Ittẹwọr 2

1 Iwa Ibinọkpaabyi okyera ọtzọhm f'ẹrọng, ọmaana irerek osisi, ttara ọttọhk kpenamkpen f'owobh k'ẹtzaanga kwabẹ.

2 Ottong iwu izenamfa, Ibinọkpaabyi okk'ọtzọhm okyera f'om-osi, m'ewu ch'ettong iwu izenamfa okwokha ọwọhng k'ọtzọhm f'ọkk'ọm-ọsa. 3 Ibinọkpaabyi odo ewu nda ch'ettong izenamfa, ohok chẹ mach'ewu ch'ewur-owur, okhuri bi, m'ewu nda dọ ch'okwok ọwọhng, k'ọtzọhm f'ọyagbin osisi.

Odem kw'iwa Ibinọkpaabyi oyokhi achedennọng

4 Ma wọ ode odem kw'iwa Ọvaar Ibinọkpaabyi oreng oyok ẹrọng ọmaana irek.

K'ogbe kw'Ọvaar Ibinọkpaabyi osi ẹrọng ọmaana irerek, 5 iwa echi manda dani kemeni, ọraraari manda wani kobiro ommen, okhuri da Ọvaar Ibinọkpaabyi oni ẹrọng otzim ọsa bi, etzebh k'irerek, ttara bi, iwa ọnọng kw'ọyaabh irerek kode. 6 Yina, asi am-ayin k'irerek, asi irerek biphyir idiri.

7 Mẹ wọ, Ọvaar Ibinọkpaabyi otzima idọdọhbh ọbanga ojinọng, oji ọwọhng kw'akpen ọkhẹ-ẹ k'ahungmma, ojinọng nwa on-oruk akpen.

8 Ọvaar Ibinọkpaabyi osi owoni, kẹ da ewuchen em-eyin, k'Iden. Ọtzọkha ojinọng nwa kw'ọkk'ọbanga okhe mẹ. 9 Ọvaar Ibinọkpaabyi osi irerek imen nchi kpenamkpen k'adem-k'adem, nchi si njibhi ka chen, mbiri njibh k'ọchattọhk. Nchi mfa mbe k'ewonittem, echi dani ede ch'akpen, ndonggo ede ch'etzim-nonga ch'ejibha ọmaana epyibha.

10 Kẹ kw'ọraanga, kw'ofon k'Iden obhobhi ọkwọbha, obiro ọkhe asi m'ewonittem nduma, mẹ kw'ọraanga nwuma, obiro ọbhaangi k'araanga anna. 11 Ọraanga kw'ocheden okpen Pishọn, kẹ wọ obhobhi ochina k'irek sa Havila biphyir, kẹ da gol owobh. 12 Gol kw'irerek nnuma ode ọkkakkakwẹ. Wa ibe nnuma ibiri ikhaama ana p'adaami eruk, ọmaana atza p'ọniks. 13 Ọraanga kw'ottong afa okpena Gihọn, kẹ wọ obhobhi ọkhọri irek sa Kush biphyir. 14 Ọraanga kw'ottong attaan okpena Tigiris, kẹ wọ obhobhi k'okhubha kw'ewuchen em-eyin k'Asiriya. Ọraanga kw'ottong anna okpena Yupharetes.

15 Ọvaar Ibinọkpaabyi ọtzọkha ojinọng nwa ohok k'owoni kw'Iden, ifha ọyaabha owoni nwa obiro okker-ẹ. 16 Ọvaar Ibinọkpaabyi ọn-ọsana ojinọng nwa bi, “Kọ akhaam ọphaangi kẹ bi, achi achiduk kpenamkpen pa nchi si mbe m'owoni nwa. 17 Onode echi ch'etzim-nonga ch'ejibha ọmaana epyibha, kọ kàkhaambi, achi. Ewu ch'achi chẹ, akhaambi da ápe.”

18 Mẹ wọ, Ọvaar Ibinọkpaabyi on-oben bi, “Kojibhi bi, ojinọng nwa owobha mancheni, kaam ńsi oyok-ẹkhaan kw'ọ́baan-ẹ nnang-ẹ.”

19 Ode ch'Ọvaar Ibinọkpaabyi okk'idọdọhbh otzima ọbanga nden kpenamkpen s'ẹtzam, ọmaana ọnọhn f'ẹrọng. Ọtzọkha pyẹ biphyir ochena ojinọng nwa, ifha ore che-dema p'okpe pyẹ. Che ch'ojinọng nwa okpe ọttọhk kpenamkpen f'orukhi akpen, mando kwa fẹ okpen. 20 Mẹ wọ osi, ojinọng nwa okpe nden s'otzer biphyir che, ọmaana ọnọhn f'ẹrọng ttara nden s'ẹtzam biphyir.

Yina, onode ojinọng oyok-ẹkhaan, kw'ọbaan-ẹ kode. 21 Mẹ wọ osi, Ọvaar Ibinọkpaabyi osi ojinọng nwa ọttaabha ẹdadim. Mada ojinọng otzim ọttaabh-ọttaabha, ọrọbh-ẹ ọtzẹtzẹngchikpa wani, obiro ọraakha ibe nnuma s'ọrọhbh ọtzẹtzẹngchikpa nwa ttara etzen-yaara. 22 Mẹ wọ osi, Ọvaar Ibinọkpaabyi ọtzọkha ọtzẹtzẹngchikpa kw'ọkk'ọrọbha k'ojinọng, otzima osi kwanọng, ọtzọkh-ẹ ochena ojinọng.

23 Ojinọng nwa oben bi,

“Ma wọ on-ode ọkhọbhi kw'akhọbhi paam,

ẹyaara ch'ẹyaara chaam.

Kẹ bẹ áyer-ẹ, kwanọng,

okhuri da bẹ arọbh-ẹ k'ojinọng ka for.”

24 Ofona mẹ, ojinọng óbina oji otte ttara ọkka, ọn-ọgbakha for sẹ ttara kwanọng kwẹ, ifha bẹ anọng afa an-ade ọnọng wani.

25 Wa ojinọng nwa ọmaana kwanọng kwẹ awobh irinikhum, bẹ mgbar karọbhi.

<- Ittẹwọr 1 Ittẹwọr 3 ->