1 ونِّي إِتّخْسنْ تَّارْبِييّثْ،

إِتّخْسْ ثُوسّْنَا،

مَاشَا ونِّي إِشَارّْهنْ أَوبّخْ

أَقَا نتَّا ذ أَقفُّوحْ.

2 بْنَاذمْ ذ أَصبْحَانْ إِتَّافْ أَرْضَا ن سِيذِي،

مَاشَا أَرْيَازْ إِنكّْوَانْ ثَاحْرَايْمشْثْ

أَذْ ث إِبَارّحْ ذ بُو-ؤُمَارْوَاسْ.

3 بْنَاذمْ وَارْ إِزمَّارْ

أَذْ إِقِّيمْ إِبدّْ ؤُمِي إِتّڭّْ ڒْغَارْ،

مَاشَا أَژْوَارْ ن إِمْسڭَّاذنْ

وَارْ إِزمَّارْ أَذْ إِنْهزّْ. [a]

4 ثَامْغَارْثْ إِمحْضنْ

ذ تَّاجْ ن ورْيَازْ نّسْ،

مَاشَا ثنِّي ث يَارِّينْ إِتّْسضْحَا،

ذ ثنِّي أَمْ وَارصُّوضْ ذڭْ إِغْسَانْ نّسْ. [b]

5 إِخمِّيمنْ ن إِمْسڭَّاذنْ ذ ڒْحقّْ،

إِخَارِّيصنْ ن إِعفَّاننْ ذ ڒْغشّْ مَارَّا.

6 أَوَاڒنْ ن إِعفَّاننْ

ڒبْثنْ ذڭْ إِذَامّنْ،

مَاشَا أَقمُّومْ ن يِينِّي إِڭُّورنْ نِيشَانْ

أَذْ ثنْ إِسّنْجمْ.[c]

7 إِعفَّاننْ تّْنقْڒَابنْ ؤُ وَارْ دْجِينْ عَاذْ،

مَاشَا ثَادَّارْثْ ن إِمْسڭَّاذنْ

أَذْ ثقِّيمْ ثْبدّْ. [d]

8 إِتّْوَاسّمْغَارْ بْنَاذمْ

عْلَاحْسَابْ ڒْقدّْ ن ڒعْقڒْ نّسْ،

مَاشَا ونِّي ذِي إِدْجَا وُوڒْ إِفَارْغنْ،

أَذْ إِتّْوَاسّحْقَارْ.

9 إِحْڒَا ونِّي وَارْ إِحسّْبنْ

خْ إِخفْ نّسْ أَطَّاسْ،

مَاشَا غَارسْ إِجّْ ن ؤُمْسخَّارْ،

خْ ونِّي إِتّْشنّْعنْ س إِخفْ نّسْ،

مَاشَا أَغْرُومْ وَارْ غَارسْ يدْجِي. [e]

10 أَمْسڭّذْ إِسّنْ

ڒعْمَارْ ن ڒبْهِيمثْ نّسْ،

مَاشَا أَرّحْمَاثْ ن ؤُعفَّانْ قسْحنْثْ. [f]

11 ونِّي إِشَارّْزنْ ثَامُّورْثْ نّسْ،

أَذْ إِجَّاونْ س وغْرُومْ،

مَاشَا ونِّي يَاردّْفنْ مِينْ إِدْجَانْ إِخْوَانْ،

وَارْ غَارسْ شَا وُوڒْ إِمْثنْ. [g]

12 أَعفَّانْ إِتّخْسْ مِينْ إِدْجَانْ ذِي ثْرَاشَّا

ن يِينِّي إِتّڭّنْ ڒْغَارْ،

مَاشَا أَژْوَارْ ن إِمْسڭَّاذنْ

إِتّْغِيمَا إِتِّيشْ.

