1 Hallilu-Yah!

Ṣebbḥem Isem n SIDI,

ṣebbḥem xas, a imsexxaren n SIDI,

2 kenniw inni ibedden di Taddart n SIDI,

di řemraḥat n Taddart n AREBBI nneɣ.

3 Hallilu-Yah, maɣar SIDI iṣbeḥ,

zehhdem i Yisem nnes,

maɣar Netta d řeḍrafet.

4 Maɣar SIDi ifarz Yaɛqub i Yixef nnes,

Israil d agřa nnes. [a]

5 Maɣar necc ssneɣ aqa SIDI d ameqqran,

Siditneɣ d ameqqran x marra irebbiten.

6 Marra min d as itteɛjiben i SIDI, igga i-t,

deg ijenwan u x temmurt,

di řebḥur u deg waman ihewřen marra.

7 Netta issgeɛɛed iseynuten

zi ṭṭrufa n temmurt,

Netta ittegg assamen ak-d wenẓar,

ittgewwad asemmiḍ

zi řehrit nnes ɣar barra. [b]

8 Netta iwta imenza n Miṣra,

zeg iwdan ař řmar. [c]

9 Netta issekk řeɛřamat d lmuɛjizat

di řwesṭ nnec, a Miṣra,

ɣar firɛun

u ɣar marra imsexxaren nnes. [d]

10 Netta iwta aṭṭas n řegnus

u inɣa ijeǧiden ijehden. [e]

11 Siḥun, ajeǧid n Imuriyyen,

u Ɛuj, ajeǧid n Bacan,

u marra tigeldiwin n Kenɛan.

12 Iwca asen tammurt d tasɣart,

d tasɣart i Israil, řgens nnes. [f]

13 A SIDI, Isem nnec ittɣima i řebda,

axarreṣ dayek ad yiři zi jjiř ař jjiř. [g]

14 Maɣar SIDI ad yarr tasɣart

ɣar řgens nnes,

Netta ad iḥinn x imsexxaren nnes. [h]

15 Řexyařat n l’aṣnam n řegnus

aqa atent s nnuqart d wureɣ,

ttwaggent s ifassen n iwdan.[i]

16 Nitenti ɣarsent ijj n uqemmum,

maca war ssiwiřent,

ɣarsen tiṭṭawin,

maca war ttwiřint,

17 Nitenti ɣarsen timezzuɣen,

maca war ttesřint,

walu asuḍi n nnefs

deg uqemmun nsen.

18 Ad dewřen inni tent iggin

am nitenti,

marra wi xasent ittcař.

19 A taddart n Israil, barkem SIDI,

a taddart n Harun, barkem SIDI.

20 A taddart n Lawi, barkem SIDI!

Ejj marra inni itteggʷeden SIDI,

ad barken SIDI.

21 Ad ittwabarek SIDI zi Ṣihyun,

Netta d wenni izeddɣen di Urcalim.

Hallilu-Yah!