1 قَّارغْ ثِيذتّْ ذِي لْمَاسِيحْ، وَارْ سّْخَارِّيقغْ شَا، ؤُشَا ثَانفْسشْثْ إِنُو ثْشهّذْ ذَايِي س أَرُّوحْ إِقدّْسنْ، [a] 2 بلِّي غَارِي أَشْضَانْ إِمْغَارْ ذ ڒحْرِيقْ وَارْ إِتّْبذِّي ذڭْ وُوڒْ إِنُو. 3 ثُوغَا تّْژَادْجِيغْ معْلِيكْ ؤُفِيغْ تّْوَاحَارّْمغْ ذِي مُومُّو إِنُو خْ لْمَاسِيحْ س إِشْثْ نّعْڒثْ ذِي طّْوعْ ن وَاوْمَاثنْ إِنُو، ڒَادْجْ إِنُو زِي جِّيهثْ ن ويْسُومْ ن أَرِّيمثْ. [b] 4 أَرَّاونْ ن إِسْرَائِيل، إِنِّي إِتّْوَاقبْڒنْ ذ مِّيسْ. غَارْسنْ إِ يدْجَا ؤُعُودْجِي، ڒْعُوهُوذْ، شَّارِيعَا، ثَاسخَّارْثْ إِ إِدْجَانْ ذِي زَّاوشْثْ إِقدّْسنْ إِ غَارسْ د-إِقّْننْ، لْوُوعُوذْ ذ ڒجْذُوذْ. [c] 5 زَّايْسنْ إِ د-إِبَانْ لْمَاسِيحْ خْ وبْرِيذْ ن ويْسُومْ ن أَرِّيمثْ ونِّي ذ أَربِّي خْ مَارَّا. إِ نتَّا إِ غَا يِيڒِي مَارَّا أَسمْغَارْ ذ مَارَّا لْبَارَاكَا إِ ڒبْذَا قَاعْ. أَمِينْ! [d]

6 مَاشَا وَارْ إِدْجِي أَڒَامِي أَوَاڒْ ن أَربِّي وَارْ يِيوِيضْ، مِينْزِي مَارَّا إِنِّي زِي إِسْرَائِيل وَارْ دْجِينْ شَا ذ إِسْرَائِيل. [e] 7 ؤُشَا ؤُڒَا ذ مَارَّا نِيثْنِي وَارْ دْجِينْ شَا ذ ثَارْوَا ن إِبْرَاهِيمْ، مِينْزِي نِيثْنِي زِي زَّارِيعثْ ن إِبْرَاهِيمْ، مِينْزِي إِتّْوَانَّا: ”ذِي إِسْحَاقْ أَذْ أَشْ ڒَاغَانْ زَّارِيعثْ.“ [f] 8 مَانْ أَيَا وَارْ إِخْسْ أَذْ يِينِي أَقَا ثَارْوَا عْلَاحْصَابْ جَّاذِيرَا ن أَرِّيمثْ أَقَا-ثنْ ذ ثَارْوَا ن أَربِّي، مَاشَا ثَارْوَا ن لْوَاعْذْ أَذْ تّْوَاحسْبنْ ذ زَّارِيعثْ. [g] 9 مِينْزِي أَوَاڒْ ن لْوَاعْذْ ذ وَا:

”غَارْ ڒْوقْثْ-أَ أَذْ د-أَسغْ

ؤُشَا أَذْ غَارسْ يِيڒِي غَارْ سَارَا مِّيسْ!“ [h]

10 مَانْ أَيَا وَارْ إِدْجِي وَاهَا ذِي ثْمسْڒَاشْثْ ن سَارَا، مَاشَا ؤُڒَا ذِي ثْمسْڒَاشْثْ ن رِيفْقَا، ؤُمِي ثْمُونْ أَكْ-ذ ؤُينِّي ن بْنَاذمْ نِّي، جذِّيثغْ إِسْحَاقْ، [i] 11 ثُوغَا ثِيزَّارْ ثتّْوَاسّنْ ڒِيخْضَارثْ ن أَربِّي ؤُمِي ثُوغَا عَاذْ وَارْ د-خْڒِيقنْ إِحنْجِيرنْ نّسْ، وَارْ زمَّارنْ أَذْ ڭّنْ عَاذْ ڒْخَارْ نِيغْ ڒْغَارْ، حِيمَا وَارْ ثتِّيڒِي ثْمسْڒَاشْثْ ذڭْ وبْرِيذْ ن ڒخْذَايمْ، مَاشَا ذڭْ وبْرِيذْ ن ونِّي إِتّْڒَاغَانْ. 12 مَاغَارْ إِتّْوَانَّا إِ رِيفْقَا:

