Iɛibraniyyen

1 Deg wussan iɛdun issiweř AREBBI di kuř řweqt u deg waṭṭas n ibriden ak-d řejdud nneɣ s inabiyyen. 2 Deg wussan-a ineggura aqa issiweř-dd akidneɣ s Mmis, wenni igga d Awrit n kuřci, s Wenni ɛawed igga zzmanat. [a] 3 Minzi Netta d talellect n uɛuǧi nnes uřa d tteswirt n Simant nnes, u Netta d wenni yarebbun marra timesřayin s jjehd n Wawař nnes. Aqa Netta issizdeg ddnub nneɣ di ṭṭbiɛet n Yixef nnes, uca iruḥ iqqim ɣar yefus n Lɛaḍim di řuɛřa. [b] 4 Netta yuɛřa aṭṭas x lmalakat am Isem i iṭṭef d řwart, aqa icna x wenni nsen.

5 Minzi i man ten zi lmalakat inna AREBBI:

“Mmi i teǧid Cek,

ass-a Necc jjiɣ-dd Cek!”,

uca ɛawed inna:

“Necc ad as iřiɣ d Babas

u Netta ad ayi yiři d Mmi”? [c]

6 Uca xenni xmi dd-issidef Amenzu ɣar ddunect, inna:

“Ad as sejdent marra lmalakat n AREBBI.” [d]

7 Maca x lmalakat inna:

“Netta igga lmalakat nnes d isemmiḍen,

uca imsexxaren nnes

d ict n tmessi itteḥduduqen”, [e]

8 Maca x Mmis:

“Řɛarc nnec, a AREBBI,

aqa iǧa i řebda qaɛ.

Azeǧaḍ n Tgeldit nnec,

aqa-tt d azeǧaḍ iseggden. [f]

9 Aqa texsed tasegda, tcarhed řɣar.

S uyenni aqa idhen i c

AREBBI, AREBBI nnec,

s zzect n řefraḥet

sennej i imɛacaren nnec.” [g]

10 Uca xenni:

“Zeg ubeddu teggid Cek dsas n temmurt,

ijenwan ǧan d řxedmet n ifassen nnec. [h]

11 Ina ad ttwateḥḥan, maca Cek ad tdumed,

uca ina marra ad arcan am warruḍ. [i]

12 Amecnaw ijj n useřham ad ten ttḍefsed.

Ad ttwabeddřen am warruḍ,

maca Cek ad tiřid d wenni

uca iseggʷusa nnec war qeṭṭin ca.” [j]

13 Maca i man ten zi lmalakat inna ijj n wass:

“Qqim ɣar yefus inu

ař d ɣa ggeɣ řɛedyan nnec

d tanebdat sadu iḍaren nnec”? [k]

14 Ma war ǧint nitenti d arruḥat i tsexxart, ttwassekkent-i-dd ḥima ad sexxarent i yinni ɣa iwarten Tudart?