1 أَ أَيْثْمَا، خْسغْ أَذْ ثسّْنمْ، بلِّي ڒجْذُوذْ نّغْ ثُوغَا أَثنْ مَارَّا سَاذُو ؤُسيْنُو ؤُشَا مَارَّا شُوقنْ ذِي ڒبْحَارْ، [a] 2 ؤُشَا مَارَّا تّْوَاسّْغضْصنْ ذِي مُوسَا ذڭْ ؤُسيْنُو ؤُ ذِي ڒبْحَارْ، [b] 3 ؤُشَا مَارَّا شِّينْ مَاشَّا ثَارُوحشْثْ ذ إِشْثْ، [c] 4 ؤُشَا مَارَّا سْوِينْ ثِيسسِّيثْ ثَارُوهشْثْ ذ إِشْثْ، مِينْزِي نِيثْنِي سْوِينْ زڭْ وژْرُو ن أَرُّوحْ ونِّي ثُوغَا أَكِيذْسنْ، ؤُ أَژْرُو نِّي ثُوغَا-ث ذ لْمَاسِيحْ. [d] 5 مَاشَا أَربِّي ثُوغَا وَارْ يَارْضِي خْ وزْينْ أَمقّْرَانْ زَّايْسنْ، مِينْزِي أَقَا أَثنْ وْضَانْ ذِي ڒخْڒَا. [e]

6 مَانْ أَيَا إِمْسَارْ ذ لْمِيثَالْ إِ نشِّينْ، حِيمَا وَارْ ذَايْنغْ إِتِّيڒِي مّژْرِي ذِي مِينْ إِعفّْننْ، أَمْ مَامّشْ ثُوغَا نِيثْنِي ذَايْسنْ مژْرِي. [f] 7 أجّْ أَنغْ وَارْ نْذِيكّْوِيڒْ شَا أَذْ نعْبذْ لْ-أَصْنَامْ، أَمْ شَا زَّايْسنْ، أَمْ مَامّشْ ثُورَا:

”ڒْْڭنْسْ إِقِّيمْ حِيمَا أَذْ إِشّْ أَذْ إِسُّو

ؤُشَا كَّارنْ حِيمَا أَذْ إِرَارنْ.“ [g]

8 وَارْ إِعدّڒْ أَذْ نسّفْسَاذْ إِخفْ نّغْ، أَمْ شَا زَّايْسنْ. أَقَا مُّوثنْ ذِينْ ثْڒَاثَا ؤُ-عِيشْرِينْ-أَڒفْ ذڭْ إِجّْ ن وَاسّْ. [h] 9 وَارْ إِعدّڒْ أَذْ نْجَارّبْ لْمَاسِيحْ، أَمْ مَامّشْ جَارّْبنْ ث شَا زَّايْسنْ ؤُشَا تّْوَاهلْكنْ س إِفِيغْرَانْ. [i] 10 وَارْ إِعدّڒْ عَاوذْ أَذْ نسّْفِيخخْ أَمْ مَامّشْ شَا زَّايْسنْ سّْفِيخِيخنْ، ؤُشَا خنِّي تّْوَاهلّْكنْ س ؤُفُوسْ ن ؤُمْهلّكْ. [j] 11 مَارَّا مِينْ ذ أَسنْ إِمْسَارنْ، أَقَا ث ذ لْمِيثَالْ إِ نشِّينْ، ؤُشَا ثُورَا ذ أَعْڒَامْ إِ نشِّينْ مِيخفْ د-يُوسَا ؤُنڭَّارْ ن زّْمَانَاثْ. [k]