”أَقَا أَمقّْرَانْ أَذْ إِسخَّارْ إِ ؤُمژْيَانْ!“، [j]

13 أَمْ مَامّشْ ثُورَا:

”يَاعْقُوبْ إِ خْسغْ، مَاشَا شَارْهغْ إِسُو.“ [k]

14 مِينْ غَا نِينِي خنِّي؟ مَا إِقدّْ أَذْ يِيڒِي غَارْ أَربِّي مِينْ وَارْ إِسڭّْذنْ؟عمَّارْصْ! [l] 15 خْزَارْ، نتَّا إِنَّا عَاوذْ إِ مُوسَا:

”أَذْ أَرحْمغْ وِي خْسغْ أَذْ أَرحْمغْ،

ؤُشَا أَذْ حِينّغْ خْ وِي خْسغْ أَذْ حِينّغْ.“ [m]

16 خنِّي ثَامسْڒَاشْثْ وَارْ ثقِّيمْ شَا غَارْ وِي إِتّخْسنْ ؤُڒَا غَارْ وِي إِتَّازّْڒنْ، مَاشَا غَارْ أَربِّي ونِّي يَارحّْمنْ. 17 مِينْزِي عْلَاحْسَابْ ثِيرَا إِقدّْسنْ إِنَّا نتَّا إِ فِيرْعُونْ:

”أَقَا إِ مَانْ أَيَا سّْنكَّارغْ-د شكْ،

حِيمَا أَذْ زَّايكْ سّشْنغْ جّهْذْ إِنُو،

ؤُشَا أَذْ إِتّْوَابَارّحْ إِسمْ إِنُو

ذِي مَارَّا دُّونشْثْ.“ [n]

18 خنِّي نتَّا أَذْ يَارْحمْ وِي إِخْسْ، ؤُشَا أَذْ إِسّقْسحْ وِي إِخْسْ.

19 إِوَا، أَذْ ثَاغْ أَذْ ثِينِيذْ: مَايمِّي إِتّْشثْشَا عَاذْ، مِينْزِي وِي غَا إِمّْعَاڒَانْ أَكْ-ذ مِينْ إِخْسْ نتَّا؟ 20 مَاشَا مِينْ ثعْنِيذْ شكْ، أَ بْنَاذمْ، ونِّي إِتّْقَاشَاحنْ أَربِّي؟ مَا مِينْ إِتّْوَاڭّنْ إِزمَّارْ أَذْ إِنِي إِ ونِّي ث إِڭِّينْ: ”مَايمِّي ذ أَيِي ثڭِّيذْ أَمُّو؟“ [o] 21 مَا وَارْ إِدْجِي غَارْ بُو-ثْڒَاخْثْ صُّولْطَا خْ ثْڒَاخْثْ حِيمَا أَذْ إِڭّْ زڭْ إِشْثْ ن ڒْعجْنثْ إِشْثْ ن ڒْقشْعثْ إِ لْكَارَامَا ؤُ ونّغْنِي إِ ؤُبهْذڒْ؟ [p] 22 مَاغَارْ أَربِّي، ونِّي ثُوغَا إِخْسْ أَذْ إِسّْشنْ أَغْضَابْ نّسْ ذ جّهْذْ نّسْ، إِسِّيوضْ لْغَاضَابْ نّسْ س وَاطَّاسْ ن تَّاسِيعْ ن ڒْخَاضَارْ خْ ڒقْشُوعْ ن وغْضَابْ إِنِّي إِتّْوَاسّْوجْذنْ مَارَّا إِ ؤُهلّكْ، 23 ؤُشَا إِفَارْغْ ثَايْرِي نّسْ خْ ڒقْشُوعْ ن أَرّحْمثْ إِنِّي إِزْوَارْ إِسّوْجذْ إِ-ثنْ إِ ؤُعُودْجِي إِ أَربِّي! 24 مَاغَارْ نشِّينْ ذ إِنِّي إِتّْوَاڒَاغَانْ، وَارْ إِدْجِي زڭْ وُوذَاينْ وَاهَا، مَاشَا عَاوذْ زِي ڒڭْنُوسْ. 25 أَمْ مَامّشْ إِتّْوَانَّا عَاوذْ ذِي حُوشِيعَا:

