1 S uyenni ittxeṣṣa aneɣ ad newc taynit ktar i min nesřa, ḥima war nᵉtteffeɣ zeg webrid. 2 Minzi, mařa awař i innan lmalakat tuɣa tbedd u marra wi t isřin, maca iɛdu xas, aqa ittwaxeǧeṣ s řḥeqq, [a] 3 mammec i ɣa negg ad narweř neccin, mařa nesseḥqara timesřayin i iǧan d Tudart i neccin, timesřayin i xef tuɣa issawař Siditneɣ ɣar umezwaru, uca xenni ttwaḍemnent aneɣ zeg yinni jaraneɣ i tuɣa tent zzayes isřin, [b] 4 umi AREBBI iched akidsen s řeɛřamat d lmuɛjizat d řeɛjayeb ifarzen u s tmewci n Arruḥ Iqeddsen, tinni immewcen am mammec ixs Netta. [c] 5 Minzi war issars ca zzman i dd ɣa yasen x tenni nessiweř, sadu řumur n lmalakat, 6 maca am mammec cehhdent u qqarent Tira Iqeddsen:

“Min iɛna bnadem,

aqa Cek i dayes ittxarraṣen,

u min iɛna Mmis n bnadem,

aqa Cek i dayes itthillan? [d]

7 Cek teggid t cwayt sadu lmalakat,

teggid as aɛuǧi d ccan x uxeǧif nnes,

tewcid as ṣṣulṭa x řexdayem n ifassen nnec. [e]

8 Aqa marra timesřayin teggid tent

sadu iḍaren nnes.”

Umi igga marra timesřayin sadu Netta, aqa war ijji walu war t iggi sadu Netta. Maca řexxu war nẓar ɛad marra ittwagg sadu Netta, [f] 9 maca nettwařa belli Netta, aqa-t d Yasuɛ, tuɣa ittwagg cwayt sadu lmalakat di ssibbet n uweddeb n řmewt nnes, nettwařa i-t s ttaj n uɛuǧi d ccan x uzeǧif nnes, maɣar AREBBI iqqas řmewt i marra iwdan ɛlaḥsab arḍa nnes. [g]

10 Minzi tuɣa ittřiq as i Netta s Wenni u i Wenni ǧant marra tmesřayin - Netta d Wenni i dd-ittawyen aṭṭas n iḥenjiren ɣar uɛuǧi - maḥend ad ikemmeř Uzeǧif n Tudart nsen s uweddeb nnes. 11 Minzi d Wenni issqeddsen d yinni ittwaqeddsen, nitni marra d ijjen. S uyenni Netta war iseḍḥi ca ad asen iřaɣa awmaten nnes, [h] 12 umi inna:

“Ad barrḥeɣ i wawmaten inu s Yisem nnec,

di řwesṭ n tmesmunt ad Cek ṣebbḥeɣ.” [i]

13 Uca ɛawed:

“Necc ad dayes ttiqqeɣ!”

Uca ɛawed:

“Aqa da, Necc d tarwa i d ayi iwca AREBBI.” [j]

14 Minzi tarwa carcen deg weysum d idammen, uřa d Netta icarc ammu kifkif di man aya, ḥima ad ibeṭṭeř s řmewt nnes wenni ɣar teǧa ṣṣulṭa x řmewt, aqa netta d cciṭan, [k] 15 uca xenni ad ifekk inni isseɛddun qaɛ tudart nsen am isemɣan zi tiggʷudi n řmewt. [l] 16 Minzi řmewt war ɣares teǧi ṣṣulṭa x lmalakat, maca řmewt ɣares ṣṣulṭa x zzariɛet n Ibrahim. 17 S uyenni tuɣa ittxeṣṣa as ad idweř am wawmaten nnes zi marra iɣezdisen, ḥima ad idweř d Arrays n ikehhanen arḥim d amtiqqi di min iǧan i AREBBI, uca ad yiři břa řɛib zi jjihet n ddnub n řgens. [m] 18 Minzi min di tuɣa Netta simant nnes iweddeb u ittwajarreb, aqa izemmar ad iɛawen inni ittwajarrben. [n]