Hawaaritay Ooso 2

Geesha Ayyana wodhith

1 Phenxeqosxe giz gallasay helleez wode ammaniza as ubbay pettii aqo shiiqii yeza.[a] 2 Qoppekkazin wolqqama gote garkk guummiz guumthay salopp yi7ii unttii yez keetha kumeeza. 3 Tama lath aaziz iranthitay unttis benttittar, shaginttii shaginttii unttal ubbayil afa beteeza. 4 Unttii ubbay Geeshsha Ayyanar kumii duma duma doonar odinttoday garkk Geeshsha Ayyanay unttan udin odintto aykkeeza.

5 Ye wode biitta ubbapp ye7eez Xoossis yashittiz Ayihuditay Yerusalaame yeza. 6 Ye guumtha si7ii gaame asay shiiqeeza. Ammaniza asay u gade doonar odinttodar si7eez gishos 7 yhay malabaz gi, «Yha odinttiza as ubbay Galila as baasa? 8 Yeezin, nuunii, nu yelintteez biitta doonar unttii odinttodar wayizii si7odayis danda7eenee? 9 Nuunii Pharixe, Meede, Elaame, Mesophotaame[b] yezitay, Yihuda, Qaphadooqa, Phanxoosa, Iisiya, 10 Phirge, Phinfile, Gibxxe, Qaarina achcha yez Liiba yezita. Nuupp baggityikka Oroomepp ye7eez asita. 11 Ayihuditaynnee Ayihudetitha ammano geleez asitay, Qarxeesannee Arabe asitay, Xoossii ootheez gita oosa nu qaalayir ododar si7iza» yeegeeza. 12 Ubbay malabaz gi, godibaz dhabin woliko, «Yhayi ab maaqqodeshsha?» yeegeeza. 13 Zin yhankkitay, «Yeyititay uzhii matheembay» yeegii unttal ari7eeza.

Phixiroosa nashsha

14 Zini Phixiroosa, taphpho pettii hawaaritayira denddii eqqii, fa qaala dhoqq udii, unttiko yhay garkk yeegii odeeza: «Ayihuditayyo, Yerusalaame yez ubbitayo, taanii odiza si7oytta. 15 Wonttapp hayidzii saate maaqqeez gishos yi qoppizay garkk yha asitay mathekkaya; yey yinttis erintto. 16 Zin yhay haneezay nabe Iyu7eela odeezay polinttoday garkkes

17 «‹Xoossii, wode wurssitha yhay garkk hanoda yeegiza:

taanii as ubbayil afa ta Ayyana gogisoda.

Yi dhiirath na7itaynnee maachch na7itay,

tinbbite ododa.

Yi paanthitay qonccith be7ada;

yi cimitay ahumo ahumoda.[c]

18 Ye gallasitayid tana

ammaniza dhiirathi ayllitayil afannee maachch ayllitayil afa

taanii ta Ayyana gogisoda;

unttii tinbbite ododa.

19 Ma taanii afa salor oroth baz,

oommo sa7arakka malla beezoda.

Suuthii, tamannee wolqqama cuya fuullo benttoda.

20 Gitannee bonchcho maaqqeez Goday gallasay

hellodaypp tiina awa dhumoda;

aginakka suuthii aazoda.

21 Ye wode yhay garkk hanoda;

Goday sunth xeegiz oonkka attoda›

yeegeeza.

22 «Isreele asayyo, yha qaala si7oytta. Naazirete Yesuusa oonatithay, Xoossii yi gancce ootheez wolqqama oosayirannee malatitayir yinttis qoncciza yi, yi ubbas eriza. 23 Xooss tiina fa erarannee fa shenayir Yesuusa yinttis aadhii inggintteeza. Yi eza higge baa asitay kusher mazqalel afa sottis yi wodheeza.[d] 24 Zin Xooss yhayiqo wolqqa dhabisii eza dentheeza. Yey gishos, yhayiqo eza aykkodayis danda7ekkaya.[e] 25 Dawute ebagga odittar,

«‹Taanii dagammaamay garkk,

Goday ta ushachcha yeza.