12 س ؤُينِّي ونِّي ؤُمِي إِتّْغِيڒْ أَقَا إِبدّْ، أجّْ إِ-ث أَذْ إِحْضَا وَارْ إِوطِّي. 13 وَارْ خَاومْ إِتّكّْ ؤُجَارّبْ مْغِيرْ ونِّي إِ غَا يَاوْضنْ غَارْ إِوْذَانْ. مَاشَا أَربِّي ذَايسْ ڒَامَانْ. نتَّا وَارْ كنِّيوْ إِتّجِّي أَذْ ثتّْوَاجَارّْبمْ سنّجْ إِ مِينْ ثْزمَّارمْ، مَاشَا نتَّا إِتِّيشْ ؤُفُّوغْ أَكْ-ذ ؤُجَارّبْ نْومْ، حِيمَا أَذْ ثْزمَّارمْ أَذْ ثَارْبُومْ أَغكّْوِي. [l]

14 س ؤُيَا، إِمْعِيزّنْ إِنُو، أَروْڒمْ زڭْ ؤُعْبَاذْ إِ لْ-أَصْنَامْ. 15 سَّاوَاڒغْ أَكِيذْومْ أَخْمِي سَّاوَاڒغْ أَكْ-ذ إِمِيغِيسنْ. حكْممْ كنِّيوْ خنِّي خْ مِينْ ذ أَومْ قَّارغْ. 16 ڒْكَاسْ ن ؤُقَاذِي نِّي نتّْبَارَاكْ، مَا وَارْ إِدْجِي ذ ثَامُونْثْ أَكْ-ذ إِذَامّنْ ن لْمَاسِيحْ؟ أَغْرُومْ نِّي نْثَارژَّا، مَا وَارْ إِدْجِي ذ ثَامُونْثْ أَكْ-ذ أَرِّيمثْ ن لْمَاسِيحْ؟ 17 أَمْ مَامّشْ إِدْجَا أَغْرُومْ ذ إِجّنْ، أَمُّو مَارَّا نشِّينْ ذ إِشْثْ ن أَرِّيمثْ، مِينْزِي مَارَّا نشِّينْ نطّفْ زڭْ إِجّْ ن وغْرُومْ. [m]

18 خْزَارمْ غَارْ إِسْرَائِيل عْلَاحْسَابْ أَرِّيمثْ! مَا إِنِّي إِتّتّنْ زِي ثْغَارْصَا وَارْ غَارْسنْ أَشْرَاشْ أَكْ-ذ ؤُعَالْطَارْ؟ ◼10:‏18 ’أَعَالْطَارْ‘ - نِيغْ: ’ڒْْمذْبحْ‘. 19 مِينْ غَا إِنِيغْ ذِي مَانْ أَيَا؟ مَا بلِّي مِينْ إِمّوْشنْ ذ ثَاغَارْصْثْ إِ لْ-أَصْنَامْ ذ شَا، نِيغْ بلِّي لْ-أَصْنَامْ ذ شَا؟ لَّ. [o] 20 مِينْ وْشِينْ لْكُوفَّارْ ذ ثَاغَارْصْثْ، وهّْبنْ ت إِ شّْوَاطنْ، وَارْ إِدْجِي إِ أَربِّي. ؤُشَا نشّْ وَارْ خْسغْ أَذْ ثْشَارْشمْ أَكْ-ذ شّْوَاطنْ. ◼10:‏20 ’شّْوَاطنْ‘ - نِيغْ: ’شَّايَاطِينْ‘.  [q] 21 وَارْ ثْزمَّارمْ أَذْ ثسْومْ ڒْكَاسْ ن سِيذِيثْنغْ ؤُڒَا ذ ڒْكَاسْ ن شّْوَاطنْ، ؤُشَا وَارْ ثْزمَّارمْ أَذْ ثْشَارْشمْ ثَازوْضَا ن سِيذِيثْنغْ ؤُڒَا ذ ثَازوْضَا ن شّْوَاطنْ. ◼10:‏21 ’ثَاژوْضَا‘ - نِيغْ: ’مِيسَّا‘. 22 نِيغْ أَذْ نسّكَّارْ ثُوسْمِي ن سِيذِيثْنغْ؟ مَا نجْهذْ خَاسْ نشِّينْ؟

