1 ثْوَارِّيثْ إِفْسُوسنْ

ثسّسْمَاضْ أَخيّقْ،

مَاشَا أَوَاڒْ إِتّقّْسنْ

إِسّكَّارَا-د أَخيّقْ. [a]

2 إِڒسْ ن إِمِيغِيسنْ إِجبّذْ ثُوسّْنَا

غَارْ زَّاثْ،

مَاشَا أَقمُّومْ ن إِبُوهَاڒِييّنْ

إِتَّازّڒْ س ثُوبُّوهڒْيَا. [b]

3 ثِيطَّاوِينْ ن سِيذِي ذِي كُوڒْ أَمْشَانْ،

تّْحكَّارنْثْ إِ إِصبْحَاننْ ذ إِعفَّاننْ. [c]

4 إِڒسْ نِّي إِسّْڭنْفَانْ ذ ثَاشجَّارْثْ ن ثُوذَارْثْ،

مَاشَا أَرّْهَاجْ نّسْ إِتَّارژَّا بُوحْبڒْ. ◼15:‏4 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).  [e]

5 أَبُوهَاڒِي إِنطَّارْ تَّارْبِييّثْ ن بَابَاسْ،

مَاشَا ونِّي إِتّْحكَّارَانْ

إِ ؤُوبّخْ، أَقَا إِفْثنْ.

6 ذِي ثَادَّارْثْ ن ؤُمْسڭَّاذْ -

ذَايسْ ڒْكنْزْ إِمْغَارْ،

مَاشَا ذِي مِينْ د-إِتَّاوِي ؤُعفَّانْ

ذَايسْ ثَامَارَا.

7 إِينْشِيشنْ ن إِمِيغِيسنْ تّْبزَّاعنْ ثُوسّْنَا،

مَاشَا ؤُڒْ ن إِبُوهَاڒِييّنْ وَارْ إِدْجِي نِيشَانْ.

8 ثَاغَارْصْثْ إِ إِتّْقدَّامنْ إِعفَّاننْ

ذ نّْعِي إِ سِيذِي،

مَاشَا ثَاژَادْجِيثْ ن إِنِّي إِڭُّورنْ نِيشَانْ

أَقَا-ت إِ نتَّا ذ أَرْضَا. [f]

9 أَبْرِيذْ ن ؤُعفَّانْ ذ نّْعِي إِ سِيذِي،

مَاشَا ونِّي إِضفَّارَانْ ثَاسڭْذَا،

إِتّخْسْ إِ-ث نتَّا.

10 تَّارْبِييّثْ إِقسْحنْ ثْڒقّفْ

ونِّي إِسمْحنْ ذڭْ وبْرِيذْ،

ؤُ ونِّي إِشَارّْهنْ أَوبّخْ،

أَذْ إِمّثْ.

11 ڒَاخَارْثْ ذ ثسْرَافْثْ ن ؤُهلّكْ

أَقَا ذِينْ أَرزْمنْ زَّاثْ إِ سِيذِي،

مشْحَاڒْ عَاذْ وُوڒَاونْ ن ثَارْوَا ن بْنَاذمْ؟ [g]

12 أَمسْثهْزِييْ وَارْ إِتّخْسْ

ونِّي ث إِ غَا إِوبّْخنْ،

وَارْ إِتّْرِيحْ شَا غَارْ إِمِيغِيسنْ.

13 ؤُڒْ إِفَارْحنْ إِتّڭّْ ؤُذمْ إِشْنَانْ،

مَاشَا أَمْنُوسْ ذڭْ وُوڒْ إِسكّفْ بُوحْبڒْ. [h]

14 ؤُڒْ إِفهّْمنْ يَارزُّو ثُوسّْنَا،

مَاشَا أَقمُّومْ ن إِبُوهَاڒِييّنْ

إِسّشَّا إِخفْ نّسْ س ثُوبُّوهڒْيَا.

15 إِ يِينِّي إِتّْوَاحْصَارنْ مَارَّا ؤُسَّانْ نْسنْ

أَقَا إِعفّْننْ،

مَاشَا ؤُڒْ إِفَارْحنْ

أَمْ إِشْثْ ن زَّارْذثْ وَارْ إِقطِّينْ.

