1 Bnadem ɣares ixarriṣen

deg wuř nnes,

maca tamwarrit n yiřes

tᵉttas-dd zi SIDI. [a]

2 Marra ibriden n weryaz

ṣfan di tiṭṭawin nnes,

maca SIDI ittqeǧab buḥbeřat. [b]

3 Sars řexdayem nnec i SIDI,

xenni ad ttwassmettnen inwayen nnec. [c]

4 SIDI ixřeq-dd marra i lɣaraḍ nnes,

ɛad uřa d aɛeffan igga i-t i wass n řɣar.[d]

5 Kuř amɛeffar d nnɛi i SIDI, afus xas,

netta war ittᵉttwabarri ɛemmarṣ. [e]

6 S tmexsiwt icewwaren d řaman

ad ittwasseṣřeḥ x řɣecc,

u s tiggʷudi n SIDI

ittḥeyyad weryaz x řɣar.

7 Mařa usin-dd ibriden n ijj n weryaz

x řxaḍar n SIDI,

ad yarr Netta uřa d řɛedyan nnes

ad kides ggen řehna.

8 Iḥra drus ak-d tsegda

x waṭṭas n řɣiǧet břa řḥeqq. [f]

9 Uř n bnadem ittxarreṣ abrid nnes,

maca SIDI ineddeh iṣuraf nnes. [g]

10 Řḥukm břa adwař x iyencicen n ujeǧid,

aqemmum nnes war ixeṭṭi deg weḥkam.

11 Řmizan nican d ṭṭawyat n řmizan nican

aqa aten n SIDI,

marra iẓra n řewzen di tecyart

d řxedmet nnes. [h]

12 D nnɛi i ijeǧiden xmi ɣa ggen řɣar,

maɣar řɛarc ittwassemten zi tsegda.

13 Iyencicen i iccuren s tsegda

tteɛjiben i ujeǧid,

u wenni issawařen nican, ittexs i-t netta.

14 Asɛar n ujeǧid am lmalakat n řmewt,

maca aryaz amiɣis izemmar

ad ɣares tt i-dd yarr. [i]

15 Di tfawt n wudem ittissiqen n ujeǧid

teǧa tudart,

arḍa nnes am useynu n wenẓar

di tefsut. [j]

16 Aqa teḥřa tarezzut n tiɣit

x wureɣ ittissiqen,

u mecḥař ktar ad tiři twafit n řefhamet

sennej x twafit n nnuqart. [k]

17 Abrid n yinni igguren nican

ittḥeyyad x řɣar.

Wenni iḥeṭṭan abrid nnes,

iḥeṭṭa řeɛmar nnes.

18 Tanefsect tᵉttizwar-dd i arẓẓiyyet,

u nnfaxet tᵉttas-dd qbeř i uweṭṭu. [l]

19 Iḥřa aqnaɛ n buḥbeř

ak-d inni ittwaḥṣaren,

x ubeṭṭu n tkeccaḍt ak-d ayt-nnfaxet.

20 Wenni ittxarraṣen mliḥ

di ca n tmesřact, ad yaf řxar,

sseɛd n wenni ittcařan x SIDI.[m]

21 Wenni ɣar iǧa wuř d amiɣis,

ad t semman bu-weftan,

u taẓyudi n řhard n iyencicen

tarenni di řefhamet.

22 Řeɛqeř d řɛunṣar n tudart i bab nnes,

maca ttarbiyyet i ibuhařiyyen

d tubbuheřya waha.[n]

23 Uř n umiɣis ittarra aqemmum nnes ifehhem,

zeg iyencicen nnes ad fehmen ktar.

24 Awařen icewwaren

ggin am tamment n teɣrast,

aqa aten d imiẓiden i řeɛmar

d ugenfu i yeɣsan.

25 Ad taɣ ittɣiř as i ca n yijjen

aqa abrid nnes nican,

maca aneggar nnes mɣir ibriden

ittawyen ɣar řmewt. [o]

26 Řaẓ n ucewwař ixeddem as i netta,

maɣar aqemmum nnes ineddeh i-t.

27 Aryaz i war isekkwin iɣezza řɣar,

x iyencicen nnes

am yict n tmessi ittceɛɛařen. [p]

28 Aryaz iccuren s řexdaɛat

issekkara amenɣi,

u axbarji ittawi-dd ɛad abeṭṭu

ak-d umeddukkeř iṣebḥen aṭṭas. [q]

29 Aryaz bu-řexcunet ittɣarra jjar nnes,

ineddeh i-t ɣar ijj n webrid

i war iǧin mliḥ.

30 Netta itteqqen tiṭṭawin nnes

maḥend ad ixarreṣ

marra ddarbat n řexdaɛet,

ittkemmec iyencicen nnes,

aqa da igga řɣar. [r]

31 Acuwwaf icaben d ijj n ttaj izewwqen,

tzemmared ad tt tafed x webrid n tsegda.

32 Iḥřa bu-ttasiɛ n řxaḍar

x ijj n weryaz ijehden

u wenni ittebbaten buḥbeř nnes iḥřa

x wenni iḥewwsen ict n tendint.

33 Taqedduḥt temmenḍar deg weḥsin,

maca mkuř array ittas-dd zi SIDI.