Hawaaritay Ooso
Gelo
Hawaaritay ooso maxaafay, Luqaasa Wonggilepp kaallii xaafintteez maxaafe. Yha Maxaafayis yez waanna qofay tiina Yesuusana kaalleez asitay Geeshsha Ayyanay kaalithin, ebaz odiza wonggile qaala, Yerusalaame, Yihuda biita ubbayil, Samaare, sa7a gaxapp gaxa hellodayis (1:8) wayizii heltheezako ododiza. Maxaafay, ammano Ayihude asitaypp aykkii, kunth alamel yez as ubbayis amo maaqqod hellodayis wayizii dalggeezako odiza taarike. Ya maxaafa xaafeezay, ammaniza asitay Oroome kaatetitha laalodayis ganccer tobinttiza asi baazannee ammano Ayihuditay haymaanote folo oothiza maaqqeezana erisodayis miinggii ootheeza.
Hawaaritay ooso maxaafayid Yesuusa bagga odiza Wonggilay helliza aqo uba wode dalggittar dalggittar yhanigizannee woosa keeth eqqo qonccisiz hayidzii aafe aqo shaakkinttodayis danda7iza:
1. Ammano Yerusalaame jammareezay Yesuusa salo kezini.
2. Ammano Isreele gade ubba hello bagga.
3. Oroome gujjii Meditiraane Abba yuushar yez gade ubbayid dalggeezana beeziza.
Hawaaritay ooso maxaafayid aadhii benttizay Geeshsha Ayyana ooso maaqqodar, Phenxeqosxe gallas Yerusalaame yez ammanizitayil afa wolqqar wodhdheezana odiza. Yey garkkekka, maxaafay gancce qoncceez oosita ubbayil bentteezay garkk Geeshsha Ayyanay woosa keethinnee woosa keeth aqisizita kaalitheezannee minthatheeza gujjii odiza. Hawaaritay oosay gancce oosintteez oositaykka kiitay ammaniza asay de7olannee woosa keeth pettipettithayid yez wolqqay ab garkk dammazako beeziza.
Hawaaritay oosay aykkeez qofita
Markkatethis giigintto 1:1-26
Yesuusa wurssith kiitannee Geeshsha Ayyanna bagga inggeez qaala 1:1-14
Yihuda aqo Maataasa doorintto 1:15-26
Yerusalaame markkattithii 2:1—8:3
Yihuddannee Samaare markkattith 8:4—12:25
Phawuloosa hawaaretith oosa 13:1—28:31
Tiina hawaaretithis yhanigo 13:1—14:28
Yerusalaame shiiqo 15:1-35
Nam7antho hawaaretith yhanigo 15:36—18:22
Hayidzanth hawaaretith yhanigo 18:23—21:16
Phawuloosa Yerusalaame, Qisaarannee Oroome acinttitha 21:17—28:31

1-2 Tewofiloosa, Yesuusa fa oosa aykkeez wodepp salo yhanigeez gallas hellodayis, ootheezibazinnee tamaarsseezibaz ubba taanii ta tiina maxaafayid xaafeeza. Salo yhanigodaypp tiina E fa dooreez hawaarita Geeshsha Ayyanar azazeeza.[a] 3 E fa iita waaya ekkeezaypp guye yhayiqopp denddeezana gaame markkatithar sidhe baazin qonccisii unttis fana beezeeza. Oyttam gallas unttis qonccii Xooss kaatetithibagga unttan taamarsseeza. 4 Pettii wode unttara wolla yezar unttan yhayigarkk yeegii azazeeza: «Ta yinttis odeeza, ta Aday immad geez ufayss qaala naagoyttapp attin Yeruselaamepp kezippate.[b] 5 Abis giiko, Waannisa haathar xammaqqeeza, zin xiqqa wodepp guye Geeshsha Ayyanar yi xammaqinttoda» yeegeeza.[c]

