Link to home pageLanguagesLink to all Bible versions on this site
46
Yakupu andǝ amǝ'ɓala male tùr a Masar
1 Nda Isǝrayila, yì Yakupu tita gya male, pwan gìr mǝnana kat ndanǝi ka. Lang yi bik Biyasheba ka, pà agir'nkila aban Ɓakuli mala tárrí Ishaku. 2 Ɓakuli tunǝ Isǝrayila aɓa sǝna nǝ du, sǝ ne wi cau ama, <<Yakupu, Yakupu!>>
Pǝlǝa eare ama, <<Mǝ ndya ka.>>

3 Ɓakuli bang ama, <<Mǝ nda Ɓakuli, yì Ɓakuli mala tárró. Cè ɓangciu pakko arǝ ká a Masar ɗàng, acemǝnana mǝ nǝ tsǝa tàu mò nǝ̀ hatǝki, awu nǝ duk aɓwana mala nzali mǝgule akanó. 4 Mǝ nǝ ká atò a Masar, sǝ nǝnzǝ́mò ka, mim nǝ nggearǝam, mǝ nǝ nyesǝ tau mò à nǝ̀ nyare a nzali mǝnia ɗǝm. We ka a nǝ wú a Masar, sǝ Yisǝfu nǝ̀ pà a nkanggario a lú mò.>>[a][b]

5 Pǝlǝa Yakupu loapi Biyasheba nǝ̀ o a Masar. Nda amuna mala Isǝrayila twal tárrià yì Yakupu, sǝ à tsǝì aɓa waru-pǝr mǝnana Firona Murǝm Masar túrìwìban nǝi ka, sǝ à tsǝk amuna malea, andǝ amālia aɓalǝ acili awaru-pǝr. 6 À pwan agirkusǝu malea, andǝ agirkuma malea mǝnana à kúmô aɓa nzali Kan'ana ka, sǝ à o a Masar. Yakupu twal amǝ'ɓala male kat atè: 7 yìa amuna-burana male andǝ amǝkè amuna-burana, andǝ amuna-mamǝna male andǝ amǝkè amuna-mamǝna; yì tau male kat oa tè.

8 [c]Amǝnia ka, à nda ka alullǝ amuna-burana mala Isǝrayila, yì Yakupu, mǝnana à pwan rǝia sǝ à wari andǝi a Masar ka:

Ruben yì muna-dǝmba male ka, 9 pwan amuna-burana male:
à nda ka Hanok, andǝ Palu, Hezǝron andǝ Karmi.
10 Muni Shimiyon pwan amuna-burana male:
à nda ka Jemuyel, andǝ Jamin, andǝ Ohat, andǝ Jakin, andǝ Zohar, sǝ Shawul mǝnana nggè ka ɓwama Kan'ana na ka.
11 Lawi pwan amuna-burana male:
à nda ka Gashon, andǝ Kohat, andǝ Merari.
12 Yahuda pwan amuna-burana male:
à nda ka Shela, andǝ Perez andǝ Zera. (Amuna-burana mala Yahuda, yia Er andǝ Onan ngga, à akdǝmba à wǔ a nzali Kan'ana.)
Perez pwan amuna-burana male:
À nda ka Hezǝron andǝ Hamul.
13 Isaka pwan amuna-burana male:
à nda ka Tola, andǝ Puwa, andǝ Jashup, andǝ Shimiron.
14 Zebulu pwan amuna-burana male:
à nda ka Seret, andǝ Elon andǝ Jali.

15 Amǝno ka à nda ka amuna-burana mǝnana Liya ɓǝlî Yakupu a Padan Aram ngga, sǝ ɓoarnsarile Dina. Làkkì mala amuna andǝ amǝkà Yakupu amuna-burana nǝ bu Liya ka, à nda lumi-tàrú-nong-tàrú (33).

16 Muna-ɓwabura male Gad pwan amuna-burana male:
à nda ka Zefon, andǝ Hagi, andǝ Shuni, andǝ Ezǝbon, andǝ Eri, andǝ Arodi andǝ Areli.
17 Asha pwan amuna-burana male:
à nda ka Imǝna, andǝ Ishva, andǝ Ishvi andǝ Beriya.
Mǝkyauwea muna-ɓwama Sera ka nda ateà.
Beriya gbal ka pwan amuna-burana male:
À nda ka Heba andǝ Malkiyel.

18 Amǝno ka à nda ka amuna andǝ amǝkau mǝnana à ɓǝlî Yakupu nǝ bu Zilpa, yì muna-ɓwama mǝtúró-ɓala mala Laban mǝnana twali pè muni muna-ɓwama Liya, ɓǝ̀ duk muna-ɓala male ka. Yia kat ka à nda lum bwamdǝ tongno-nong-mwashat.

