1 ይንፓ ሱባ፥ ጳዉሎሳ አቴናፓ ኬዚ፥ ቆሮንቶሳ ቅትዳ። 2 እዘ አቂላ ጋዘ ጳንጦሳ የልንትደ ፈቲ አይሁደ አስ ደንግዳ። አይሁደ አሱንꬃና ኡባ ሮመፓ ኬሳደ ጋር ካት ቃላዉድዮሳ ኪትደ ግሾ ኤራꬅ ዎደፓ ቲኖ ኤ ፋ ማችት ጵርስቅላራ ጣለፓ ይእዳ። ጳዉሎሳ ኡንታራ የልንቶደስ Ꮉንግዳ። 3 ኤ ኦችታ ኡንትንጋራ ዱንካነ ስከ ማቅደ ግሾ ኡንታራ በቲ ዎላ ኦችዳ። 4 ጳዉሎሳ ሳምባታ ኡባ አይሁዱንꬃናን ግርኩንꬃና አማንꬆደስ አይሁደ ዎሳ ኬꬃ ሚንግ ኦህነ።

5 ስላሰን ጢሞትዮሳን መቀዶንያፓ ይእደ ዎደ ጳዉሎሳ ፋ ኩሙꬅ ዎድቶ እንግ አይሁዱንꬅስ የሱሳ ኤ፥ ክርስቶሳ ጋእ ቃላ ኦህዳ። 6 የዝን ኡን ጳዉሎሳ እጺ ኤዛ ጫዥን ጳዉሎሳ ፋ ማእትፓ ጹራ ትቅዝ፥ «ይን ጎምታ ይንታና የሎ፤ ታ ይነ የዞስ። ይኬፓ ሱባ፥ ታ አይሁደ ማቆሰ አሱንꬃጎ ቅታነ» ጋይዳ።

7 እዝፕ ኬዚ ጾዝ ጎይንዘ ትቶስ ኢዮስጦሳ ጋዘ አꬄ ካራ ቅትዳ። ኢዮስጦሳ ኬꬅታ አይሁደ ዎሳ ኬꬂ ካለ የነ። 8 አይሁደ ዎሳ ኬꬅት Ꮉላቅዘ ቃርስጶሳ ፋ ካራ አሱንꬅ ኡቡንꬃራ ላꬅ አማንዳ። ቆሮንቶሳ አሱንꬃፓ ጋሙንꬅ ጾዝ ቃላ ስእደ ዎደ አማኒ ጻማቅንትዳ።

9 ላꬂ ፈቲ ቃማ ጳዉሎሳስ በንቲ፥ «ዣሽትፐ፤ ኦሆ፥ ስእ ጋይፐ። 10 ታኒ ኔራ የነ። ታስ Ꮉና ካታምተ፥ ጋማ አስ የዘ ግሾ ነና ቆሂ ኢታበሳ ኦሎደ አስ ኦደን ባያ» ጋይዳ። 11 ይኒ ግሾ፥ ጳዉሎሳ ጾዘ ቃላ አሱንꬃና ታማርስተራ ፈቲ በረን እዝፑን አግና ኡንታራ በትዳ።

12 ጋልዮሳ አካያ ሳአ አህዘ ዎደ አይሁዱንꬅ ፈትላ ጳዉሎሳላ ደንዲ ፍርዳ ኬꬃ ኤዛ ካንግ፥ 13 «Ꮉይ አꬃይ ህገ እጺ፥ አሱንꬅ ጾዝ ጎይኖደ ጋር ዪዛነ» ጋይዳ።

