1 ታኒ አስ ዶናራኔ ኪታንቾ ዶናር ኦድንቶዳይስ ዳንዳእኮካ፥ ታስ ሲቆ ꬋብኮ፥ ጊርዝ ዳላ ዎይ ኦሽዝ ዎርለ ጋርከ። 2 ትንቢተ ኦድዝ እሞታ ታስ የዝኮካ፥ ጹራ ኡባ ኤርኮካ፥ ኤራትꬂ ኡባይ የዝኮካ፥ ማ አምባ ደንꬂ ሀራ አቆ ካንግዛ አማኖ ታስ የዝኮካ፥ ሲቆ ꬋብኮ፥ ታ ጨር ሀንዛ። [a] 3 ታስ የዛ ባዝ ኡባ ማንቆስ እንግኮካ፥ ሀራ አቶዝን፥ ታና ታማስ ኣꬂ እንግኮካ፥ ሲቆ ꬋብኮ ታና አኮካ አዳሚ።

4 ሲቆ ዳንዳእዛ። ሲቆ ኬሃ። ሲቆ ቃናቶያ። ሲቆ ጬቅንቶያ። ሲቆ ኡትርቶያ። 5 ሲቆ ቤዞዋባዝ ኦꬆያ። ሲቆ ኡዛቶያ። ሲቆ ይሎቶያ። ሲቆ ቆሆ ፓይዶያ። 6 ሲቆ ቱማር ኡፋይትነፕ አትን ዎርዠር ኡፋይቶያ። 7 ሲቆ ኡባ ዳንዳእዛ፤ ኡባ አማንዛ፤ ሎኦ ባዝ ሀኖዳ ግ፥ ኡፋይሳር ናግዛ፤ ኡባ ባዛር ሚንግዛ።

8 ሲቆ ዉርስꬂ ሄሎዳይስ ꬋቦያ። ዝን ትንቢተ አቶዳ፤ ዱማ ዱማ ዶናር ኦድንትዛይ አቶዳ፤ ኤራትꬃይካ ኣꬎዳ። 9 ኑ ኤራትꬃፕ ላፋ ኤርዛ፤ ትንቢተፕ ባጋ ኦድዛ። 10 ዝን ፎሎ ማቄዛይ የኤዝ ዎደ ፎሎ ባዛይ አቶዳ።

11 ታኒ ናአዛር ናአ ጋርክ ናሽዛ፤ ናአ ጋርክ ቆፕዛ፤ ናአ ጋርክ አካክዛ። ታ ዎዛናማ ማቄዝ ዎደ ናአትꬅ ሀና አሼዛ። 12 Ꮊት ፖኦ ባ አቆ ማስቶተር ብእዛይ ጋርክ ኑ ብእዛ፥ ዝን የ ዎደ ኑ ቆንጨር በአዳ። Ꮊት ኑ ኤረትꬃፕ ጽቃ ኤርዛ፥ ዝን የ ዎደ ጾሳይ ኑና ኤርዛይ ጋርክ ፎሎ ኤሮዳ።

13 ይኬ፥ አማኖ፥ ኡፋይስኔ ሲቆ፥ Ꮊ ሃይꬒታይ ኤቂ የዞዳ። ዝን Ꮊይትታይፕ ኣꬍዛይ ሲቆ።

<- 1ቆሮንቶሳ 121ቆሮንቶሳ 14 ->