13 ذڭْ ؤُخطُّو ن إِينْشِيشنْ

ذَايسْ إِجّْ ن ڒْفخْ ذ أَعفَّانْ،

مَاشَا أَمْسڭّذْ أَذْ إِنْجمْ زِي ڒحْصَارثْ. [h]

14 زِي ڒْغِيدْجثْ ن ؤُقمُّومْ نّسْ

إِتّْوَاسّْجِيونْ بْنَاذمْ س ڒْخِيرْ،

مِينْ د-تَّاوْينْ إِفَاسّنْ ن بْنَاذمْ

أَذْ غَارسْ د-إِذْوڒْ. [i]

15 أَبْرِيذْ ن ؤُبُوهَاڒِي نِيشَانْ ذِي ثِيطَّاوِينْ نّسْ،

مَاشَا ونِّي إِتّسْڒَانْ إِ شّْوَارْ،

أَقَا نتَّا ذ أَمِيغِيسْ. [j]

16 أَبُوهَاڒِي إِسّْشَانَا ڒْهمّْ نّسْ

ذڭْ وَاسّْ ذ إِجّْ،

مَاشَا ونِّي إِفتّْننْ،

إِتّْذَاڒَا ڒحْيَا نّسْ.

17 ونِّي د-إِنطّْقنْ ثِيذتّْ،

إِسّْشَانَا ثَاسڭْذَا،

مَاشَا أَشهَّاذْ إِسّْخَارِّيقنْ

إِسّْشَانَا أَشْمَاثْ. [k]

18 أَقَا ذِينْ ونِّي إِتّْهَارْوَاضنْ

أَمْ ثجِّيثْ ن سِّيفْ،

مَاشَا إِڒسْ ن إِمِيغِيسنْ

إِتَّاوِي-د أَڭنْفُو. [l]

19 إِينْشِيشنْ إِشُّورنْ س ثِيذتّْ

أَذْ تّْوَاضْمنْ إِ ڒبْذَا،

مَاشَا إِڒسْ إِسّْخَارِّيقنْ مْغِيرْ

إِ يِيجّْ ن ؤُمُورْ وَاهَا.

20 أَشْمَاثْ أَقَا-ث ذڭْ وُوڒْ

ن يِينِّي إِنكّْوَانْ ثُوعفّْنَا،

مَاشَا إِ يِينِّي إِنسّْحنْ ڒهْنَا،

أَقَا ذِينْ ڒفْرَاحثْ.

21 أَمْسڭّذْ وَارْ ث إِڒقّفْ ڒْغشّْ،

مَاشَا إِعفَّاننْ أَذْ تّْوَاشُّورنْ س ڒْغَارْ.

22 إِينْشِيشنْ إِسْخَارِّيقنْ ذ نّْعِي إِ سِيذِي،

مَاشَا إِنِّي إِتّمْصُورُّوفنْ س ڒَامَانْ

يَارْضَانْ أَسْ.

23 بْنَاذمْ إِفثْننْ إِسّْذُورُّويْ ثُوسّْنَا نّسْ،

مَاشَا ؤُڒْ ن إِبُوهَاڒِييّنْ

إِسْغُويُّو س ثُوبُّوهڒْيَا ذِي ڒخْڒَا. [m]

24 أَفُوسْ ن ونِّي إِمحْضنْ أَذْ إِحْكمْ،

مَاشَا ڒعْڭزْ إِندّهْ غَارْ ثسْمُوغِي. [n]

25 أَمْنُوسْ ذڭْ وُوڒْ ن بْنَاذمْ

إِسّْهكّْوَا إِ-ث،

مَاشَا أَوَاڒْ إِصبْحنْ إِسّْفَارَّاحْ إِ-ث. [o]

26 أَمْسڭَّاذْ إِسّْشَانَا أَبْرِيذْ إِ جَّارْ نّسْ،

مَاشَا أَبْرِيذْ ن ؤُعفَّانْ

يَارَّا إِ-ثنْ أَذْ ودَّارنْ.

27 أَمعْڭُوزْ وَارْ إِضفَّارْ شَا أَنيْمَارْ نّسْ.

مَاشَا أَڭْڒَا إِغْڒَانْ ن إِوْذَانْ أَقَا ذ أَمْحَاضْ.

28 ذڭْ ؤُمسْرُوقْ ن ثْسڭْذَا ثدْجَا ثُوذَارْثْ،

أَبْرِيذْ ن ڒَاثَارْ نّسْ وَارْ ذَايسْ بُو ڒْموْثْ.