16 إِحْڒَا ذْرُوسْ أَكْ-ذ ثڭّْوُوذِي ن سِيذِي،

خْ إِجّْ ن ڒْكنْزْ ذ أَمقّْرَانْ س ڒحْوڒْ. [i]

17 إِحْڒَا إِجّْ ن طّبْصِي ن ڒْخُوضَارْثْ

مَانِي ثْحكّمْ ثَايْرِي،

خْ إِجّْ ن ؤُينْذُوزْ إِصحّنْ أَكْ-ذ وشْرَاهْ. [j]

18 أَرْيَازْ إِتَّارُّوجْذُوذنْ

إِسّكَّارَا إِمنْغِييّنْ،

مَاشَا ونِّي غَارْ إِدْجَا تَّاسِيعْ ن ڒْخَاضَارْ

إِسّخْسَايْ أَمنْغِي. [k]

19 أَبْرِيذْ ن ؤُمعْڭُوزْ

أَمْ شْبَارْقْ أَكْ-ذ إِسنَّاننْ،

مَاشَا أَمسْرُوقْ ن يِينِّي إِڭُّورنْ نِيشَانْ

أَقَا إِتّْوَاسّْڭعّذْ.

20 مِّيسْ أَمِيغِيسْ إِسّْفَارّحْ بَابَاسْ،

مَاشَا بْنَاذمْ أَبُوهَاڒِي

إِسّحْقَارَا يمَّاسْ. [l]

21 ثُوبُّوهڒْيَا أَقَا-ت ذ ڒفْرَاحثْ

إِ ونِّي وَارْ غَارْ إِدْجِي بُو وُوڒْ إِمْثنْ،

مَاشَا إِجّْ ن ورْيَازْ ن ڒفْهَامثْ

إِڭُّورْ نِيشَانْ. [m]

22 إِنْوَاينْ فشّْڒنْ

مَاڒَا وَارْ ذِينْ إِدْجِي شّْوَارْ،

مَاشَا س وَاطَّاسْ ن إِمْشَاوَارنْ

أَذْ يِيڒِي ونْوَايْ. ◼15:‏22 ’إِنْوَاينْ‘ - نِيغْ ’إِنكّْوَانْ‘ نِيغْ ’إِخَارِّيصنْ‘.  [o]

23 أَرْيَازْ غَارسْ ڒفْرَاحثْ

ذِي ثمْوَارِّيثْ إِصبْحنْ

زڭْ ؤُقمُّومْ نّسْ.

مشْحَاڒْ إِصْبحْ وَاوَاڒْ ذِي ڒْوقْثْ نّسْ!

24 أَبْرِيذْ ن ثُوذَارْثْ إِندّهْ

غَارْ سنّجْ إِ ؤُفهَّامْ،

مَاحنْذْ نتَّا أَذْ إِحيّذْ

خْ ڒَاخَارْثْ سْوَادَّايْ.

25 ثَادَّارْثْ ن بُو-نّْفَاخثْ

أَذْ ت إِقْڒعْ سِيذِي،

مَاشَا أَيْمِيرْ ن ييَّارْ ن ثَاجَّاتْشْ

إِسّمْثَانْ إِ-ث نتَّا. [p]

26 إِخمِّيمنْ ن ؤُعفَّانْ ذ نّْعِي إِ سِيذِي،

مَاشَا أَوَاڒنْ إِشوَّارنْ ذ إِمزْذَاڭنْ. [q]

27 ونِّي يَارزُّونْ خْ أَرْبحْ

إِغطّڒْ ثَادَّارْثْ نّسْ ذِي أَرّْژِييّثْ،

مَاشَا ونِّي إِشَارّْهنْ ثَارْزِيفِينْ، أَذْ إِدَّارْ. [r]

28 ؤُڒْ ن إِمْسڭَّاذنْ إِتّْخَارَّاصْ

مَاحنْذْ أَذْ د-يَارّْ،

مَاشَا أَقمُّومْ ن إِعفَّاننْ

إِتّْفيّضْ س ڒْغَارْ.

29 إِڭّْوجْ سِيذِي خْ إِعفَّاننْ،

مَاشَا ثَاژَادْجِيثْ ن إِمْسڭَّاذنْ إِتّسْڒَا أَسْ. [s]

30 ثَافَاوْثْ ذِي ثِيطَّاوِينْ ثسّْفَارّحْ ؤُڒْ،

ڒخْبَارْ أَصبْحَانْ إِسّْيُومَا إِغْسَانْ. [t]

31 أَمزُّوغْ إِتّسْڒَانْ

غَارْ ؤُوبّخْ إِ ثُوذَارْثْ،

أَذْ إِسّنْسْ ذِي ڒْوسْطْ ن إِمِيغِيسنْ.

32 ونِّي إِنطَّارنْ تَّارْبِييّثْ،

إِسّحْقَارَا إِخفْ نّسْ،

مَاشَا ونِّي إِتّسْڒَانْ غَارْ ؤُوبّخْ،

إِسّْيَاوَانْ ؤُڒْ نّسْ. [u]

33 ثِيڭّْوُوذِي ن سِيذِي ذ تَّارْبِييّثْ غَارْ ثِيغِيثْ،

ؤُ أَوَاضعْ إِتِّيزْوَارْ إِ شَّانْ. [v]