1 أجّْ أَنغْ أَذْ نحْضَا خنِّي، أَقَا ؤُڒَا ذ إِجّْ زَّايْومْ، ؤُمِي عَاذْ ذِينْ إِجّْ ن لْوَاعْذْ ن وَاذَافْ ذِي أَرَّاحثْ نّسْ، أَذْ إِضْهَارْ إِتّْغِيمَا غَارْ ضفَّارْ غَارْ وَاذَافْ. 2 مِينْزِي إِتّْوَابَارّحْ ڒخْبَارْ أَصبْحَانْ عَاوذْ إِ نشِّينْ، أَمْ إِتّْوَابَارّحْ ؤُڒَا إِ نِيثْنِي، مَاشَا أَوَاڒْ وَارْ ذ أَسنْ إِنْفِيعْ إِ يِينِّي ذ أَسْ إِسْڒِينْ، مِينْزِي ثُوغَا وَارْ د-إِتِّيسْ شَا أَكْ-ذ لْ-إِيمَانْ ذڭْ إِنِّي ذ أَسْ إِسْڒَانْ. 3 مَاشَا نشِّينْ، إِنِّي يُومْننْ، أَذْ نَاذفْ غَارْ أَرَّاحثْ.

مَاشَا أَمْ مَامّشْ إِنَّا:

”أَمْ مَامّشْ جُّودْجغْ ذڭْ وغْضَابْ إِنُو:

’نِيثْنِي وَارْ د-تِّيذْفنْ شَا غَارْ أَرَّاحثْ إِنُو!‘ “

ؤُ خْزَارْ، ڒخْذَايمْ ن أَربِّي أَقَا تّْوَاكمّْڒنْثْ زڭْ وَامِي ثتّْوَاڭّْ دُّونشْثْ، [a] 4 أَمْ مَامّشْ إِنَّا خْ سّبْثْ:

”يَاريّحْ أَربِّي زِي مَارَّا ڒخْذَايمْ نّسْ

ذڭْ وَاسّْ وِيسّْ سبْعَا.“ [b]

5 أَمُّو إِ إِنَّا عَاوذْ ذڭْ وَاوَاڒْ-أَ وَانِيثَا:

”وَارْ د-تِّيذْفنْ شَا غَارْ أَرَّاحثْ إِنُو!“ [c]

6 ؤُمِي ثقِّيمْ بلِّي مَارَّا زمَّارنْ أَذْ د-أَذْفنْ غَارْ أَرَّاحثْ-أَ، مَاشَا إِنِّي ؤُمِي إِتّْوَابَارّحْ س ڒخْبَارْ أَصبْحَانْ غَارْ ؤُمزْوَارُو، وَارْ ؤُذِيفنْ شَا خْ سِّيبّثْ ن ڒْمُوعْصِييّثْ نْسنْ، 7 أَقَا نتَّا إِڭَّا عَاوذْ، أَوَارْنِي أَطَّاسْ ن ڒْوقْثْ، إِجّْ ن وَاسّْ نّغْنِي، أَمْ مَامّشْ إِتّْوَارِي قْبڒْ أَقَا ذَاوُوذْ إِنَّا:

”أَسّْ-أَ مَاڒَا ثسْڒِيمْ إِ ثْمِيجَّا نّسْ،

وَارْ سقْسِيحمْ شَا ؤُڒَاونْ نْومْ!“ [d]

8 مِينْزِي مَاڒَا ثُوغَا يَاشُووَا، مِّيسْ ن نُونْ، إِسِّيذفْ إِ-ثنْ ذِي أَرَّاحثْ، وَارْ غَارسْ إِتِّيڒِي عَاذْ ڒْهَارْذْ س ؤُقمُّومْ ن ذَاوُوذْ خْ إِجّْ ن وَاسّْ نّغْنِي أَوَارْنِي مَانْ أَيَا. 9 س ؤُيَا أَذْ ثقِّيمْ أَقَا ذِينْ عَاذْ أَرَّاحثْ ن سّبْثْ إِ ڒْڭنْسْ ن أَربِّي. 10 مِينْزِي وِي يُوذْفنْ غَارْ أَرَّاحثْ نّسْ، يَاريّحْ عَاوذْ زِي ڒخْذَايمْ نّسْ أَمْ مَامّشْ أَربِّي زِي ثِينِّي نّسْ.

11 س ؤُيَا جّمْ أَنغْ أَذْ نمْكَابَارْ حِيمَا أَذْ نَاذفْ غَارْ أَرَّاحثْ نِّي، مَاحنْذْ وَارْ نْوطِّي أَمْ مَامّشْ وْضَانْ إِنِّي وَارْ إِطِّيعنْ. 12 مِينْزِي أَوَاڒْ ن أَربِّي إِدَّارْ، إِخدّمْ مَانِي مَا، إِقْضعْ كْثَارْ زِي كُوڒْ سِّيفْ س ثْنَاينْ ن وُوذْمَاونْ، إِتَّاكّْوَاضْ أَڒْ أَبطُّو ن ڒعْمَارْ ذ أَرُّوحْ، أَڒْ تَّاسِيعْ جَارْ ڒمْفَاصڒْ، أَڒْ أَيْمِيرْ جَارْ وَاضُوفْ ذ إِغْسَانْ، ؤُشَا إِحكّمْ خْ ثْنَاوِي ذ إِخَارِّيصنْ ن وُوڒْ. [e] 13 ؤُڒَا ذ إِشْثْ ن ثْمسْڒَاشْثْ إِ زَّايسْ د-إِتّْوَاخڒْقنْ وَارْ زَّايسْ ثتّْوَاسّْنُوفَّارْ شَا، مَاشَا مَارَّا ثِيمسْڒَايِينْ أَقَا أَثنْثْ تّْوَاعَارّْينْثْ، تّْوَارزّْمنْثْ غَارْ ثِيطَّاوِينْ ن ونِّي ؤُمِي إِ-كْ-د إِ غَا نڭّْ ڒحْسَابْ. [f]

14 س ؤُينِّي، أَمْ غَارْنغْ أَرَّايْسْ ن إِكهَّاننْ إِمْغَارْ، يَاسُوع لْمَاسِيحْ، مِّيسْ ن أَربِّي، ونِّي إِسّْڭعّْذنْ غَارْ ؤُجنَّا، أجّْ أَنغْ أَذْ نْشبَّارْ ذِي شّْهَاذثْ نّسْ. [g] 15 مِينْزِي وَارْ غَارْنغْ أَرَّايْسْ ن إِكهَّاننْ إِ وَارْ إِزمَّارْ أَذْ يَاشَا أَكْ-ذ ثُوضْعفْثْ نّغْ، مَاشَا إِجّنْ ونِّي إِتّْوَاجَارّْبنْ ذِي مَارَّا أَمْ نشِّينْ، مَاشَا بْڒَا دّنْبْ. [h] 16 س ؤُينِّي أجّْ أَنغْ أَذْ د-نْقَارّبْ خنِّي س تِّيقّثْ غَارْ ڒْعَارْشْ ن أَرْضَا نّسْ، حِيمَا أَذْ نكْسِي أَرّحْمثْ ؤُشَا أَذْ نَافْ أَرْضَا ذِي ڒْوقْثْ ن ڒْمحْنثْ. [i]