1 ካሰንጋራ፥ ጳዉሎሳን ባርናባሳን እቆንዮነን አይሁዱንꬅ ዎሳ ኬꬃ ገሊ ጋማ አይሁዱንꬅን አይሁደ ማቆሱንꬅ አማኖደ ዎደስ ቃላ ኦህዳ። 2 የዝን አማንካይዘ አይሁዱንꬅ፥ አይሁደ ማቆሱንꬅ ዎዝንቶ ላሚ እሹንꬃላ ደንꬅꬅዳ። 3 ሐዋሩንꬅ እዘ ጋማ ዎደ ጋምእዳ። ኡን ዣሽትካይዛራ ላꬄ ባዝ ኦህዳ። ላꬂ ማላን ክሌ ባዝ ኡን ኦቾደ ጋር ኡንትስ አደትꬅ ዎልቃ እንግ ፋ አꬎ ኬሃትꬅ ቃልታ ቱሮ ማቅዛኖ ቤዝዳ። 4 የዝን የንꬅ ካታማ አሱንꬅ ሻክንት፥ ባግታ አይሁዱንꬃራ ባግታ ማህ ሐዋሩንꬃራ ማቅዳ።

5 አይሁደ ማቆሱንꬅን አይሁዱንꬅን ፋ Ꮉላቁንꬃራ ዎላ ማቂ ሐዋሩንꬃና ቆሆደስን ሹቻራ ꬎጎደስ ኮይዳ። 6 ሐዋሩንꬅ ይኖ ኤሪ፥ ልስጥራን ደርበ ጋእንትዘ ልቃኦንያ ካታሙንꬅ ግዳን ኡን ጉታ የዘ ሳአ አችንትዳ። 7 እዘ ዎንገለ ኦህዳ።

8 የልንትዳንፓ አይኪ ላምእ ቶህታ ዎቢን የꬊ ኤሮሰ ፈቲ አስ ልስጥራ የነ። 9 የ አꬃይ ጳዉሎሳ ኦሆደራ በቲ ስእነ። ጳዉሎሳ ኤዛ ዳኪ በእዘ ዎደ ፋጾደስ ኤስ አማኖ የዛኖ ብእ፥ 10 ፋ ቃልቶ ꬎቅ ዪዚ፥ «ሞሊ ነ ቶህትራ ኤቆ» ያጋይዳ። ዬዝን፥ ዶሊ ደንዲ ኤቂ የ አይክዳ።

11 ጳዉሎሳ ኦችዳኖ አሱንꬅ ብእ ፋ ቃልቶ ꬎቅ ዪዚ ልቃኦንያ ዶናራ፥ «ኤቁንꬅ አስ አዚ ኑጎ ዎꬍዳ» ያጋይዳ። 12 ባርናባሳ፥ «ድያ» ጋእ፥ ጳዉሎሳ ኦህዘ ዋንዘ ግሾ ኤዛ፥ «ሄርሜነ» ጋእ ሱንꬅዳ። 13 ካታማፓ ጋጻ የዘ ድያ ጎይኖ ኬꬃ ካህንዘን አሱንꬅ ኮርማን ቦንቾ ፉ ሐዋሩንꬅስ ዣርሾደስ ኮይ ካታማ ፉርꬃ ክእዳ።

14 የዝን ባርናባሳን ጳዉሎሳን ይኖ ስኤዘ ዎደ ኡን ኦቾደስ ቆፕዳኖ እጺ ፋ ማእቶ ፌꬍዳ። አሱንꬅ ግዳ ዎጺ ገሊ፥ 15 ፋ ቃልቶ ꬎቅ ዪዚ፥ «አሱንꬆ፥ Ꮉኖ አኮስ ኦቼተ? ኑንን ይን ፋና አስ። Ꮉና ፋꬆሰ ባዝትፓ ሳሎን ሳአን፥ አባ ኡን ግዳ የዘ ኡባባዝቶ መꬍደ ደኦ ጾዘጎ ይን ማቃደ ጋር ይንትስ ኑኒ ዎንገለ ኦህነ። [a] 16 ኤ ዛጋ አሱንꬃና ፋ ኦግቶ የꬋደ ጋር ዳኪ አሽዳ። 17 የዝን እራ ሳሎፓ ቡክዝዳ፥ ካꬃን ዎደር ዎደር እንግዳ፥ ካꬃ እንግ ይንታና ጋማ ኡፋይስዳ፥ የይዝ ይንትስ ሎኦ ባዝ ኦቺ ፋስ ማርካ ꬋብስካያ» ያጋይዳ። 18 ሐዋሩንꬅ ይኖ ጋእ ፋስ አሱንꬅ ዣርሻመ ጋር ዋይ ካይዳ።

19 አንጾክያፓን እቆንዮነፓን ይእደ አይሁዱንꬅ፥ አሱንꬃና ፋ ዛላ ማህ ሹቻራ ጳዉሎሳ ꬎግዳ። ኡንትስ ኤ Ꮉይቂደ ጋር አዝን ካታማፓ ጋጻ ጎቺ ካንግ ኦልዳ። 20 የዝን አማንዙንꬅ ይእ፥ ኤ ካለ ዉቲ ኤቀዝን ኤ ደንዲ ካታማ ገልዳ። ዎንትስት ዎደ ባርናባሳራ ዎላ ዳርበ ቅትዳ።

21 ኡን ዳርበ ካታማ ዎንገለ ኦህ ጋሙንꬃና አማንዙንꬃና ማህዳንፕ ሱባ ልስጥራ፥ እቆንዮነን ጵስድያ አንጾክያ ማቅዳ። 22 እዘ አማንዙንꬅ አማኖራ ሚንግ የሳደ ጋር ዞሪ፥ «ጾዘ ካእቱሞ ገሎደስ ኑኒ ጋማ ማꬋ ኤኮደስ ቤዛነ» ያጋእ ታማርስዳ። 23 ማህ ዎሳ ኬꬅስ ኦምተ ኦምተ ጭሙንꬃና ዶርዳ። ጾምዳንፓን ዎስዳንፓ ማቂ ኡን አማንዘ ላꬄስ ኡን Ꮉዳርቶ እንግዳ።

24 ጵስድያ ሳአ ካንꬂ አꬊ ጵንፍልያ ቅትዳ። 25 ጰርገን ቃላ ኦህዳንፓ ማቂ አጣልያ ቅትዳ። 26 ኢፓ ኡን ፋ ፎልደ ኦችትስ ጾዘ አꬎ ኬሃትꬅትስ ኡንትስ Ꮉዳራ እንግደ አንጾክያ ማርካበራ ማቅዳ።

27 አንጾክያ የልደ ዎደ ዎሳ ኬꬃ አሱንꬃና ሺሺ ጾዚ ኡንታራ ኦችደ ኦችቶ ኡባ አይሁደ ማቆሰ አሱንꬅ አማኖደ ጋር ኡንትስ ዋይዝ ፉርꬅ ቡገዛኮ ኦህዳ። 28 ኤዝን አማንዙንꬃራ ጋማ ዎደ ጋምእዳ።

<- ሐዋሩንꬅ ኦቻ 13ሐዋሩንꬅ ኦቻ 15 ->