23 مَارَّا إِتّْحدْجڒْ أَيِي، مَاشَا مَارَّا وَارْ إِنفّعْ. مَارَّا إِتّْهدْجڒْ، مَاشَا مَارَّا وَارْ إِبنِّي. [s] 24 ؤُڒَا ذ إِجّْ وَارْ يَارزُّو شَا ثِيزِي نّسْ وَاهَا، مَاشَا أجّْ كُوڒْ إِجّْ أَذْ يَارْزُو عَاوذْ ثنِّي ن ونِّي ذ أَسْ يُوذْسنْ. [t]

25 مَارَّا مِينْ إِتّْمنْزَانْ ذِي سُّوقْ ن إِڭزَّارنْ، ثْزمَّارمْ أَذْ ث ثشّمْ بْڒَا أَسقْسِي ذِي طّْوعْ ن ثْنفْسشْثْ، 26 مِينْزِي إِ سِيذِي ؤُمِي غَارْ ثدْجَا ثمُّورْثْ ذ ؤُعمَّارْ نّسْ. [u] 27 مَاڒَا شَا ن يِيجّنْ زڭْ لْكُوفَّارْ، إِعَارْضْ إِ كنِّيوْ ؤُ ثخْسمْ أَذْ ثْرَاحمْ، شّمْ زِي مَارَّا مِينْ ذ أَومْ إِ ذ غَا إِسَّارْسْ، وَارْ ثسّقْسِيمْ شَا خْ سِّيبّثْ ن ثْنفْسشْثْ. ◼10:‏27 ’ثَانفْسشْثْ‘ - نِيغْ: ’ضَّامِيرْ‘.  [w] 28 مَاشَا مَاڒَا حذْ إِنَّا أَومْ: ”ذڭَّا إِتّْوَاغَارْصْ إِ لْ-أَصْنَامْ!“، وَارْ زَّايسْ ثتّتّمْ ذِي طّْوعْ ن ونِّي ذ أَومْ إِعڒْمنْ ؤُڒَا ذِي طّْوعْ ن ثْنفْسشْثْ. 29 مَاڒَا نشّْ نِّيغْ ذِي طّْوعْ ن ’ثْنفْسشْثْ‘، وَارْ عْنِيغْ ثَانفْسشْثْ نْومْ، مَاشَا ثنِّي ن ونّغْنِي. مِينْزِي مَايمِّي غَا ثتّْوَاحَاكمْ ثْڒلِّي إِنُو س ثْنفْسشْثْ ن ونّغْنِي؟ 30 مَاڒَا نشّْ شَارْشغْ س ؤُوقَّارْ غَارْ ؤُمنْسِي، مَايمِّي غَا تّْوَاشقّْفغْ ذِي سِّيبّثْ مِيخفْ تّْقَاذِيغْ؟ [x]

31 خنِّي مَاڒَا ثتّتّمْ نِيغْ ثْسسّمْ نِيغْ ثتّڭّمْ شَا ن ڒْحَاجّثْ نّغْنِي، ڭّمْ ت مَارَّا إِ ؤُعُودْجِي ن أَربِّي. [y] 32 وَارْ تِّيڒِيمْ ذ ثَاعنْكْرِيفْثْ إِ وُوذَاينْ نِيغْ إِ إِرَامِييّنْ ؤُڒَا إِ ثْمسْمُونْثْ ن أَربِّي، [z] 33 أَمْ مَامّشْ ؤُڒَا ذ نشّْ أَرزُّوغْ أَذْ د-أَسغْ أَكْ-ذ مَارَّا ذِي كُوڒْشِي، وَارْ أَرزُّوغْ مِينْ إِدْجَانْ إِ ثِيزِي إِنُو، مَاشَا مِينْ إِدْجَانْ إِ ثِيزِي ن وَاطَّاسْ، حِيمَا أَذْ غَارْسنْ ثِيڒِي ثُوذَارْثْ. [aa]