Yamis

Yo uratuluwi nongan iya kili wawu kamaye Yisrayel songui pe luwum mepo wawu kanmasumbuwe kanna kene kol pwan masih:

Ndrokololang hiyan tawawu.

2 Pwen wawu nali, akalohongani nokulani hu nopwaran handra-handra nakaya nondriya hu, ara kirayah pwesai imwonen kisa kili wawu. 3 Paratesah, akapahasaniy tehe nohonou para lohongai ndrisiyon tawawu, ara andre kimbusi wawu koro tine pwokeyan. 4 Pwen akoro tine pwokeyan nondriya hu nopwaran, pe andre kimbusi wawu akapahas pe akamandra, pe kultuwayi wawu andre kimbusi wawu akandroisi hapesah pwi. 5 Pe kapa hamou tawawu kinamili lohongai waison, ara akasok Ngindrai pe andre kiykiy kipopo ko kisa kili wawu pe andre kinpomate wawu pwi, pwen andre kiykiy kisa kili wawu. 6 Hapeko kapa hiyeh kitohun kiya kili Ngindrai, ara kipwotisingi lohongan pe mbuna kihindrundru, paratesah, yiy mepo ihindrundru, ara tehe nowei sih para ndras mepo nohai iro mbuiwaniy iya isa. 7 Pwen ndramat tehen tora, ara mbuna kilohonganiy para kipo hapesah kiyau kili Yapan. 8 Pe ndramat tora, lohongan ara malndra, pe lohongan kinoho kuw iya melit imbusiy, ara pwi.

9 Pe hu ndramat hupwotisingi lohongahu pe menmenahu pwi masih, ara hu kapwes, paratesah, Ngindrai ihaiyani hu. 10 Hapeko yiy mepo menmenan soyon, pe isikiye yiy, ara Ngindrai andre kimbusi ngalan kiya pwi, paratesah, yiy andre kiwayuw tehe nonou sih para yangiy. 11 Paratesah, mwandrai ara ingas iyapolo ngandrahan para aliy pe ngara kitimwi ndromndriu pe kimang. Pe nonou mepo isahambunet pe lahayan iya, ara andre kihipwen o mwaihei. Pwen tehen tora ko, ndramat mepo menmenan soyon, ara andre kihipwen o mwaihei, konan kiro mbusi mbulyan kiya.

12 Ndramat mepo iya nondriya nopwaran pe iro tine pwokeyan, ara kipwes, paratesah, kapa kiro tine pwokeyan nondriya nohonou, ara andre kiwiri kasapai para taleh mepo Ngindrai kintandrangan kinna kili hu mepo ndriyahu imbuluhi yiy.

13 Pe kiro mwonen wawu kaya nondriya hu hinonou, ara wawu mbuna akapa, <<Ngindrai ipakarawani yo pe umbusi pakut mwomwan.>> Paratesah, tukapahasaniy tehe kultuw mwomwan ara kinlahiy para kipakarawani Ngindrai para kimbusi pakut mwomwan pwi. Pe Ngindrai yi, ara kinho pakarawani hamou kiya hu kultuw para pakut mwomwan pwi. 14 Hapeko ndramat hamou-hamou ngara kiya nondriya nohonou, ara kiyau ndruwa namiliwa mwomwan tan mbukenan, pe namiliwan ngara kiluwani yiy pe kimbusi pakut mwomwan. 15 Pe namiliwai para nombuwe ndramat ara tehe pihin hamou mapundriyan pe imwalahiy iyata pakut mwomwan, pe kiro mwonen pakut mwomwan kimandra tisingiy, ara andre kiyki kimat.

16 Pwen wawu nali mepo nere imwonen, lohonga wawu mbuna kipakarawani wawu. 17 Pe tesah masih mepo hiyan, pe yukyuk imwonen, ara iyau paingan pe isa pwan, iyau kili Tamarou mepo imangsani hu nganan para kol paingan yang. Pe yiy kinho rapaiwani yiy tehe sumwoiwa melit ngara kirapaiwaniy kiya kisa, ara pwi. 18 Pe iyau namiliwan opu, mwoiwa rou iwiri taleh iyau nongan ndrokonan. Pwen andre worou karayah tehe anandrinai imu iyau melit masih mepo imangsani hu.

19 Wawu nali mepo nere imwonen, akapahasani melit aro: Wawu masih akahilingiy kileh, hapeko wawu mbuna akahambuh para akawong pe ndriya wawu mbuna kilokuh kileh. 20 Paratesah, ndrinalokuh ta ndramat, ara kinhoiki kultuw imwonen para taleh mepo Ngindrai inamiliy, ara pwi. 21 Pwen pe akatali hu kultuw masih pwassin, pe akaiki wawu kaya pwan, pe akoho ndruwa nongan mepo Ngindrai kiniykiy kinhan pwen ita nondriya wawu mepo andre kisopwat wawu.

22 Pe wawu mbuna akahalingi nongna Ngindrai o, hapeko akambusi tesah ipwai. Pwen andre akanpwaske wawu mbukenan pwi. 23 Pe yiy mepo ihilong nongan hapeko kintokuyani tesah nongan ipwai pwi, ara tehe ndramat hamou inime mbulmaran iya kemet sih, 24 pe inime yiy mbukenan ihipwen, pe iyau, pwen indrou pwi ko koyun kinmayit mbulmaran inimnim tapeh. 25 Hapeko ndramat mepo inime nokulani nondriya nongan para pwahanou imwonen masih mepo iyki worou topo mwoimwoi, pe iro mbusiy toro manau, pe koyun kinmayit tesah ihilingiy pwi, hapeko iro mbusiy—ara andre kiwiri lomwes kiya tesah imbusiy.

26 Kapa ndramat hamou kipa yiy ndramat para totohun iya kili Ngindrai, hapeko kinoho ponokulani pohon pwi, ara ipakarawani yiy mbukenan, pe totohun tan ara mwaihei o. 27 Kultuw para totohun mepo Tamarou Ngindrai inamiliy mepo imwonen masih, pe mwomwan kinto aliy pwi ara aro: Akapwokere hu noru tapo, pe hu pihinau kiya nopwaran tahu, pe akoro mawen kultuw mwomwan para kol pwan mepo andre kimangani wawu kaya mwomwan.

Yamis 2 ->