1 مِينْزِي كُوڒْ أَرَّايْسْ ن إِكهَّاننْ إِتّْوَاكّسْ-د زڭْ إِوْذَانْ، إِتّْوَاسّْڭعّذْ ذِي طّْوعْ ن إِوْذَانْ خْ مِينْ إِدْجَانْ ن أَربِّي، مَاحنْذْ أَذْ إِقدّمْ ثِيوْهِيبِينْ ذ ثْغَارْصِينْ خْ دّْنُوبْ. 2 إِزمَّارْ أَذْ إِمَّارْسْ إِخفْ نّسْ، أَذْ إِحِينّْ خْ إِقُوبَّانِييّنْ ذ إِمْودَّارنْ، مِينْزِي ؤُڒَا ذ نتَّا سِيمَانْثْ نّسْ يَارْضْ ثُوضْعفْثْ. 3 مَاغَارْ س مَانْ أَيَا ذ إِشْثنْ إِتّْخصَّا أَسْ أَذْ إِسّْڭعّذْ ثِيغَارْصِينْ خْ دّْنُوبْ ن ڒْڭنْسْ ؤُشَا عَاوذْ خْ دّْنُوبْ ن يِيخفْ نّسْ. [a] 4 ؤُڒَا ذ إِجّنْ أَذْ إِكْسِي إِ يِيخفْ نّسْ شَّانْ-أَ، مْغِيرْ ونِّي إِتّْوَاڒَاغَانْ زِي أَربِّي أَمْ مَامّشْ إِتّْوَاڒَاغَا هَارُونْ. [b] 5 أَمُّو عَاوذْ لْمَاسِيحْ وَارْ إِسّْعُودْجِي شَا إِخفْ نّسْ ؤُمِي إِذْوڒْ ذ أَرَّايْسْ ن إِكهَّاننْ، مَاشَا إِسّْعُودْجْ ونِّي د غَارسْ إِسِّيوْڒنْ:

”شكْ ذ مِّي،

نشّْ جِّيغْ-د شكْ أَسّْ-أَ!“ [c]

6 أَمْ مَامّشْ إِنَّا عَاوذْ ذِي مَانِي نّغْنِي:

”شكْ ذ أَكهَّانْ إِ ڒبْذَا،

ذڭْ وَارْوَاسْ ن مَالْكِيصَاذِيقْ.“ [d]

7 ڒَامِي ثُوغَا يَارّضْ أَرِّيمثْ ن ويْسُومْ نّسْ، إِقدّمْ ثِيژَادْجِيثِينْ ذ ثُوثْرَا س إِغُويَّانْ أَطَّاسْ ؤُ س إِمطَّاونْ إِ ونِّي ثُوغَا إِزمَّارنْ أَذْ ث-إِ-د-إِسّْنكَّارْ زِي ڒْموْثْ إِ ثُوذَارْثْ، ؤُشَا نتَّا إِسْڒَا أَسْ. [e] 8 نتَّا، وَاخَّا ثُوغَا-ث ذ مِّيسْ، أَقَا إِڒْمذْ طَّاعثْ س ثِيڭّْوُوذِي ؤُ زڭْ ؤُودّبْ إِ إِكْسِي. [f] 9 أَمُّو إِ إِذْوڒْ نتَّا إِكمّڒْ، إِذْوڒْ ذ سِّيبّثْ ن ثُوذَارْثْ إِتّْذُومَانْ إِ مَارَّا إِنِّي ذ أَسْ إِ غَا إِطَّاعنْ، 10 ؤُشَا إِڭَّا إِ-ث أَربِّي ذ أَرَّايْسْ ن إِكهَّاننْ ذڭْ وَارْوَاسْ ن مَالْكِيصَاذِيقْ. [g]

11 أَقَا غَارْنغْ أَطَّاسْ مِينْ غَا نِينِي خْ مَالْكِيصَاذِيقْ وَانِيثَا، مَاشَا إِوْعَارْ أَذْ ث نْفسَّارْ، مِينْزِي ثْذوْڒمْ ثوْعَارمْ أَذْ ثسْڒمْ. 12 مَاغَارْ ثُوغَا إِتّْخصَّا أَذْ ثِيڒِيمْ ذ إِمسْغَارنْ زِي جِّيهثْ ن ڒْمِيجَاڒْ ن ڒْوقْثْ إِ ثْضفَّارمْ ثْغُورِي-يَا. مَاشَا ڒخُّو إِتّْخصَّا أَومْ عَاذْ أَذْ ثْڒمْذمْ لْحُورُوفْ إِمزْوُورَا ن بدُّو ن وَاوَاڒنْ ن أَربِّي، كنِّيوْ ثحْذَاجمْ عَاذْ أَغِي ذڭْ ومْشَانْ ن مَاشَّا إِجهْذنْ. [h] 13 مِينْزِي كُوڒْ إِجّنْ ونِّي إِشَارْشنْ ذڭْ ؤُغِي، وَارْ إِقدّْ خْ وَاوَاڒْ ن ثْسڭْذَا، مِينْزِي نتَّا ذ أَسيْمِي عَاذْ. 14 مَاشَا مَاشَّا إِجهْذنْ إِفّغْ-د إِ يِينِّي إِمْغَارنْ، إِنِّي أَقَا نُّومنْ أَذْ ذَارّْبنْ ثَاشِيثْ نْسنْ حِيمَا أَذْ فَارْزنْ ڒْخَارْ خْ ڒْغَارْ.