Ittẹwọr 3

Ocheden-jinọng ọmaana kwanọng kwẹ atzam ọsana

1 Iwa jọhk dọ edongi, ẹyọhnga nden s'ẹtzam biphyir, s'Ọvaar Ibinọkpaabyi ọkk'ọsa. Wa jọhk ẹtza ẹbọbh kwanọng nwa bi, “Ode odik-ọkka bi, Ibinọkpaabyi obeni bi, bọng aningi echi kpenamkpen m'owoni nwa achi o?”

2 Kwanọng nwa oben jọhk bi, “Nnh, nnh! Kwẹ mando kode! Ibinọkpaabyi obeni man bi, mofho ochi achiduk pa nchi si mbe mowoni ochi e, 3 yina, Ibinọkpaabyi on-obiro oben man bi, man kọ̀khaambi, ochi achiduk p'echi nduma ch'ebe m'ewonittem, man kọ̀khaambi ọttọhmi chẹ, oni mando ode, mópope.”

4 Jọhk nda eben kwanọng nwa bi, “Bọng kápe e, 5 okhinggẹ ode bi, Ibinọkpaabyi orong bi, idikha bọng achi achiduk mba, bọng are idik ittaani bọng bi ttaaan, bọng an-abira ade mach'Ibinọkpaabyi kw'orong ejibha ọmaana epyibha.”

6 Mẹ wọ, mada kwanọng nwa ore bi, achiduk p'echi nda ajibh-ojibh k'ọchattọhk, bẹ abira anyu-onyu ka chen, ttara bi, bẹ afha anang ọnọng etzim-nonga, ọtzọkha bani ochi, obiro ọtzọkha ọnang odim kwẹ, kw'owobh mẹ ttara kẹ, odim obiro ọtzọkha ochi. 7 Mẹ ẹbaa nduma, chen attaani bẹ anọng afa, bẹ atzin bi, bẹ an-awobh irinikhum. Mẹ wọ, bẹ an-atzọkha akwongitzọhng p'echi cha fig, akhum ekpo abubha irinikhum sabẹ.

8 Okwu opyiri ma nchọhkha-bọhk, ojinọng ọmaana kwanọng kwẹ, an-abhaanga da Ọvaar Ibinọkpaabyi om-orenga m'owoni. Ofona mẹ, bẹ an-achubha Ọvaar Ibinọkpaabyi k'ottem kwa nchi s'owoni nwa. 9 Yina, Ọvaar Ibinọkpaabyi ogwon ojinọng, ọbọbh-ẹ bi, “Awobh man o?”

10 Kẹ obhina bi, “Kaam mmaang ndọkhi sọ, da am-arenga m'owoni, ojora osi-m, okhuri da ndim irinikhum, kẹ wọ osi nchubha e.”

11 Ọvaar Ibinọkpaabyi ọn-ọbọbh-ẹ bi, “Kọ anyi wọ ọgbaakh-ọ bi, atzim irinikhum? Akk'achiduk p'echi cha nsan-ọ, acha o?”

12 Ojinọng nwa obhin-ẹ bi, “Kwanọng kw'anang-m wọ ọnang-m achiduk p'afon m'echi nduma, yina kaam nchi e.”

13 Mẹ wọ osi, Ọvaar Ibinọkpaabyi ọn-ọbọbh kwanọng bi, “Bọng odik kw'asi ma?”

Kwanọng nwa obhin-ẹ bi, “Jọhk dọ ẹbọhr-m, yina kaam ndọkha achiduk mbuma nchi e.”

Ibinọkpaabyi ọkpaar aponga pabẹ

14 Mẹ wọ, Ọvaar Ibinọkpaabyi oben jọhk bi,

“Okhuri odik nwa kw'asi ma,

ópyibh-ópyibh ọnang-ọ, ọyọhnga nden s'otzer biphyir ọmaana nden s'ẹtzam biphyir,

kọ átzọr ẹbhọr k'irek,

ábira áchi ọkpọhm k'akpen pọ biphyir.

15 Kaam ńge ittattaanga k'ottem kwa kọ ọmaana kwanọng nwa,

ttara k'ottem kwa va pọ ọmaana va pẹ,

bẹ awobha k'ittattaanga ttara ayok.

Nnwa kwẹ ótzukhi eho chọ,

kọ ákhimi ibhokhọkhọri sẹ.”

16 Ibinọkpaabyi on-oben kwanọng nwa bi,

“Kaam ńttar-ọ ihem s'ideden,

k'ogbe kpenamkpen kw'ám-amaan nnwa.

Kaambi mẹ wọ, kọ ọm-ọdaakh-ọ bi, tte awobha abaanga odim kwọ,

yina, odim wọ ọbaabh-ọ.”

17 Obiro oben Adam bi,

“Kọ ayong kwanọng kwọ itzọhng,

achi ochiduk kw'echi cha nsaan-ọ bi, aninga achi,

kaam ńnang irerek ẹmma okhuri kọ.

Kọ ám-are ihem s'ọtzọhm, yina áchi ọttọhk m'irek nna,

k'akpen pọ biphyir.

18 Afhodima ọmaana akkaangi ámen m'irerek.

Kọ abira achi araraari p'owoni.

19 Kọ ám-asi ọtzọhm maa arunga,

yina ákhaama ọchattọhk f'áchi,

ttẹwọr ma maa atza apyiri k'ogbe kw'ákpa nnam k'irerek,

okhuri bi, bẹ atzim idọdọhbh asọ-ọ,

m'idọdọhbh nnuma rani rọ s'ábira ábhakhi akpa nnam.”

20 Wa Adam*3.20 K'eHiburu che nda Adam ekheri ọwọhng mach'oyeri ojinọng. okpe kwanọng kwẹ Iv†3.20 K'eHiburu, che cha Iv eyini, akpen., okhuri bi, kẹ wọ óde ọkka kw'anọng biphyir p'arukhi akpen.

21 Wa Ọvaar Ibinọkpaabyi ọtzọkha ndenkpa, otzima osi ekpo ẹfhọrapyẹ, ọnang Adam ọmaana kwanọng kwẹ, ifha bẹ afhọra, atzima abubha irinikhum sabẹ.

Ibinọkpaabyi okhubh Adam ọmaana Iv k'owoni kw'Iden

22 Mẹ wọ osi, Ọvaar Ibinọkpaabyi oben bi, “Ojinọng nwa ọkk'ọn-ọda macha man, okk'ejibha ọmaana epyibha on-oronga. Kẹ kọ̀khaambi, onemi ọbọhk ọpha ochiduk m'echi ch'akpen ochi, oni mando ode, kẹ oruk akpen maa ogbe ode.”

23 Mẹ wọ osi, Ọvaar Ibinọkpaabyi okhubh Adam k'owoni kw'Iden, ifha ọyaabha irerek s'otzim ọbang-ẹ. 24 Mada Ibinọkpaabyi okhubhi Adam, ohok achẹrubim k'okhubha kw'ewuchen em-eyin k'owoni kw'Iden, ọmaana ọkkangkkaang kw'ode mach'okpondaak kw'ọwọm bi wuruwuru, ọbhakhi iriring okkeri k'ibe kpenamkpen, ifha bẹ akpa eden ch'echin k'echi nduma ch'ẹnangi akpen.

<- Ittẹwọr 2 Ittẹwọr 4 ->