14 ጳዉሎሳ ኦሆደስ ይአደራ፥ ጋልዮሳ አይሁዱንꬃጎ፥ «አይሁዱንꬆ፥ ይና ኢታ ኦቻ ዎይ ቆሄ ማቅኮ ታ ይን ባዝ ዳንዳእ ስኦደስ ቤዛነ። 15 የዝን ቃላስን፥ ሱንꬅስን ይን ህግትስን ይን ላልዘባዝ ማቅኮ ይን፥ ይንትስ ብሎተ፤ ይኖ ታ ፍርዶስ» ጋይዳ። 16 የይዝ፥ ኡንታና ፍርዳ ኬꬃፓ ባለ ከስዳ። 17 ይንፓ ሱባ፥ አሱንꬅ ኡባ አይሁደ ዎሳ ኬꬃ Ꮉላቅዛ ሶስተንሳ አይኪ ፍርዳ ኬꬂ ቲኖ Ꮉꬍዳ። የዝን ጋልዮሳስ ይና አኮን አዝካያ።

18 ጳዉሎሳ ጋማ ዎደ ቆሮንቶሳ ግዳ በትዳንፓ ሱባ አማንዘ አሱንꬃና ሳሮꬅ፥ ጵርስቅልራን አቂላራ ማርካበራ ሶርያ ቅትዳ። የዝን ኤ ቅቶዳንፓ ቲኖ ፋስ ቃይንግደባዝ የዘ ግሾ ክንክርያ ካታማ ፋ ኦምቶ መድንትዳ። [a] 19 ኡን ኤፈሶነ የልደ ዎደ ጳዉሎሳ ጵርስቅላን አቂላን እዘ አሽዳ። የዝን ፋስ አይሁደ ዎሳ ኬꬃ ገሊ አይሁዱንꬃራ ኦህንትዳ። 20 ኡን ፋራ ጋማ ዎደ በቶደ ጋር ጳዉሎሳ ዎስዳ የዝን ኤ እጽዳ። 21 ኡንታፓ ሻክንትተር፤ «ጾዚ ጋይኮ ይንታጎ ማቂ ዮኦዳ» ያጋእ ኤፈሶነፓ ማርካበራ ቅትዳ። 22 ቂሳርያ የልደ ዎደ የሩሳላመ Ꮉንግ ዎሳ ኬꬃ አሱንꬃና ሳርꬅዳንፓ ሱባ አንጾክያ ቅትዳ።

23 እዘ ኤራꬅ ዎደ ጋምእዳንፓ ሱባ አማንዘ አሱንꬃና ኡባ ምንꬅꬅተራ ጋላትያራን ጵርገራን አꬍዳ።

24 እስክንድርያ የልንትደ ፈቲ አጵሎሳ ጋዘ አይሁደ አስ ኤፈሶነ ቅትዳ። ኤ ኦሄ ኤርዘ አስን ጾዘ ቃላ ጋማ ኤርዘ አስ። 25 ኤ ላꬂ ኦግቶ ታማሪ፥ አያናራ ኤጺ የሱሳ ባዝ ሉለ ታማርሳነ። ማቆ የዝን፥ ዋሐንሳ ጽንቃተ ጻላላ ኤራነ። 26 ኤ አይሁደ ዎሳ ኬꬅተ ዣሽትካይዛራ ታማርሳነ። ጵርስቅላን አቂላን ኤ ኦህዛኖ ስእደ ዎደ ኤዛ ፋራ ካራ ካንግ ጾዘ ኦግቶ ቲኖስትፓ ጌሽ ኤስ ኦህዳ።

27 አጵሎሳ አካያ ቅቶደስ ኮይን ኤፈሶነ የዘ አማንዘ አሱንꬅ ኤ ቆፍቶ ኤኪ አካያ የዘ አማንዙንꬅ ኤዛ ሞኮደ ጋር ኡንትስ ዳብዳበ ጻፍዳ። ኤ እዘ የልደ ዎደ ጾዘ አꬎ ኬሃትꬅት ባጋራ የሱስ ክርስቶሳ አማንዱንꬃና ጋማ ማድዳ። 28 አኮስ ጋይኮ፥ የሱሳ ኤ ክርስቶሳ ማቅዛኖ አይሁዱንꬅስ ጾዘ ቃላፓ ቆንጭዝ አሱንꬅ ቲኖ ምንꬂ ኦህ ኡንታና ላꬅዳ።

<- ሐዋሩንꬅ ኦቻ 17ሐዋሩንꬅ ኦቻ 19 ->