⵙⴻⵏ. [l] 18 ⴰⴷ ⴽⴻⵏⵏⵉⵡ ⵏⴻⴷⵀⴻⵏ ⵣⵣⴰⵜ ⵉ ⵍⵃⵓⴽⴽⴰⵎ ⴷ ⵣⵣⴰⵜ ⵉ ⵉⵊⴻⴵⵉⴷⴻⵏ ⴷⵉ ⵙⵙⵉⴱⴱⴻⵜ ⵉⵏⵓ, ⵃⵉⵎⴰ ⴰⴷ ⵜⵉⵍⵉⵎ ⴷ ⵛⵛⵀⴰⴷⴻⵜ ⵉ ⵏⵉⵜⵏⵉ ⵓⵍⴰ ⵉ ⵍⴻⴳⵏⵓⵙ. [m] 19 ⵎⴰⵍⴰ ⵙⴻⵍⵍⵎⴻⵏ ⴽⴻⵏⵏⵉⵡ, ⵡⴰⵔ ⴽⴻⵙⵙⵉⵎ ⵛⴰ ⵙ ⵡⴻⵎⵏⵓⵙ ⵎⴰⵎⵎⴻⵛ ⴷ ⵎⵉⵏ ⵖⴰ ⵜⴻⵙⵙⵉⵡⵍⴻⵎ, ⵎⵉⵏⵣⵉ ⴰⴷ ⴰⵡⴻⵎ ⵉⵎⵎⴻⵡⵛ ⴷⵉ ⵜⵙⴰⵄⵄⴻⵜ ⵏⵏⵉ ⵎⵉⵏ ⵉⵜⵜⵅⴻⵚⵚⴰ ⴰⴷ ⵜⵉⵏⵉⵎ. [n] 20 ⵎⴰⵖⴰⵔ ⵡⴰⵔ ⵉⴵⵉ ⴷ ⴽⴻⵏⵏⵉⵡ ⵉⵏⵏⵉ ⵉⵙⵙⴰⵡⴰⵍⴻⵏ, ⵎⴰⵛⴰ ⴷ ⴰⵔⵔⵓⵃ ⵏ ⴱⴰⴱⴰⵜⵡⴻⵎ ⴷ ⵏⴻⵜⵜⴰ ⵉ ⴷⴰⵢⵡⴻⵎ ⵉⵙⵙⴰⵡⴰⵍⴻⵏ.

21 ⵓⵎⴰⵙ ⴰⴷ ⵉⵙⴻⵍⵍⴻⵎ ⵓⵎⴰⵙ ⵃⵉⵎⴰ ⴰⴷ ⵉⵜⵡⴰⵏⴻⵖ ⵓ ⴱⴰⴱⴰⵙ ⵎⵎⵉⵙ, ⵓⵛⴰ ⴰⴷ ⴽⴽⴰⵔⴻⵏ ⵜⴰⵔⵡⴰ ⴷ ⴰⵖⴻⵣⴷⵉⵙ ⵉ ⵍⵡⴰⵍⵉⴷⵉⵏ ⵏⵙⴻⵏ, ⴰⴷ ⵜⴻⵏ ⵏⵖⴻⵏ. [o] 22 ⴰⴷ ⴽⴻⵏⵏⵉⵡ ⵛⴰⵔⵀⴻⵏ ⵎⴰⵔⵔⴰ ⵉⴷⵙⴻⵏ ⵅ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵚⴱⴰⵔⴻⵏ ⴰⵍ ⴰⵏⴻⴳⴳⴰⵔⵓ ⴰⴷ ⵉⵜⵜⵡⴰⵙⵙⴻⵏⵊⴻⵎ. [p] 23 ⵎⴰⵍⴰ ⴷⴰⵔⵔⵛⴻⵏ ⵅⴰⵡⴻⵎ ⴷⵉ ⵜⴻⵏⴷⵉⵏⵜ-ⴰ, ⴰⵔⴻⵡⵍⴻⵎ ⵖⴰⵔ ⵜⴻⵏⵏⴻⵖⵏⵉⵜ. ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ⴽⴻⵏⵏⵉⵡ ⵡⴰⵔ ⵜᵉⵜⵜⴻⴽⴽⴻⵎ ⵛⴰ ⵅ ⵎⴰⵔⵔⴰ ⵜⵉⵏⴻⴷⴷⴰⵎ ⵏ ⵉⵙⵔⴰⵉⵍ ⴰⵍ ⴷⴷ ⵖⴰ ⵢⴰⵙ ⵎⵎⵉⵙ ⵏ ⴱⵏⴰⴷⴻⵎ.” [q]

