1 Kenniw, a aytbab, ggem s uweqqar d tsegda ak-d imsexxaren nwem. Snem, belli kenniw ɣarwem ɛawed Sidi deg ujenna. [a]

2 Ṣbarem di tẓaǧit, ḥḍam dayes u wcem aqadi i Arebbi. [b] 3 Ẓaǧem ɛawed i neccin, ḥima AREBBI ad aneɣ yarzem tawwart n Wawař, ḥima ad nessiweř x ssirr n Lmasiḥ, wenni umi ǧiɣ ɛawed d ameḥbus di ssnaseř, [c] 4 ḥima ad t ssaregbeɣ uca ad zzayes ssiwřeɣ nican am mammec i xafi icuwwar.

5 Uyurem di tiɣit ak-d yinni n barra, arebḥem řweqt i yeǧan. [d] 6 Ad yiři wawař nwem řebda s řxaḍar, meǧḥem t s tmeǧaḥt, u ssnem min zi ɣa dd-tarrem nican x kuř ijjen. [e]

7 Ticikus, uma iɛizzen d umsexxar amtiqqi, wenni d amsexxar amɛacar nneɣ di SIDI, ad kenniw issargeb x umeddur inu. [f] 8 Ssekkeɣ t ɣarwem, ḥima ad issen mammec teǧam u ḥima ad issareyyeḥ uřawen nwem, 9 jmiɛ ak-d Unisimus, umatneɣ amtiqqi iɛizzen, wenni iǧan d ijjen zzaywem. Nitni ad kenniw ssaregben mammec neǧa neccin. [g]

10 Aristarxus wenni di řeḥbes akidi, ittseǧam-dd xawem s řehna, am mammec xawem ittseǧam uřa d Markus, ayyaw n Bar-Naba wenni x teksim kenniw tiweṣṣa - mařa yusa-dd ɣarwem, qebřem t - [h] 11 d Yasuɛ, umi d as qqaren Yustus. Nitni ǧan zeg wextan. Nitni weḥḥedsen ɛawnen ayi di tmesřact n Tgeldit n AREBBI uca ssfewwjen ayi.

12 Ittseǧam-dd xawem Ipafras s řehna. Netta d ijjen zzaywem, aqa-t d amsexxar n Lmasiḥ, ittedɛa awem řebda di tẓaǧit nnes s jjehd, ḥima ad tbeddem nican, ad tiřim tkemmřen di marra min ixs AREBBI. [i] 13 Minzi cehhdeɣ xas, aqa netta aṭṭas i xawem iksi uřa x yinni di Layudikiya d yinni di Hirapulis.

14 Luka, aḍbib nneɣ iɛizzen, d Dimas ttseǧamen-dd xawem s řehna. [j]

15 Seǧmem x wawmaten inni iǧan di Layudikiya s řehna, x Nimfas u x tmesmunt di taddart nnes.

16 Xmi ɣa tᵉttwassɣar tebrat-a jar awem, xenni ḥḍam ad tᵉttwassɣar ɛawed di tmesmunt n Layudikiya uca ad tɣarem kenniw ɛawed tenni zi Layudikiya.

17 Ini i Arxippus: “Ḥḍa ad tkemmřed řxedmet n tsexxart i teksid zi Siditneɣ!”

18 Sřam wanita uriɣ t s ufus inu, zi Bulus. Ɛeqřem x ssnaseř inu. Ad kiwem yiři arḍa. Amin. [k]

<- Ikulusiyyen 3