Goda ubba wode ta ta tiina bi7iza.

26 Yey gishos, ta wozinay ufaytteeza;

ta doonay ufayssar kumeeza;

yhayqqiz ta asetithay ufayisar yezoda.

27 Abis giiko, ta shemppa Si7oole ashshaamii.

Ma ne Xillay aha wooqqithaami.

28 Neenii tana de7o oga eriseeza.

Ne taar yezay gishos ta ufayssay kunith maaqqiza›[f] yeegeeza.

29 «Ta ishuntho, nu ada Dawute bagga ta yinttis geeshshii ododa. Dawute yhayqqii moogintteeza; e duufay yhayino hellodayis nu kale yeza. 30 Dawute nabe maaqqeez gishos Xooss e sheeshaypp petta e kaatetitha zufaanayil afa betithodayis ees caaqqeez caaqa eriza. 31 Yeyi gishos, Kiristtoosa dendda tiina bi7ii, ‹E shemppay Si7oole attekkaya; e asetithaykka wooqqekkaya› gi odeeza.[g]

32 «Xoossii, yha Yesuusa yhayiqoypp dentheezayis nuunii ubbay markka. 33 Yey gishos, Xoossii fa ushachcha eza dhoqq dhoqq udii, ees inggod ginttintteez Geeshsha Ayyanay ufayisa fa Xooss Adaypp ekkii, yhaya yi yhatti bi7izannee si7iza nuul afa gogiseeza. 34-35 Yeykka, Dawute fa ommas salo yhangekkaya zin:

«‹Goday, ta Goda,

«Taanii ne morkkita

ne tokes yedhdhith aqo udod hellodayis

yhaydda taapp ushachch bagga bettoba geeza»

yeegeeza.[h]

36 «Yey gishos, yha yi mazqalel afa sotteez Yesuusa, Xoossii eza Godannee Kiristtoosa maheezana Isreele as ubbay tumapp ero» yeegeeza.

37 Asay Phixiroosa geeza si7in u wozinay bochinttin Phixiroosannee yhankko hawaaritayko, «Nu Ishuntho, yeezin nuunii ab udo?» yeegeeza.

38 Phixiroosa unttiko, «Yi nagaray atto ginttinttoday garkk nagaraypp maaqqii, yi pettay pettay Yesuus Kiristtoosa sunthar xammaqinttoytta. Xooss inggiza Geeshsha Ayyana yi ekkoda. 39 Yeykka Xoossii inggod geez ufayss qaalay yinttisii, yi na7itayisinnee Goday nu Xoossay faak xeegiz haakko yez ubbitayis» yeegeeza.

40 Phixiroosa unttis hara qaalakka gujjii markkattii, «Yha wode zhuca asayil afa ye7odayis yez pirddaypp yinttan ashshoytta» yeegii zoreeza. 41 Phixiroosa odeezana ekkeezitay xammaqintteeza. Ye gallas hayidzii mukule maaqqiz asay ammanii gujintteeza. 42 Unttii hawaaritay timirttayid, pettipettithar, katha wolla muusarannee Xooss woosar miinggeeza.

Ammaniza asay pettipettith yess

43 Hawaaritay kushe gaame oorothibazinnee malabaz haneezay gishos as ubbay yashitteeza. 44 Ammaneez ubbitay wolla yeziza; paas yeza baz ubba pettipp shagintteeza.[i] 45 Unttii paas yeza baz bayizii miishe pettayis pettayis koshshizay garkk shagiza. 46 Ubba gallas pettii wozinar maaqqii Xooss kara shiiqiza. Fa kara pettay petta xeegii ufayssarannee ashikke wozinar katha miiza. 47 Xooss galatittar as ubbayir sabintteeza. Goday ammanii attizita gallas gallas unttal afa gujjiza.

<- Hawaaritay Ooso 1 Hawaaritay Ooso 3 ->