1 Twarrit ifsusen

tessesmaḍ axeyyeq,

maca awař itteqqsen

issekkara-dd axeyyeq. [a]

2 Iřes n imiɣisen ijebbed tussna ɣar zzat,

maca aqemmum n ibuhařiyyen

ittazzeř s tubbuheřya. [b]

3 Tiṭṭawin n SIDI di kuř amcan,

ttḥekkarent i iṣebḥanen d iɛeffanen. [c]

4 Iřes nni issgenfan d tacejjart n tudart,

maca arrhaj nnes ittareẓẓa buḥbeř. [d]  [e]

5 Abuhaři ineṭṭar ttarbiyyet n babas,

maca wenni ittḥekkaran

i uwebbex, aqa iften.

6 Di taddart n umseggad dayes řkenz imɣar,

maca di min dd-ittawi uɛeffan

dayes tamara.

7 Iyencicen n imiɣisen ttbezzaɛen tussna,

maca uř n ibuhařiyyen war iǧi nican.

8 Taɣarṣt i ittqeddamen iɛeffanen

d nnɛi i SIDI,

maca taẓaǧit n inni igguren nican

aqa-tt i Netta d arḍa. [f]

9 Abrid n uɛeffan d nnɛi i SIDI,

maca wenni iḍeffaran tasegda,

ittexs i-t Netta.

10 Ttarbiyyet iqesḥen třeqqef

wenni isemḥen deg webrid,

u wenni icarrhen awebbex,

ad immet.

11 Řaxart d tesraft n uhellek

aqa din arezmen zzat i SIDI,

mecḥař ɛad wuřawen n tarwa n bnadem? [g]

12 Amestehziy war ittexs

wenni t i ɣa iwebbxen,

war ittriḥ ca ɣar imiɣisen.

13 Uř ifarḥen ittegg udem icnan,

maca amnus deg wuř isekkef buḥbeř. [h]

14 Uř ifehhmen yarezzu tussna,

maca aqemmum n ibuhařiyyen

issecca ixef nnes s tubbuheřya.

15 I yinni ittwaḥṣaren marra ussan nsen

aqa iɛeffnen,

maca uř ifarḥen

am ict n zzardet war iqeṭṭin.

16 Iḥřa drus ak-d teggʷudi n SIDI,

x ijj n řkenz d ameqqran s řeḥweř. [i]

17 Iḥřa ijj n ṭṭebṣi n řxuḍart

mani tḥekkem tayri,

x ijj n uyenduz iṣeḥḥen ak-d wecrah. [j]

18 Aryaz ittarrujduden

issekkara imenɣiyyen,

maca wenni ɣar iǧa ttasiɛ n řxaḍar

issexsay amenɣi. [k]

19 Abrid n umeɛguz

am cbarq ak-d isennanen,

maca amesruq n yinni igguren nican

aqa ittwassgeɛɛed.

20 Mmis amiɣis issfarreḥ babas,

maca bnadem abuhaři

isseḥqara yemmas. [l]

21 Tubbuheřya aqa-tt d řefraḥet

i wenni war ɣar iǧi bu wuř imten,

maca ijj n weryaz n řefhamet

iggur nican. [m]

22 Inwayen feccřen

mařa war din iǧi ccwar,

maca s waṭṭas n imcawaren

ad yiři wenway. [n]  [o]

23 Aryaz ɣares řefraḥet

di temwarrit iṣebḥen

zeg uqemmum nnes.

Mecḥař iṣbeḥ wawař di řweqt nnes!

24 Abrid n tudart ineddeh

ɣar sennej i ufehham,

maḥend netta ad iḥeyyed

x řaxart swadday.

25 Taddart n bu-nnfaxet

ad tt iqřeɛ SIDI,

maca aymir n yeyyar n tajjač

issemtan i-t Netta. [p]

26 Ixemmimen n uɛeffan d nnɛi i SIDI,

maca awařen icewwaren d imezdagen. [q]

27 Wenni yarezzun x arbeḥ

iɣeṭṭeř taddart nnes di arrẓiyyet,

maca wenni icarrhen tarzifin, ad iddar. [r]

28 Uř n imseggaden ittxarraṣ

maḥend ad dd-yarr,

maca aqemmum n iɛeffanen

ittfeyyeḍ s řɣar.

29 Iggʷej SIDI x iɛeffanen,

maca taẓaǧit n imseggaden ittesřa as. [s]

30 Tafawt di tiṭṭawin tessfarreḥ uř,

řexbar aṣebḥan issyuma iɣsan. [t]

31 Amezzuɣ ittesřan

ɣar uwebbex i tudart,

ad issens di řwesṭ n imiɣisen.

32 Wenni ineṭṭaren ttarbiyyet,

isseḥqara ixef nnes,

maca wenni ittesřan ɣar uwebbex,

issyawan uř nnes. [u]

33 Tiggʷudi n SIDI d ttarbiyyet ɣar tiɣit,

u awaḍeɛ ittizwar i ccan. [v]