Yesuusa salo yhanigeeza

6 Hawaaritay Yesuusana hellii eeko, «Godayyo, Isra7eelitayis ne kaatetitha mahiz woday yhayanee?» yeegii oyceeza.

7 Yesuusa unttiko, «Ta Aday fa mawuter oothiza wodannee laytha yi erodayis danda7ooya. 8 Zini Geeshsha Ayyanay yinttal afa wodhdhiz wode yi wolqqa ekkoda. Yeypp, guye Yerusalaame, Yihuda gade ubbayil, Samaarerannee biitta gaxapp gaxa hellodayis yi taas markkita maaqqoda» yeegeeza.[d]

9 Yeya geezaypp guye unttii be7adar, dhoqq dhoqq gi, salo kezin shaarakka eza u aafaypp geentheeza.[e]

10 Yesuusa yhammadar unttii salo fude be7adar, booth ma7o ma77eez nam77ii asitay qopekkazin u achch baggayir eqqii, 11 «Galila asayyo, salo bi7ittar, yi abis eqqeenee? Yha yi be7adar salo qiteez Yesuusa yhannii garkk maaqqii ye7oda» yeegeeza.

Yihuda aqo Maataasa doorintteeza

(Mat. 27:3-10)

12 Yeypp guye, hawaaritay Dabire zayite Ambalapp Yerusalaame maaqqeeza. Dabire zayite Ambay Yerusalaamepp maala gallasa yedhith garkk haakiza. 13 Unttii Yerusalaame gelii, fooqeel afa kezeeza. Unttikka[f]: Phixiroosa, Waannisa, Yayqqooba, Indiraase, Filphoosa, Toomaasa, Barttolomoosa, Maatoosa, Ilfoosa na7a Yayqqooba, Qanataza[g] Simoonannee Yayqqooba na7a Yihuda.[h] 14 Yhayttitay ubbay maachchitayr, Yesuusa indat Maaramirannee Yesuusa ishitayira ubbay pettii wozinar maaqqii ubba wode miinggii woossiza.

15 Ye wode Phixiroosa xeetannee laatam maaqqiz ammaniza asay shiiqeez aqo denddii eqqii, yhay garkk yeegeeza: 16 «Ta ishuntho, Yesuusana aykkeezita kaalitheez Yihuda bagga Geeshsha Ayyanay tiina Dawute doonar odeez Xooss qaalay polinttodayis beeziza. 17 Yihuda nuur wolla yha oosa oothodayis maraxintteez asii.»

18 Zin Yihuda iita oosor denggeez miishayir gade wonggeeza. E sinor pokkin, e ulay peedhinttin; e maracay zazintteeza. 19 Yihudal afa haneezibaza Yerusalaame yez as ubbay si7eeza. Yey gishos, ye gada fa gada doonar «Akalddaama» geeza. Akelddaama guusay Suuth biitta guussii.

20 «Yeykka mazmuure maxaafayid,

«‹E karay kallo atto;

oonkka ezayid yezippee.

Ma e shuumatitha haray ekko› ginttinttii xaafintteeza.»

21 «Yey gishos, Goda Yesuusa nu gancce yezeez wode ubbayid nuur yezitayppe, 22 ma Xammaqiza Waannisa wodaypp aykkii Goda Yesuusa salo yhanigeez gallas hellodayis nuur yezitaypp pettii asii e denddayis nuur markka maaqqodayis beeziza» yeegeeza.[i]

23 Yey gishos, asay doorodayis Yosixoosa giz Barssabaasa ginttinttiza Yooseefannee Maataasa nam7ita shiisheeza. 24 Yeypp guye, Xooss woossittar, «As ubba wozina eriza Godayyo, yha nam7itaypp ne oona dooreezako nuna beezoba. 25 Yihuda fa aqa qitii, ashsheez oosannee hawaaretith oosa ekkoday garkk yhayttitaypp nuna beezoba» yeegeeza. 26 Unttal afa ixa olin Ixay Maataasal afa wodhdhin Maataasa taphpho pettii hawaaritayll afa guzhintteeza.

Hawaaritay Ooso 2 ->