1 Wawu nali, worou ara tehe hu ndramat mepo tupwotisingi lohongarou iya kili Yapan Yesu Kristus, mepo yiy namandran pe manonowan, pwen mbuna tukahire. 2 Kapa ndramat hamou kisuluye yiy kiya koyau lahayan pe kiyki mbunahai mbusiy iya pat kolt pe kisa nondriya numwa totohun tawawu, pe ndramat hamou indroisiy pe isuluye yiy iya koiwen ndramurin pe kisa nondriyan i, 3 pe kapa ahaiyani ndramat isuluye yiy iya koyau lahayan pe apa, <<Pwapwai tam sih hiyan iye,>> hapeko apwai kiya kili ndramat indroisiy ara apa, <<Wou, ara aro tine ara, ndre ampwan pwan ngilse ndriko,>> 4 pwen wawu kanmbusi hu ndramat kanmasilpat, wawu mbusi hiyan iya kili hamou, pe hamou ara pwi, pe tamwanye tawawu ara iyau lohongai ta payit.

5 Wawu nali para nere imwonen, akahilingiy: Ngindrai kintakinima hu mepo hu ndroisiy iya mara hu ndramat para kol pwan, para menmena mwoiwa hu andre kiya soyon, paratesah, iya lohongahu ndrisiyon. Pe hu mepo ndriyahu imbuluhi yiy, ara andre hu kaya kolo king mepo kintandrangan pwen kinna kili hu. 6 Hapeko wawu ngara kapwasimiri ngala hu ndramat mepo hu ndroisiy. Hu ndramat menmena hu soyon ara, ara ngara hu kaiki nopwaran kisa kili wawu, ndre pwi? Pe hu ngara kaluwani wawu pe akoro tine nongan, ndre pwi? 7 Yihu ara, ara ngara kapwasisiman ana Yesu Kristus mepo ngalan hiyan, pe wawu ara atan, ndre pwi? 8 Kapa wawu kambultuwe tisingi nongan para pwahanou ata king ita Nongan Haiyan ipa, <<Ndriyam kimbuluhi yiy para pakeh kili wou tehe wou mbukenam,>> pwen wawu tora mbusi kultuw hiyan. 9 Hapeko kapa wawu kahire hamou kiya hiyan kiyata hamou, ara wawu mbusi pakut mwomwan, pe nongan para pwahanou isuhuhuri wawu tehe wawu kandrihisani nongan para pwahanou. 10 Paratesah, sehe ndramat kiho ndruwa nongan para pwahanou masih, hapeko kapa kindrihisani sahin para aliy, ara kinwiri mwomwan, pe indrihisani nongan para pwahanou masih. 11 Paratesah, Ngindrai mepo kinpa, <<Mbuna apo pilah,>> pe ipwai i ipa, <<Mbuna atingundru ndramat.>> Pwen kapa anpo pilah pwi, hapeko atingundru ndramat, ara wou ndramat hamou para ndrihisani nongan para pwahanou.

12 Pwen akawong pe akambusi melit tehe hu ndramat mepo Ngindrai andre kiyki worou koro tine nongan kiya nongan para pwahanou mepo imbusi worou topo mwoimwoi iya hu pakut mwomwan. 13 Paratesah, kiro mwonen lang para Ngindrai kiramwanye, ara andre kinpwaingani koisirai kinna kili hamou mepo koisirai kinto kili yiy pwi. Koisirai ta Ngindrai ara iramwaitini tamwanye tan!

14 Wawu nali, sehe melit hiyan kapa ndramat hamou kipa lohongai ndrisiyon kiro kili yiy, hapeko kinmbusi hu kultuw hiyan pwi. Ilahi lohongai ndrisiyon tan kisopwat yiy, ndre pwi? 15 Kapa nalim hamou ndre pisum hamou ara koiwen pwi, pe anandrinan para lang sih-sih pwi, 16 pe kapa hamou tawawu kipwai kiya kili yiy kipa, <<Ayau ayapolo ndriya wayis; pe aro ngandrah pe anamnam hiyan.>> Hapeko anhang yiy hapesah para namiliwan para nombuwen pwi, pwen tesah hiyan andre awiriy kiyau aliy? 17 Pe tehen aliy o, kapa lohongai ndrisiyon kinpwaingani kultuwayin pwi, pwen lohongai ndrisiyon ara, ara meren.

18 Hapeko hamou andre kipa, <<Lohongai ndrisiyon ita kili wou; yo ngara kumbusi hu kultuw hiyan.>>

Lohongai ndrisiyon tam mepo anoho mbusi handra melit kinyau aliy pwi, ara apwainganiy kisa kili yo. Pwen andre kupwaingani lohongai ndrisiyon to mepo ngara kumbusi melit kiyau aliy.

19 Pe apwotisingi lohongam tehe Ngindrai ara hamou opu. Ara hiyan! Hu payit i, ara hu pwotisingi lohongahu pe hu lelen iyapolo nohowai.

20 Lohongam kinna pwi! Andre kupwainganiy kisa kili wou tehe lohongai ndrisiyon mepo hu kultuw hiyan kinto aliy pwi, ara melit mwaihei o? 21 Tumburou Apraham kultuwayin imwonen iya kili Ngindrai, ara iya tesah imbusiy iro mwonen iyki norun Yisak tehe yukyuk iro ndrita pere tuntun. 22 Apahasaniy, tehe lohongai ndrisiyon ta Apraham pe hu kultuwayin hiyan ara imbusiy iyawule. Pe lohongai ndrisiyon tan ara imbusiy iyahapwen pe hiyan o iya tesah kinmbusiy pwen. 23 Pe Nongan Haiyan, ara irayah mannan ipa, <<Apraham ara iyki lohongan ndrisiyon iya kili Ngindrai, pe pohowe yiy ara ndramat kultuwayin imwonen,>> pe Ngindrai ngara kiyoh yiy, ara kowasen. 24 Pwen akapahasaniy tehe, ndramat hamou irayah ndramat imwonen ara iyau tesah imbusiy, pe kinyau lohongai ndrisiyon o, ara pwi.

25 Pe iyawule ko tehe Rahap pihin para pilah, ara pohowe yiy pihin imwonen iya tesah imbusiy iya kili ndramira tandrihindrih malmou iro mwonen ipwokere hilu iro suwen, pe ipwandrisa hilu hilyau hilya pwen sai hasai i. 26 Tora ko, kapa ndramat manombuwen, pe kunuwen pwi, ara ndramat ara kinmat. Pe kapa lohongai ndrisiyon kanmbusiy hu kultuw hiyan pwi, ara meren.

<- Yamis 1Yamis 3 ->