24 “ⵡⴰⵔ ⵉⴵⵉ ⵓⵎⴻⵃⴹⴰⵔ ⵢⵓⵄⵍⴰ ⵅ ⵓⵎⵙⴻⵍⵎⴰⴷ ⵏⵏⴻⵙ, ⵓⵍⴰ ⴷ ⴰⵎⵙⴻⵅⵅⴰⵔ ⵅ ⴱⴰⴱ ⵏⵏⴻⵙ. [r] 25 ⵉⴽⴼⴰ ⵉ ⵓⵎⴻⵃⴹⴰⵔ ⴰⴷ ⵢⵉⵍⵉ ⴰⵎ ⵓⵎⵙⴻⵍⵎⴰⴷ ⵏⵏⴻⵙ ⵓ ⴰⵎⵙⴻⵅⵅⴰⵔ ⴰⵎ ⴱⴰⴱ ⵏⵏⴻⵙ. ⵎⴰⵍⴰ ⵍⴰⵖⴰⵏ ⴰⵙ ⵉ ⴱⴰⴱ ⵏ ⵜⴰⴷⴷⴰⵔⵜ ‘ⴱᵉⵄⴰⵍⵣⴰⴱⵓⵍ’, ⵉⵅⵙ ⴰⴷ ⵢⵉⵏⵉ ‘ⵉⴱⵍⵉⵙ’, ⵎⴻⵛⵃⴰⵍ ⵄⴰⴷ ⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ! [s] 26 ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ ⵣⵣⴰⵢⵙⴻⵏ. ⵎⵉⵏⵣⵉ ⵡⴰⵔ ⴷⵉⵏ ⵎⵉⵏ ⵉⴷⵍⵉⵏ ⴰⴷ ⵉⵇⵇⵉⵎ ⵡⴰⵔ ⵉⵜⵜⵡⴰⵄⴰⵔⵔⵉ, ⵓⵍⴰ ⵡⴰⵔ ⴷⵉⵏ ⵎⵉⵏ ⵉⵏⵓⴼⴼⴰⵔⴻⵏ ⴰⴷ ⵉⵇⵇⵉⵎ ⵡⴰⵔ ⵉⵜⵜⵡⵉⵙⵙⴻⵏ.” [t]

27 “ⵎⵉⵏ ⴷ ⴰⵡⴻⵎ ⵇⵇⴰⵔⴻⵖ ⴷⵉ ⵜⴰⴵⴻⵙⵜ, ⵉⵏⵉⵎ ⵜ ⴷⵉ ⵜⴼⴰⵡⵜ, ⵎⵉⵏ ⵜⴻⵙⵍⵉⵎ, ⵇⵇⴰⵔⴻⵏ ⵜ ⴷⴻⴳ ⵉⵎⴻⵣⵣⵓⵖⴻⵏ ⵏⵡⴻⵎ, ⴱⴰⵔⵔⵃⴻⵎ ⵣⵣⴰⵢⴻⵙ ⵅ ⵜⵣⴻⵖⵡⵉⵏ. 28 ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ ⵣⴻⴳ ⵉⵏⵏⵉ ⵉⵏⴻⵇⵇⴻⵏ ⴰⵔⵔⵉⵎⴻⵜ, ⵎⴰⵛⴰ ⵡⴰⵔ ⵣⴻⵎⵎⴰⵔⴻⵏ ⴰⴷ ⵏⵖⴻⵏ ⵍⴻⵄⵎⴰⵔ. ⴳⴳⵯⴻⴷⴻⵎ ⴷ ⴰⵎⴻⵣⵡⴰⵔⵓ ⵣⴻⴳ ⵡⴻⵏⵏⵉ ⵉⵣⴻⵎⵎⴰⵔⴻⵏ ⴰⴷ ⵉⵙⵙⵀⴻⵍⵍⴻⴽ ⵍⴻⵄⵎⴰⵔ ⴷ ⴰⵔⵔⵉⵎⴻⵜ ⴷⵉ ⵊᵉⵀⴻⵏⵏⴰⵎⴰ. [u] 29 ⵎⴰ ⵡⴰⵔ ⵜⵜⵎⴻⵏⵣⵉⵏ ⵜⵏⴰⵢⴻⵏ ⵏ ⵥⵥⴰⵡⴻⵛ ⵙ ⵢⵉⵊⵊ ⵏ ⵓⵚⵓⵍⴷⵉ ⵏ ⵏⵏⵃⴰⵙ? ⵓⵍⴰ ⴷ ⵉⵊⵊ ⵣⵣⴰⵢⵙⴻⵏ ⵡⴰⵔ ⴷⴷ-ⵉⵡⴻⵟⵟⵉ ⵛⴰ ⵅ ⵜⴻⵎⵎⵓⵔⵜ ⴱⵍⴰ ⴱⴰⴱⴰⵜⵡⴻⵎ, 30 ⵎⴰⵛⴰ ⵓⵍⴰ ⴷ ⵉⵥⵓⵟⵟⴰⵏ ⵏ ⵓⵛⵓⵡⵡⴰⴼ ⵏ ⵓⵣⴻⴵⵉⴼ ⵏⵡⴻⵎ ⵜⵜⵡⴰⵃⴻⵙⵙⴱⴻⵏ ⵎⴰⵔⵔⴰ. [v] 31 ⵙ ⵓⵢⴻⵏⵏⵉ ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ, ⴰⵇⴰ ⴽⴻⵏⵏⵉⵡ ⵜⴻⵄⴷⵓⵎ ⵥⵥⴰⵡⴻⵛ ⴰⵟⵟⴰⵙ. 32 ⵙ ⵓⵢⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵣⵣⴰⵢⵉ ⵉ ⵖⴰ ⵉⵛⴻⵀⴷⴻⵏ ⵣⵣⴰⵜ ⵉ ⵉⵡⴷⴰⵏ, ⵓⵍⴰ ⴷ ⵏⴻⵛⵛ ⴰⴷ ⵣⵣⴰⵢⴻⵙ ⵛⴻⵀⴷⴻⵖ ⵣⵣⴰⵜ ⵉ ⴱⴰⴱⴰ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ. [w] 33 ⵎⴰⵛⴰ ⵡⴻⵏⵏⵉ ⴷ ⴰⵢⵉ ⵖⴰ ⵉⵏⴽⴰⵔⴻⵏ ⵣⵣⴰⵜ ⵉ ⵉⵡⴷⴰⵏ, ⵓⵍⴰ ⴷ ⵏⴻⵛⵛ ⴰⴷ ⵜ ⵏⴽⴰⵔⴻⵖ ⵣⵣⴰⵜ ⵉ ⴱⴰⴱⴰ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ.”

34 “ⵡⴰⵔ ⵜⵜⵖⵉⵍⴻⵎ ⵛⴰ ⴱⴻⵍⵍⵉ ⵓⵙⵉⵖ-ⴷⴷ ⵃⵉⵎⴰ ⴰⴷ ⴰⵡⵢⴻⵖ ⵍⴻⵀⵏⴰ ⵉ ⴷⴷⵓⵏⴻⵛⵜ. ⵏⴻⵛⵛ ⵡⴰⵔ ⴷⴷ-ⵓⵙⵉⵖ ⵛⴰ ⵃⵉⵎⴰ ⴰⴷ ⴰⵡⵢⴻⵖ ⵍⴻⵀⵏⴰ, ⵎⴰⵛⴰ ⵙⵙⵉⴼ. [x] 35 ⵓⵙⵉⵖ-ⴷⴷ ⵃⵉⵎⴰ ⴰⴷ ⴱⴹⵉⵖ ⴰⵔⵢⴰⵣ ⵅ ⴱⴰⴱⴰⵙ, ⴷ ⵢⴻⴵⵉⵙ ⵅ ⵢⴻⵎⵎⴰⵙ, ⴷ ⵜⴻⵙⵍⵉⵜ ⵅ ⵍⴰⵍⵍⴰⵙ. [y] 36 ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏ ⴱⵏⴰⴷⴻⵎ ⴰⴷ ⵉⵍⵉⵏ ⴷ ⵍⵄⴻⴷⵢⴰⵏ ⵏⵏⴻⵙ. [z] 37 ⵡⴻⵏⵏⵉ ⵉⵜⵜⴻⵅⵙⴻⵏ ⴱⴰⴱⴰⵙ ⵏⵉⵖ ⴷ ⵢⴻⵎⵎⴰⵙ ⵅⴰⴼⵉ, ⵡⴰⵔ ⴷ ⴰⵢⵉ ⵉⵙⴷⵉⵀⴻⴵ ⵛⴰ, ⵓⵛⴰ ⵡⴻⵏⵏⵉ ⵉⵜⵜⴻⵅⵙⴻⵏ ⵎⵎⵉⵙ ⵏⵉⵖ ⴷ ⵢⴻⴵⵉⵙ ⵅⴰⴼⵉ, ⵡⴰⵔ ⴷ ⴰⵢⵉ ⵉⵙⴷⵉⵀⴻⴵ ⵛⴰ. [aa] 38 ⵡⴻⵏⵏⵉ ⵡⴰⵔ ⵉⴽⴻⵙⵙⵉⵏ ⵚⵚⴰⵍⵉⴱ ⵏⵏⴻⵙ ⵓⵛⴰ ⴰⴷ ⴰⵢⵉ ⴷⴷ-ⵉⴹⴼⴰⵔ, ⴰⵇⴰ ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵙⴷⵉⵀⴻⴵ ⵛⴰ. [bb]  [cc] 39 ⵡⴻⵏⵏⵉ ⵉ ⵖⴰ ⵢⴰⴼⴻⵏ ⵜⵓⴷⴰⵔⵜ ⵏⵏⴻⵙ ⴰⴷ ⵜⵜ ⵉⵅⵙⴰⵔ, ⴷ ⵡⴻⵏⵏⵉ ⵉ ⵖⴰ ⵉⵅⵙⴰⵔⴻⵏ ⵜⵓⴷⴰⵔⵜ ⵏⵏⴻⵙ ⴷⵉ ⵟⵟⵡⴻⵄ ⵉⵏⵓ ⴰⴷ ⵜⵜ ⵢⴰⴼ. [dd]

40 ⵡⴻⵏⵏⵉ ⴽⴻⵏⵏⵉⵡ ⵉ ⵖⴰ ⵉⵇⴻⴱⵍⴻⵏ, ⵉⵇⴻⴱⴱⴻⵍ ⴰⵢⵉ, ⵓ ⵡⴻⵏⵏⵉ ⴷ ⴰⵢⵉ ⵖⴰ ⵉⵇⴻⴱⵍⴻⵏ, ⵉⵇⴻⴱⴱⴻⵍ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ. [ee]

41 ⵡⴻⵏⵏⵉ ⵉ ⵖⴰ ⵉⵇⴻⴱⵍⴻⵏ ⴰⵏⴰⴱⵉ ⵎⵉⵏⵣⵉ ⵏⴻⵜⵜⴰ ⴷ ⴰⵏⴰⴱⵉ, ⴰⴷ ⵉⵟⵟⴻⴼ ⵍⵎⵓⵏⴻⵜ ⵏ ⵓⵏⴰⴱⵉ, ⴷ ⵡⴻⵏⵏⵉ ⵉ ⵖⴰ ⵉⵇⴻⴱⵍⴻⵏ ⴰⵎⵙⴻⴳⴳⴰⴷ ⵙ ⵎⵉⵏⵣⵉ ⵏⴻⵜⵜⴰ ⴷ ⴰⵎⵙⴻⴳⴳⴰⴷ, ⴰⴷ ⵉⵟⵟⴻⴼ ⵍⵎⵓⵏⴻⵜ ⵏ ⵓⵎⵙⴻⴳⴳⴰⴷ. [ff] 42 ⵡⴻⵏⵏⵉ ⵉ ⵖⴰ ⵉⵡⵛⴻⵏ ⵉ ⵢⵉⵊⵊⴻⵏ ⵣⴻⴳ ⵉⵏⴰ ⵉⵎⴻⵥⵢⴰⵏⴻⵏ ⵉⵊⵊ ⵏ ⵍⴽⴰⵙ ⵏ ⵡⴰⵎⴰⵏ ⴷ ⴰⵙⴻⵎⵎⴰⴹ, ⵎⵖⵉⵔ ⵎⵉⵏⵣⵉ ⵏⴻⵜⵜⴰ ⴷ ⴰⵎⴻⵃⴹⴰⵔ ⵉⵏⵓ, ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵡⴰⵔ ⴷ ⴰⵙ ⵜᵉⵜⵜⵔⵉⵃ ⵍⵎⵓⵏⴻⵜ ⵏⵏⴻⵙ ⵄⴻⵎⵎⴰⵔⵚ.” [gg]