1 Mařa tᵉttwassnekkarem-dd ak-d Lmasiḥ, xenni arzum min iǧan sennej, mani iqqim Lmasiḥ x ufusi n AREBBI. [a] 2 Ɛeqřem min iǧan sennej, war iǧi min iǧan di temmurt, 3 minzi kenniw aqa temmutem uca tudart nwem tennuffar ak-d Lmasiḥ di AREBBI. [b] 4 Xmi dd ɣa iḍhar Lmasiḥ, wenni iǧan d Tudart nneɣ, řexdenni uřa d kenniw ad kides dd-teḍharem deg uɛuǧi. [c]

5 S uyenni nɣem iɣezdisen n arrimet nwem inni x temmurt: farq-ccɣeř, řexmej, acahi, nnecwat tiɛeffanin d ṭṭmeɛ, wenni d aɛbad i l’aṣnam, [d] 6 s minzi ad dd-yas weɣḍab n AREBBI x ayt n řmuɛṣiyyet. [e] 7 Uřa d kenniw tuɣa teggurem ammu zic, umi kenniw tuɣa teddarem ɛad di tmesřayin nni. [f] 8 Maca řexxu, sarsem man aya marra x uɣezdis: aɣḍab d tefqeḥt d tuɛeffna d uceqqef d řhard ixmej. [g] 9 War sxarriqem ca x wayawya, maca sarsem ɣar uɣezdis bnadem aqdim ak-d marra ibriden nnes, [h] 10 u tyarrḍem bnadem n jdid, wenni iddekkwařen jdid s tussna zzayes Netta, ɣar ṣṣifet n Wenni i-t-i-dd-ixeřqen. [i] 11 Dayes war iǧi Wuday řa d Arami, řa d axtan, řa břa axtan, řa d Ayunaniy, řa řbarrani, řa d ismeɣ uřa d ḥurr, maca Lmasiḥ d kuřci u di kuř ijjen. [j]

12 X uyenni, kenniw, a imqeddasen d imɛizzen inni ittwafarzen zi AREBBI, arḍem s arreḥmet d řeḥnunect d řeḍrafet d uwaḍeɛ n arruḥ d temhint d ttasiɛ n řxaḍar. [k] 13 Qebřem u samḥem i wayawya. Mařa ca n yijjen ɣares acetci x wenni d as yudsen, ɣfarem kenniw ijj i wenneɣni, am mammec i d awem iɣfar Lmasiḥ. [l] 14 Uca ak-d marra aya, arnim tayri tenni d taxadent n řekmařet. [m]

15 Xenni ad iḥkem řehna n Lmasiḥ deg wuřawen nwem, řehna nni ɣar tᵉttwařaɣam deg ict n Arrimet, uca qadam i Lmasiḥ. 16 Jjem Awař nnes ad daywem izdeɣ s marra tiɣit. Sřemdem, sejjɛem ijj wenneɣni s uɣennej n izehhiden d tesbiḥ d izřan n Arruḥ, u ɣennjem i AREBBI s wuřawen nwem ccuren s arḍa. 17 Marra min tᵉtteggem s wawař niɣ s tmegga, ggem t s Yisem n Siditneɣ Yasuɛ Lmasiḥ u cekkarem zzayes AREBBI, Babatneɣ. [n]

18 A timɣarin, dewřent sadu iryazen nkent am mammec dd-ittas ak-d Lmasiḥ. [o]

19 A iryazen, xsem timɣarin nwem, war ttqesḥem daysent s tarzugi. [p]

20 A iḥenjiren, ṭaɛem i lwalidin nwem di marra, minzi man aya yareṭṭa i Siditneɣ. [q]

21 A lwalidin, war darracem ca iḥenjiren nwem, ḥima war d asen tᵉttraḥ teryast.

22 A imsexxaren, ṭaɛem i yinni iǧan d aytbab nwem di temmurt di marra, war ttsexxarem ca i tiṭṭawin n iwdan am yinni ixsen ad arḍan iwdan waha, maca sexxarem s řeṣfayet n wuř u zi tiggʷudi n SIDI. [r] 23 Qaɛ min ɣa teggem, ggem t s marra řeɛmar nwem, ggem t axmi i Siditneɣ, war iǧi i iwdan. 24 Snem aqa ad teksim řexřaṣ zi Siditneɣ di řwart, maɣar tᵉttsexxarem i SIDI, Lmasiḥ. 25 Minzi wenni itteggen řɣecc, ad ittwaxřef ɛlaḥsab řɣecc i yegga, minzi war din iǧi řfarz n bnadem.