19 Amuna-burana mala Yakupu mǝnana à ɓǝl andǝ māmí Rahila ka à nda ka:
Yisǝfu andǝ Benjami. 20 Yisǝfu ka ak dǝmba nda a Masar, ban mǝnana à ɓǝlî wi amuna-burana ɓari:
À nda ka Manasa andǝ Ifǝrem. Nggea nda Asenat, ɓoarnsarile Potifera, ɓè pǝris a On, yì Heliyopolis.[d]
21 Benjami pwan amuna-burana male gbal:
À nda ka Bela, andǝ Becha, andǝ Ashbel, andǝ Gera, andǝ Naaman, andǝ Ehi, andǝ Rosh, andǝ Mupim, andǝ Hupim, andǝ Arǝd.

22 Amǝno ka à nda ka amuna-burana mala Rahila andǝ amǝkè, mǝnana ɓǝlî Yakupu ka. Yia kat ka à nda lum nong ine.

23 Muna-ɓwabura male Dan twal muni:
Hushim.
24 Muna-ɓwabura male Naftali pwan amuna-burana male:
à nda ka Jaziyel, andǝ Guni, andǝ Jeza andǝ Shilem.
25 Amǝno ka à nda ka amuna andǝ amǝkau mǝnana à ɓǝlî Yakupu nǝ bu Bilha, yì muna-ɓwama mǝtúró-ɓala mala Laban mǝnana twali pè muni muna-ɓwama Rahila, ɓǝ̀ duk muna-ɓala male ka. Yia kat à nda tongno-nong-ɓari.

26 Amuna andǝ amǝkà Yakupu mǝnana à wari a Masar andǝi ka làkkì malea kat ka nda lumi-tongno-nong-mwashat nǝ mǝsǝi tongno-nong-mwashat (66). Amālá amuni ka à ɓallia ɗàng. 27 Kpapì andǝ amuna-burana mala Yisǝfu mǝnana à ɓǝlî wi a Masar ka, làkkì mala amǝ'ɓala mala Yakupu, yia kat a nzali Masar ka lumi-tongno-nong-ɓari na (70).[e]

Yakupu andǝ amǝ'ɓala male bik Masar
28 Lang à gbàshìnà Masar ka, Yakupu tasǝ Yahuda ɓǝ̀ aki wi dǝmba ká aban Yisǝfu, ɓǝ̀ banggi wi ama ɓǝ̀ kumia a Goshen. Lang Yakupu andǝ amǝ'ɓala male yi bingŋǝna ka, 29 Yisǝfu kùtí aɓa waru-pǝr male sǝ o a Goshen nǝ̀ nggá je andǝ tárrí, Isǝrayila. Lang à yì je ka, Yisǝfu mǝn abui yi kùr tárrí a myali sǝ ɓua banì sauwa. 30 Isǝrayila, Yakupu ne Yisǝfu ama, <<Ado ka mǝ nǝ gandǝ wú, acemǝnana ǝn sǝnǝno sǝ ǝn sǝlǝna ama a ndakam più nǝyilǝmu ka.>>[f]

31 Pǝlǝa Yisǝfu banggi amǝ'eambi andǝ acili amǝ'ɓala mala tárrí ama, <<Dumǝna púp mǝ kyane mǝ kya banggi Firona murǝm ama amǝ'eambam andǝ amǝ'ɓala mala tárrám kat, mǝnana à do a nzali Kan'ana ka, à yina abanam. 32 Mǝ nǝ banggi wi ama wun ngga wu nda ka ayálgír, amǝ ɗenyi nǝ agirkusǝu, sǝ wu yina nǝ adomwan mala anzur, andǝ ambulpǝndǝa, andǝ andá ma'wun, andǝ koman mǝnana kat ma'wun na ka. 33 Ɓǝ̀ Firona murǝm tunǝ wun sǝ ɗì wun ama, mana nda túró ma'wun ngga, 34 wu ne wi ama, <Sǝm nda ka ayálgír. Ɗenyinǝ agirkusǝu nda túró ma'sǝm a do ma'sǝm kat, kǝla mǝnana aká sǝm pàk ka.> Anggo ka nǝ̀ eara wun ɓǝ̀ wu do a bu-nzali Goshen.>> Yisǝfu bang mǝnia ka acemǝnana koya yálgír mala anzur ka gìr'ɓeami na aban amǝ Masar.

<- Tite 45Tite 47 ->