1 هَالِّيلُو-يَاهْ!

صبّْحمْ إِسمْ ن سِيذِي،

صبّْحمْ خَاسْ، أَ إِمْسخَّارنْ ن سِيذِي،

2 كنِّيوْ إِنِّي إِبدّنْ ذِي ثَادَّارْثْ ن سِيذِي،

ذِي ڒمْرَاحَاثْ ن ثَادَّارْثْ ن أَربِّي نّغْ.

3 هَالِّيلُو-يَاهْ، مَاغَارْ سِيذِي إِصْبحْ،

زهّْذمْ إِ يِيسمْ نّسْ،

مَاغَارْ نتَّا ذ ڒضْرَافثْ.

4 مَاغَارْ سِيذِي إِفَارْزْ يَاعْقُوبْ إِ يِيخفْ نّسْ،

إِسْرَائِيل ذ أَڭْڒَا نّسْ. [a]

5 مَاغَارْ نشّْ سّْنغْ أَقَا سِيذِي ذ أَمقّْرَانْ،

سِيذِيثْنغْ ذ أَمقّْرَانْ خْ مَارَّا إِربِّيثنْ.

6 مَارَّا مِينْ ذ أَسْ إِتّعْجِيبنْ إِ سِيذِي، إِڭَّا إِ-ث،

ذڭْ إِجنْوَانْ ؤُ خْ ثمُّورْثْ،

ذِي ڒبْحُورْ ؤُ ذڭْ وَامَانْ إِهوْڒنْ مَارَّا.

7 نتَّا إِسّْڭعّذْ إِسيْنُوثنْ

زِي طّْرُوفَا ن ثمُّورْثْ،

نتَّا إِتّڭّْ أَسَّامنْ أَكْ-ذ ونْژَارْ،

إِتّْڭوَّاذْ أَسمِّيضْ

زِي ڒهْرِيثْ نّسْ غَارْ بَارَّا. [b]

8 نتَّا إِوْثَا إِمنْزَا ن مِيصْرَا،

زڭْ إِوْذَانْ أَڒْ ڒْمَارْ. [c]

9 نتَّا إِسّكّْ ڒعْڒَامَاثْ ذ لْمُوعْجِيزَاثْ

ذِي ڒْوسْطْ نّشْ، أَ مِيصْرَا،

غَارْ فِيرْعُونْ

ؤُ غَارْ مَارَّا إِمْسخَّارنْ نّسْ. [d]

10 نتَّا إِوْثَا أَطَّاسْ ن ڒڭْنُوسْ

ؤُ إِنْغَا إِجدْجِيذنْ إِجهْذنْ. [e]

11 سِيحُونْ، أَجدْجِيذْ ن إِمُورِييّنْ،

ؤُ عُوجْ، أَجدْجِيذْ ن بَاشَانْ،

ؤُ مَارَّا ثِيڭلْذِيوِينْ ن كنْعَانْ.

12 إِوْشَا أَسنْ ثَامُّورْثْ ذ ثَاسْغَارْثْ،

ذ ثَاسْغَارْثْ إِ إِسْرَائِيل، ڒْڭنْسْ نّسْ. [f]

13 أَ سِيذِي، إِسمْ نّشْ إِتّْغِيمَا إِ ڒبْذَا،

أَخَارّصْ ذَايكْ أَذْ يِيڒِي زِي جِّيڒْ أَڒْ جِّيڒْ. [g]

14 مَاغَارْ سِيذِي أَذْ يَارّْ ثَاسْغَارْثْ

غَارْ ڒْڭنْسْ نّسْ،

نتَّا أَذْ إِحِينّْ خْ إِمْسخَّارنْ نّسْ. [h]

15 ڒخْيَاڒَاثْ نْ لْ-أَصْنَامْ ن ڒڭْنُوسْ

أَقَا أَثنْثْ س نُّوقَارْثْ ذ وُورغْ،

تّْوَاڭّنْثْ س إِفَاسّنْ ن إِوْذَانْ.[i]

16 نِيثنْثِي غَارْسنْثْ إِجّْ ن ؤُقمُّومْ،

مَاشَا وَارْ سِّيوِيڒنْثْ،

غَارْسنْ ثِيطَّاوِينْ،

مَاشَا وَارْ تّْوِيڒِينْثْ،

17 نِيثنْثِي غَارْسنْ ثِيمزُّوغنْ،

مَاشَا وَارْ تّسْڒِينْثْ،

وَالُو أَسُوضِي ن نّفْسْ

ذڭْ ؤُقمُّونْ نْسنْ.

18 أَذْ ذوْڒنْ إِنِّي ثنْثْ إِڭِّينْ

أَمْ نِيثنْثِي،

مَارَّا وِي خَاسنْثْ إِتّْشَاڒْ.

19 أَ ثَادَّارْثْ ن إِسْرَائِيل، بَارْكمْ سِيذِي،

أَ ثَادَّارْثْ ن هَارُونْ، بَارْكمْ سِيذِي.

20 أَ ثَادَّارْثْ ن لَاوِي، بَارْكمْ سِيذِي!

أجّْ مَارَّا إِنِّي إِتّڭّْوذنْ سِيذِي،

أَذْ بَارْكنْ سِيذِي.

21 أَذْ إِتّْوَابَاركْ سِيذِي زِي صِيهْيُونْ،

نتَّا ذ ونِّي إِزدّْغنْ ذِي ؤُرْشَالِيمْ.

هَالِّيلُو-يَاهْ!