1 بْنَاذمْ غَارسْ إِخَارِّيصنْ

ذڭْ وُوڒْ نّسْ،

مَاشَا ثَامْوَارِّيثْ ن يِيڒسْ

ثتَّاسْ-د زِي سِيذِي. [a]

2 مَارَّا إِبْرِيذنْ ن ورْيَازْ

صْفَانْ ذِي ثِيطَّاوِينْ نّسْ،

مَاشَا سِيذِي إِتّْقدْجَابْ بُوحْبڒَاثْ. [b]

3 سَارْسْ ڒخْذَايمْ نّشْ إِ سِيذِي،

خنِّي أَذْ تّْوَاسّْمتّْننْ إِنْوَاينْ نّشْ. [c]

4 سِيذِي إِخْڒقْ-د مَارَّا إِ لْغَارَاضْ نّسْ،

عَاذْ ؤُڒَا ذ أَعفَّانْ إِڭَّا إِ-ث إِ وَاسّْ ن ڒْغَارْ.[d]

5 كُوڒْ أَمْعفَّارْ ذ نّْعِي إِ سِيذِي، أَفُوسْ خَاسْ،

نتَّا وَارْ إِتّتّْوَابَارِّي عمَّارْصْ. [e]

6 س ثْمخْسِيوْثْ إِشوَّارنْ ذ ڒَامَانْ

أَذْ إِتّْوَاسّصْڒحْ خْ ڒْغشّْ،

ؤُ س ثِيڭّْوُوذِي ن سِيذِي

إِتّْحيَّاذْ ورْيَازْ خْ ڒْغَارْ.

7 مَاڒَا ؤُسِينْ-د إِبْرِيذنْ ن إِجّْ ن ورْيَازْ

خْ ڒْخَاضَارْ ن سِيذِي،

أَذْ يَارّْ نتَّا ؤُڒَا ذ ڒْعذْيَانْ نّسْ

أَذْ كِيذسْ ڭّنْ ڒهْنَا.

8 إِحْرَا ذْرُوسْ أَكْ-ذ ثْسڭْذَا

خْ وَاطَّاسْ ن ڒْغِيدْجثْ بْڒَا ڒْحقّْ. [f]

9 ؤُڒْ ن بْنَاذمْ إِتّْخَارّصْ أَبْرِيذْ نّسْ،

مَاشَا سِيذِي إِندّهْ إِصُورَافْ نّسْ. ◼16:‏9 ’إِصُورَافْ‘ - س ثْعِيبْرَانِيثْ ’أَصُورِيفْ‘.

10 ڒْحُوكْمْ بْڒَا أَذْوَاڒْ خْ إِينْشِيشنْ ن ؤُجدْجِيذْ،

أَقمُّومْ نّسْ وَارْ إِخطِّي ذڭْ وحْكَامْ.

11 ڒْمِيزَانْ نِيشَانْ ذ طَّاوْيَاثْ ن ڒْمِيزَانْ نِيشَانْ

أَقَا أَثنْ ن سِيذِي،

مَارَّا إِژْرَا ن ڒوْزنْ ذِي ثشْيَارْثْ

ذ ڒْخذْمثْ نّسْ. [h]

12 ذ نّْعِي إِ إِجدْجِيذنْ خْمِي غَا ڭّنْ ڒْغَارْ،

مَاغَارْ ڒْعَارْشْ إِتّْوَاسّمْثنْ زِي ثْسڭْذَا.

13 إِينْشِيشنْ إِ إِشُّورنْ س ثْسڭْذَا

تّعْجِيبنْ إِ ؤُجدْجِيذْ،

ؤُ ونِّي إِسَّاوَاڒنْ نِيشَانْ، إِتّخْسْ إِ-ث نتَّا.

14 أَسْعَارْ ن ؤُجدْجِيذْ أَمْ لْمَالَاكَاثْ نْ ڒْموْثْ،

مَاشَا أَرْيَازْ أَمِيغِيسْ إِزمَّارْ

أَذْ غَارسْ ت إِ-د يَارّْ. [i]

15 ذِي ثْفَاوْثْ ن وُوذمْ إِتِّيسِّيقنْ ن ؤُجدْجِيذْ

ثدْجَا ثُوذَارْثْ،

أَرْضَا نّسْ أَمْ ؤُسيْنُو ن ونْژَارْ

ذِي ثفْسُوثْ. [j]

16 أَقَا ثحْڒَا ثَارزُّوثْ ن ثِيغِيثْ

خْ وُورغْ إِتِّيسِّيقنْ،

ؤُ مشْحَاڒْ كْثَارْ أَذْ ثِيڒِي ثْوَافِيثْ ن ڒفْهَامثْ

سنّجْ خْ ثْوَافِيثْ ن نُّوقَارْثْ. [k]

17 أَبْرِيذْ ن يِينِّي إِڭُّورنْ نِيشَانْ

إِتّْحيَّاذْ خْ ڒْغَارْ.

