1 S uya neccin ɛawed, umi d aneɣ dd-nnḍen marra řechud-a am iseynuten, ad nenḍar marra ddqeř n ddenb i d aneɣ dd-isswejden i řebda. Ejj aneɣ ad nuyur s ṣṣbar amḥizwar nni xaneɣ dd-immarsen. [a] 2 Ejj aneɣ ad nenḍar tiṭṭawin di Yasuɛ, Amgewwad d Umkemmeř n l’iman nneɣ, wenni, zi ssibbet n řefraḥet i ɣares, yarbu ṣṣalib, war t icqi ubehdeř, uca iqqim x yefus n řɛarc n AREBBI. [b]  [c] 3 Xzarem mliḥ, mecḥař i iksi Netta zeg imednab, inni d iɣrimen n řeɛmar n yixef nsen, ḥima war tᵉttiḥřem u war tarexxum ca di řeɛmar nwem. 4 Aqa kenniw, war truḥem ca tiggʷejem ak-d ddenb, war temmɛařim ca ař usizzeř n idammen nwem. [d] 5 Tᵉttum taɣuri i xawem issawařen am iḥenjiren:

“Mmi inu, war ttegg ca s weɛrur

x ttarbiyyet n SIDI,

war ttiři ca d amarxu di řeɛmar nnec,

xmi ɣa tᵉttwawebbxed zzayes. [e]

6 Minzi wenni ittexs SIDI,

yarebba i-t s uqessaḥ,

uca iḥenjiren nnes i xas iɛizzen,

iksi ten kuř ijj zzaysen ɣar uɣezdis.” [f]

7 X uya, ksim ttarbiyyet, minzi AREBBI ittegg awem am iḥenjiren nnes. Minzi man mmis wenni babas war t yarebbi ca s uqessaḥ? 8 Mařa aqa kenniw břa ttarbiyyet i di carcen marra, řexdenni kenniw am ibarraniyyen i teǧam, war iǧi d arrawen. 9 Mařa neksi ttarbiyyet zi babatneɣ ɛlaḥsab arrimet uca nweqqar i-ten, mecḥař d aneɣ ittxeṣṣa ad nṭaɛ i Babatneɣ n arruḥat, ḥima ad neddar! 10 Minzi nitni webbxen aneɣ ca n wussan am mammec d asen ittɣiř mliḥ, maca AREBBI igga i-tt i tizi nneɣ, ḥima ad ncarc di tqeddast nnes. 11 Aqa war din uřa d ict n ttarbiyyet s uqessaḥ i ittbanen d řefraḥet deɣya, maca d řeḥriq, maca awarni as tiwi-dd řɣiǧet n řehna d tsegda i yinni zzayes ittwadarrben.

12 S uyenni, sjehdem ifassen nwem yarxun d ifadden nwem yarehfen, [g] 13 uca ggem nican iṣuraf n iḍaren nwem, ḥima min iǧan d aqejdaḥ war ittefriɣ ca, maca ad iggenfa.

14 Ḍfarem-dd řehna d tuqeddsi ak-d marra, tenni břa zzayes war iẓar ḥed Siditneɣ. [h] 15 Ɣarwem aqa uřa d ijj jar awem ad ittwaf inqeṣ as arḍa n AREBBI, niɣ aqa ad iɣmi weẓwar n tarzugi, ad kenniw iḍarr uca xenni ad zzayes ttwaxemjen aṭṭas, [i] 16 uca ḥḍam, aqa war ittwiffi ḥed jar awem wenni d bu-farq-ccɣeř niɣ d ameqjuḥ am Ɛisu nni izzenzen řḥeqq n umenzu nnes x ijj n macca. [j] 17 Minzi aqa tessnem, belli awarni man aya tuɣa yarezzu ɛad ad iwart lbaraka, maca yugi as, maɣar war yufi ca ttasiɛ i weɛdař, waxxa yarezzu t s imeṭṭawen. [k]

18 Minzi kenniw war tiwiḍem ca ɣar tmessi yarɣin niɣ ɣar wedrar i nzemmar ad nḥada, uřa ɣar tayyut tbarcant d tḥaryaḍt, [l] 19 niɣ ɣar zzhir n uṣudi deg uyicc n icarri uřa ɣar řḥess n wawařen di ssibbet nsen zawgen inni d as isřin, maḥend war ten kisen issiwiř ɛad. [m] 20 S minzi war zemmaren x ddqeř n tweṣṣa, minzi mařa iqarreb-dd mɣir ijj n umuddar adrar, ad ittwarjem netta. [n]  [o] 21 Min ẓrin tuɣa issaggʷad aṭṭas, ařami inna Musa: “Aqa ggʷedeɣ u ttarjijiɣ!” [p]

22 Maca kenniw tiwḍem ɣar wedrar n Ṣihyun, ɣar Tendint n AREBBI iddaren, ɣar Urcalim nni iǧan deg ijenwan u ɣar tmesmunt n ɛecra n řuřufat n lmalakat, [q] 23 ɣar tmesmunt n imenza, inni ittwazemmemen deg ijenwan, u ɣar AREBBI, Řqaḍi x marra u ɣar arruḥat n imseggaden nni iwḍen ɣar řekmaret, [r] 24 u ɣar Yasuɛ, Lwasit n Řɛahd n Jdid, u ɣar urucci s Idammen nnes, inni issawařen ḥsen zeg inni n Habil. [s]

25 Ɣarwem war tagim ca x Wenni akidwem issawařen, minzi mařa inni war ittwassnejmen ugin Wenni kidsen issawařen di temmurt, mahu ɛad neccin, mařa nḥeyyed x Wenni akidneɣ issawařen zeg ijenwan, [t] 26 Wenni tuɣa tmijja nnes tessenhezza tammurt, maca Wenni řexxu iwaɛd, inna:

“Ad ssenhezzeɣ ɛawed ict n twařa,

war iǧi tammurt waha, aqa uřa d ajenna.” [u]

27 Awař-a: ‘Ict n twařa!’, aqa imřa belli ad ittwakkes min ittenhezzan, minzi man aya ittwagg, ḥima ad qqiment tmesřayin war ttenhezzint. 28 S uya, minzi ad neṭṭef tageldit yarekknen, ejj aneɣ ad neqqim nᵉtteṭṭef di arḍa i zi nettsexxar i AREBBI u nessarḍa i-t s uweqqar d tiggʷudi, [v] 29 minzi AREBBI nneɣ d ict n timessi ittetten. [w]