”أَذْ سمِّيغْ إِ يِينِّي وَارْ إِدْجِينْ ذ ڒْڭنْسْ إِنُو

’ڒْڭنْسْ إِنُو!‘،

ؤُشَا إِ يِينِّي وَارْ إِدْجِينْ ذ أَمْعِيزّْ ذ ’أَمْعِيزّْ!‘ “ [q]

26 أَذْ يِيڒِي ذڭْ ومْشَانْ مَانِي ذ أَسنْ إِتّْوَاڒَاغَا:

’وَارْ إِدْجِي ذ ڒْڭنْسْ إِنُو!‘،

بلِّي ذِينِّي أَذْ أَسنْ ڒَاغَانْ:

’أَرَّاونْ ن أَربِّي إِدَّارنْ!‘ [r]

27 مَاشَا إِشَاعْيَا إِبَارّحْ زِي جِّيهثْ ن أَيْثْ ن إِسْرَائِيل:

”مَاڒَا ثُوغَا ڒْقدّْ ن أَيْثْ ن إِسْرَائِيل

أَنشْثْ ن إِجْذِي ن ڒبْحَارْ،

مْغِيرْ مِينْ إِ غَا إِقِّيمنْ أَذْ إِنْجمْ.“ [s]

28 ”ثَامسْڒَاشْثْ ثْبدّْ نِيشَانْ ؤُ أَذْ ثتّْوَاقْفڒْ،

سِيذِي أَذْ ت إِڭّْ خْ ثمُّورْثْ.“ [t]

29 أَمْ مَامّشْ إِزْوَارْ إِشَاعْيَا إِنَّا:

”مَاعْلِيكْ سِيذِي ن ڒْعسْكَارَاثْ وَارْ ذ أَنغْ إِجِّي

إِنِّي إِقِّيمنْ دَّارنْ،

إِڒِي نذْوڒْ أَمْ سَاذُومْ ؤُ نَارْوسْ ذِي عَامُورَّا.“ [u]

30 مِينْ غَا نِينِي خنِّي؟ مَا خنِّي ڒڭْنُوسْ إِنِّي وَارْ يَارزُّونْ ثَاسڭْذَا، أَقَا كْسِينْ ثَاسڭْذَا؟ إِوَا، مَاشَا ثَاسڭْذَا ثنِّي س لْ-إِيمَانْ. 31 مَاشَا إِسْرَائِيل نِّي إِضفَّارنْ شَّارِيعَا ن ثْسڭْذَا، وَارْ يِيوِيضْ شَا غَارْ شَّارِيعَا ن ثْسڭْذَا. [v] 32 مَايمِّي؟ مِينْزِي ثَاسڭْذَا نِّي وَارْ ثدْجِي شَا زِي لْ-إِيمَانْ مَاشَا زِي ڒخْذَايمْ ن شَّارِيعَا، مِينْزِي نِيثْنِي نْذرْفنْ ذڭْ وژْرُو ن ؤُنذْرفْ، [w] 33 أَمْ مَامّشْ ثُورَا:

”أَقَا أَذْ ڭّغْ ذِي صِيهْيُونْ أَژْرُو إِ ؤُنذْرفْ

ذ وژْرُو إِ ؤُنقْرَاذْ.

مَارَّا وِي زَّايسْ إِ غَا يَامْننْ،

وَارْ إِتّْسضْحَا.“ [x]