ونِّي إِحطَّانْ أَبْرِيذْ نّسْ،

إِحطَّا ڒعْمَارْ نّسْ.

18 ثَانفْسشْثْ ثتِّيزْوَارْ-د إِ أَرْژِّييّثْ،

ؤُ نّْفَاخثْ ثتَّاسْ-د قْبڒْ إِ ؤُوطُّو. [l]

19 إِحْڒَا أَقْنَاعْ ن بُوحْبڒْ

أَكْ-ذ إِنِّي إِتّْوَاحْصَارنْ،

خْ ؤُبطُّو ن ثْكشَّاضْثْ أَكْ-ذ أَيْثْ-نّْفَاخثْ.

20 ونِّي إِتّْخَارَّاصنْ مْلِيحْ

ذِي شَا ن ثْمسْڒَاشْثْ، أَذْ يَافْ ڒْخَارْ،

سّعْذْ ن ونِّي إِتّْشَاڒَانْ خْ سِيذِي.[m]

21 ونِّي غَارْ إِدْجَا وُوڒْ ذ أَمِيغِيسْ،

أَذْ ث سمَّانْ بُو-وفْثَانْ،

ؤُ ثَاژْيُوذِي ن ڒْهَارْذْ ن إِينْشِيشنْ

ثَارنِّي ذِي ڒفْهَامثْ.

22 ڒعْقڒْ ذ ڒْعُونْصَارْ ن ثُوذَارْثْ إِ بَابْ نّسْ،

مَاشَا تَّارْبِييّثْ إِ إِبُوهَاڒِييّنْ

ذ ثُوبُّوهڒْيَا وَاهَا.[n]

23 ؤُڒْ ن ؤُمِيغِيسْ إِتَّارَّا أَقمُّومْ نّسْ إِفهّمْ،

زڭْ إِينْشِيشنْ نّسْ أَذْ فهْمنْ كْثَارْ.

24 أَوَاڒنْ إِشوَّارنْ

ڭِّينْ أَمْ ثَامّنْثْ ن ثغْرَاسْثْ،

أَقَا أَثنْ ذ إِمِيژِيذنْ إِ ڒعْمَارْ

ذ ؤُڭنْفُو إِ يغْسَانْ.

25 أَذْ ثَاغْ إِتّْغِيڒْ أَسْ إِ شَا ن يِيجّنْ

أَقَا أَبْرِيذْ نّسْ نِيشَانْ،

مَاشَا أَنڭَّارْ نّسْ مْغِيرْ إِبْرِيذنْ

إِتَّاوْينْ غَارْ ڒْموْثْ. [o]

26 ڒَاژْ ن ؤُشوَّاڒْ إِخدّمْ أَسْ إِ نتَّا،

مَاغَارْ أَقمُّومْ نّسْ إِندّهْ إِ-ث.

27 أَرْيَازْ إِ وَارْ إِسكّْوِينْ إِغزَّا ڒْغَارْ،

خْ إِينْشِيشنْ نّسْ

أَمْ يِيشْثْ ن ثْمسِّي إِتّْشعَّاڒنْ. [p]

28 أَرْيَازْ إِشُّورنْ س ڒخْذَاعَاثْ

إِسّكَّارَا أَمنْغِي،

ؤُ أَخْبَارْجِي إِتَّاوِي-د عَاذْ أَبطُّو

أَكْ-ذ ؤُمدُّوكّڒْ إِصبْحنْ أَطَّاسْ. [q]

29 أَرْيَازْ بُو-ڒخْشُونثْ إِتّْغَارَّا جَّارْ نّسْ،

إِندّهْ إِ-ث غَارْ إِجّْ ن وبْرِيذْ

إِ وَارْ إِدْجِينْ مْلِيحْ.

30 نتَّا إِتّقّنْ ثِيطَّاوِينْ نّسْ

مَاحنْذْ أَذْ إِخَارّصْ

مَارَّا دَّارْبَاثْ ن ڒخْذَاعثْ،

إِتّْكمّشْ إِينْشِيشنْ نّسْ،

أَقَا ذَا إِڭَّا ڒْغَارْ. [r]

31 أَشُوَّافْ إِشَابنْ ذ إِجّْ ن تَّاجْ إِزوّْقنْ،

ثْزمَّارذْ أَذْ ت ثَافذْ خْ وبْرِيذْ ن ثْسڭْذَا.

32 إِحْڒَا بُو-تَّاسِيعْ ن ڒْخَاضَارْ

خْ إِجّْ ن ورْيَازْ إِجهْذنْ

ؤُ ونِّي إِتّبَّاثنْ بُوحْبڒْ نّسْ إِحْڒَا

خْ ونِّي إِحوّْسنْ إِشْثْ ن ثنْذِينْثْ.

33 ثَاقدُّوحْثْ ثمّنْضَارْ ذڭْ وحْسِينْ،

مَاشَا مْكُوڒْ أَرَّايْ إِتَّاسْ-د زِي سِيذِي.