1 ጾስ ጎይኖኔ ቦንቾ ኩሜዝ ደኦር አሳይስ፥ ዎሶዳይስ፥ ጉሮዳይስኔ ጋላቶዳይስ ቤዝዛና ታኒ ነና ዞርዛ። 2 ኑኒ ሎኦ አያና የሳራኔ ጌሸትꬃር ጾስ ጎይንታር ሳሮትꬅራኔ ዳጭ ጌዝ የስ የዞዳይ ጋርክ ካትታይስኔ ሹምታይ ኡባይስ ዎሶይታ። 3 የይ ጋርክ ዎሳይ ኑና አሽዛ ጾሳይ ቲና ሎኦኔ ኡፋይስዛባዚ። 4 ጾሲ አስ ኡባይ አቶዳይ ጋርከኔ ቱማ ኤሮዳይ ጋርክ ኮይዛ። 5 ፐቲ ጾስ የዛ። ጾስስኔ አስስ ጋንጨ ማቂ ዳቦꬅዛ ፐታይ የዛ፤ ኤካ አስ ማቄዝ ክርስቶሳ የሱሳ። 6 ኤ አስ ኡባ ዎዞዳይስ ፋና ኣꬂ እንጌዛ። ጾሲ ፋ ዎደር አስ ኡባ ዎዞዳይስ ኮይዛና ቤዝዛ ማርካይ Ꮊያ። 7 ጾሲ ታና ዎንግለስ አስታማረኔ ሀዋረ ኡዲ ዶሬዛይ የይሲ። ታኒ ቱማ ኦድዛ፤ ዎርዶቶያ፤ አማኖኔ ቱማ ቃላ አይሁደ ማቀካ አሳይስ ታማርሶዳይ ጋርክ ጾሲ ታና ሹሜዛ። [a]

8 የይ ግሾስ፥ ኡባ አቆ የዝ ꬊራꬅታይ፥ ፋና ጾሳይስ ዱማሲ፥ ዋችኔ ካች አሺ፥ ፋ ጌዤዝ ኩሽታ አፋ ደንꬂ ጾስ ዎሶዳይ ጋርክ ታ ኮይዛ።

9 የይ ጋርከካ ማችታይ ፋ ኦማ ዳꬃራ ዎይ ዎርቃራ ዎይ እንቆ ዎርቃራ ዎይ አልኦ አፍላር ፋና ቡቁሮር ባዝን፥ ያሻትꬃራኔ ሃዮትꬃር ቤዝዛ ዎማኖትꬅ አፍላ ማኦ። [b] 10 ዝን ጾሳይስ ታ ጎይንዛ ግዝ ማችታይ ፓስ ቤዝዛይ ጋርክ ሎኦ ባዝ ኦꬆ።

11 ማቺ ኡባ ባዛር ኪትንትꬃር ስእ ግ ታማሮ። 12 ታኒ ማችታይ ታማርሶዳይ ጋርክ ዎይ ꬊራꬃል አፋ ማዉተ ኤኮዳይ ጋርክ ባዝን ስእ ግ የዞዳይ ጋርክ ኮይዛ። 13 አዳማ ቲና መꬍንቴዛ፤ ጉየፐ ህዋና መꬍንቴዛ።[c] 14 ዶሽንቴዛናኔ ጾስ ህጋ መንꬄዛን ማቻትፕ አትን አዳማ ባያ። [d] 15 ዝን ማቺ አማኖር፥ ሲቆራኔ ጌሻትꬃር ፋና ሃሪ የዝኮ ናእታ የሎር አቶዳ።

<- 1ጽማቶሳስ 11ጽማቶሳስ 3 ->