Ayub 26

Tamwarrit n Ayub x Bildad: Řemɣaret n Arebbi

1 Xas uca yarra-dd Ayub, inna:

2 Mammec teggid tewcid afus

i wenni war ɣar iǧi jjehd,

mammec tbedded ɣar uɣiř

n wenni war ɣar teǧi tzemmar!

3 Zeɛma aqa tewcid aweṣṣi isebḥen

i wenni war ɣar teǧi tiɣit,

mammec i tessargbed aṭṭas n twařawin

mummu n tmesřact!

4 I umi tɛawded řexxu awařen nnec?

Man nnefs dd-iffɣen zzayek?

5 Řexyařat n imettan fessyen

sadu waman d imezdaɣ nsen.

6 D aɛaryan tezzeř zzates řaxart,

war din teǧi tqebbart i tesraft n uhellek. [a]

7 Ibezzeɛ ajenna di ccamal

tiwa řxawi n wudem n waman,

yuyeř tammurt ɣar walu. [b]

8 Netta ittcedda aman deg iseynuten nnes,

maca war ittareẓẓi aseynu swadday.

9 Issdurruy udem n řɛarc nnes,

ittbezzaɛ xas aseynu nnes. [c]

10 Yarcem taquract x wudem n waman,

ař tma n tfawt ak-d taǧest. [d]

11 Ipilaren n ujenna ttarjijin,

ttnexřaɛen zeg uweddeb nnes.

12 S jjehd nnes isshaj řebḥar,

s řefhamet nnes iřbez Rahab. [e]

13 S Arruḥ nnes ittissiq ujenna

am wudem n tenni war ittřeḥḥifen,

afus nnes issnuqqeb

afiɣar itteḥřuǧuḍen s tazřa. [f]

14 Xzar, man aya waha

ixef n ibriden nnes,

nesřa mɣir taḥessect

n ca n wawařen zzayes.

Wi izemmaren xenni

ad issen ajjaj n jjhed nnes?