1 Ejj ad teqqim tayri n tawmat jar awem. [a] 2 War tᵉttum ca ad tiřim tecnam ak-d ibarraniyyen, aqa zeɛma s uya areḥḥben ca s lmalakat am war ssinen. [b]

3 Xarrṣem deg imeḥbas axmi kenniw ḥebbsem akidsen, xarrṣem deg inni ittwaḥsaren, am iwdan am kenniw, inni yarḍen aysum n arrimet. [c]

4 Ejj ad yiři řemřac d aweqqar ɣar marra, d qama nsen n řemřac d amezdag, maca AREBBI ad iḥkem x ayt n farq-ccɣeř u x yinni itteggen zzina.

5 War tteggem nneyyet nwem di tenɛacin, maca qenɛem s min ɣarwem, minzi SIDI inna:

“Necc war cek ttejjiɣ

niɣ ad semmḥeɣ deg ufus nnec.” [d]

6 Man aya ittwanna i neccin, maḥend ad nini s teryast:

“Sidi d Amɛawen inu, war tteggʷdeɣ ca,

min d ayi ɣa yegg bnadem?” [e]

7 Ɛeqřem x imgewwaden nwem, inni d awem issiwřen awař n AREBBI. Beqqcem řɣiǧet n tecri nsen uca ḍfarem l’iman nsen. [f]

8 Yasuɛ Lmasiḥ d Netta Netta iḍennaḍ d yiḍa, u i řebda.

9 War tejjim ad kenniw ɣarren s tɣuriwin ittbeddařen n deɣya, minzi řḥajjet n lemliḥ mařa cebbaren wuřawen nneɣ di arḍa, war iǧi di macca, minzi inni tuɣa dayes yeřhan, war dayes ufin bu nnfeɛ. [g] 10 Ɣarneɣ ijj n uɛalṭar i umi war iɛeddeř ad zzayes ccen inni ittsexxaren di Tzeddiɣt. 11 Minzi zeg imuddaren, inni idammen nsen ttwaksin ɣar Zzawect Iqeddsen s ufus n arrays n ikehhanen, ittwassarɣ weysum nsen barra i řmargeḥ. [h]  [i] 12 S uyenni tuɣa Yasuɛ imarret ɛawed barra i tendint, ḥima ad issqeddes řgens s Idammen nnes. [j] 13 S uyenni ejj aneɣ ad neffeɣ ɣar barra n řmargeḥ, am narebbu řɛar nnes. 14 Minzi war ɣarneɣ da tandint n řebda, maca narezzu x tenni i dd ɣa yasen. [k]

15 Ejj aneɣ řebda ad zzayes nqeddem tiwhibin n usemɣar i AREBBI, řɣiǧet n iyencicen nni dd-ittwayen aqadi i Yisem nnes. [l] 16 War ttᵉttum ca arreḥmet uřa d tecrimet i imeẓřaḍ, minzi s tewhibin-a ad yarḍa bnadem AREBBI. [m]

17 Iřim d imtiqqan i yinni i kenniw ittgewwaden, ṭaɛem asen, minzi nitni ttɛessan x řeɛmur nwem am yinni itteggen řeḥsab xawem, ḥima ad tt ggen s řefraḥet, war iǧi s uweḥweḥ, minzi man aya war kenniw ineffeɛ. [n]

18 Ẓaǧem xaneɣ, minzi ɣarney ttiqqet belli ɣarneɣ tanefsect tecna, am dayneɣ meẓri, ḥima ad nuyur nican di marra. 19 Ttzawgeɣ kenniw s jjehd ad teggem ammu ɣar umezwaru, ḥima xenni necc deɣya ad ɣarwem dd-dewřeɣ.

20 AREBBI n řehna wenni dd-issnekkaren Ameksaw Ameqqran n wuǧi, Yasuɛ Lmasiḥ, Siditneɣ, zi taddart n imettinen s Idammen n Řɛahd i řebda, [o] 21 ad kenniw ikemmeř di kuř řxedmet icnan, ḥima ad teggem min ixs Netta. Netta ad dayneɣ igg min iǧan i arḍa nnes s Yasuɛ Lmasiḥ wenni ɣar iǧa uɛuǧi i řebda qaɛ. Amin. [p]

22 Xenni ttzawageɣ zzaywem, a aytma inu, qebřem awař-a n usejjeɛ s ttasiɛ n řxaḍar, minzi uriɣ awem-dd s drus.

23 Snem aqa arxun i umatneɣ Timutiyu. Mařa yusa-dd deɣya, ad kenniw ẓareɣ akides.

24 Seǧmem x marra inni i kenniw ittgewwaden s řeḥna u x marra imqeddasen. Marra awmaten n Iṭalya ttseǧamen-dd xawem s řehna.

25 Arḍa ad kidwem yiři marra. Amin.

<- Iɛibraniyyen 12