Aj Rom 11

A twutzxix Ttanim qMan Dios

1 Atzin jaꞌlin, ¿Mapela tzꞌel tiꞌjlin te qMan Diosjo Ttanim te jun majx, ayeꞌ aj Judiy? ¡Mina! Quꞌn ikyqinx wejiꞌy, aj Judiyqiꞌn, ex antza tzajnin nyajila tiꞌj Abraham ex tiꞌjjo chꞌuq xjal, a tzajnin tiꞌj Benjamín, a tkꞌwal Israel.[a] Me nya ma chin el tiꞌjlin Dios. 2 Quꞌn atxix naꞌmtaq tkubꞌlin xkye tkyaqil, ax Dios o jaw skꞌoꞌnkye aj Judiy, tuꞌn kyok te Ttanim, ex nya o chi el tiꞌjlin. ¿Ma miꞌtzin bꞌiꞌn kyuꞌn tzeꞌnku ntqꞌmaꞌn Tuꞌjil Tyol Dios, tej tyolbꞌin Elías kyiꞌj aj Judiy toj tnaꞌj Dios? Chiꞌ kyjaluꞌn:

3 Ay wAjaw, aye tsanjila, ma chi kubꞌ kybꞌyoꞌn aj Judiy,

ex ma chi kubꞌ kyyuchꞌin t-altara,

a jaꞌ nkubꞌe patit oyaj ex chojbꞌil il twutza.

Ex njunalxa ma chin kyij ten,

ex kyaj tuꞌn nkubꞌ kybꞌyoꞌn.[b]

4 Me xi ttzaqꞌwin Dios:

O tzꞌel npaꞌnjiꞌy wuq mil ichin,

aye bꞌajxi chi kꞌuline twutz juntl dios, a Baal tbꞌi.[c]

5-6 Atziꞌn jaꞌlin; ma kyij jun jteꞌbꞌin kybꞌaj aj Judiy, aye skꞌoꞌnqexix tuꞌn t-xtalbꞌil qMan Dios, ex nya tuꞌn kybꞌinchbꞌin. Quꞌn noqit tuꞌn kybꞌinchbꞌin, matla chi klettz kyuꞌnx kyibꞌx, ex ntiꞌtla tajbꞌintzjo t-xtalbꞌil qMan Dios.

7 ¿Tzeꞌntziꞌntz ikyjo? Mi xknet kyuꞌn aj Judiy tuꞌn kyok te tzꞌaqle twutz Dios, ex ma txi kujix kyanmin. Me ayetzin skꞌoꞌnqe tuꞌn qMan, ma chi ok te tzꞌaqle twutz, noq tuꞌn t-xtalbꞌil, 8 tzeꞌnku ntqꞌmaꞌn Tuꞌjil Tyol Dios:

Ex ax Dios ok jpunte kynabꞌl,

tuꞌn mi tzꞌel kynikyꞌ te,

ex ax xi kujsinte kyanmin,

tuꞌn mi kynaꞌye,

ex ok tjpun kyẍkyin,

tuꞌn mi kybꞌiye.

Tzeꞌnx kyten jaꞌlin.[d]

9 Ex ikyxjo tqꞌma David toj Tuꞌjil Tyol Dios:

Noqit axjo kyikyꞌsbꞌil nintz qꞌij kubꞌ toj kybꞌe,

tuꞌn kybꞌaj jaw takpaj tiꞌj,

ex tuꞌn tbꞌaj kyjtzꞌoꞌn kyibꞌ toj,

ex tuꞌn kykyij tjaqꞌ tkawbꞌil Dios kujxix wen.

10 Noqit tzaj yupj toj kywutz,

tuꞌntzin mi kylaꞌye,

ex atzintlaꞌ ttzkyel kyiꞌj kyij kꞌoweꞌ tjaqꞌ kyiqitz te bꞌisbꞌajil te jun majx.[e]

A kolbꞌil kye nya Judiyqe

11 Tuꞌn ẍi kubꞌ tzꞌaq aj Judiy toj tkyaqiljo lo, ¿Mapela chi kubꞌxtz te jun majx tiꞌj kynimbꞌil? ¡Mina! Me tuꞌn s-el kyiꞌjlin aj Judiy qMan Dios, ex tuꞌntzin tjaw chyoꞌn kyanmin, bꞌeꞌx tzaj tqꞌoꞌn Dios kolbꞌil kye nya Judiyqe. 12 Tuꞌntzin tej kykubꞌ tzꞌaq aj Judiy, bꞌeꞌx tzaj tqꞌoꞌn qMan Dios kolbꞌil kye txqantl, aye nya Judiyqe. Exsin qa nimx tkyꞌiwbꞌil qMan Diostz tzaj kyibꞌaj kykyaqil xjal tuꞌn ikyjo, ¿Mixla yaꞌtzjo aj kymeltzꞌaj aj Judiy tuꞌn kyok te Ttanim Dios junx kyukꞌaꞌ txqantl xjal, a nya Judiyqe?

13 At jun nyola kyukꞌiy, ayiꞌy nya Judiyqiꞌy, quꞌn ma tzaj tqꞌoꞌn Dios wokliꞌn te tsanjil kyxola. Tuꞌnpetziꞌn, tokxix tilil wuꞌn toj waqꞌiꞌn, 14 quꞌn wajatlaꞌy tuꞌn kyklet junjun nxjalila, tuꞌntzintla aj kyok kaꞌyiꞌn kyuꞌn, aj kyoka te Ttanim Dios, bꞌeꞌx tuꞌn tjaw chyoꞌn kyanmin, ex tuꞌn kyok lipe kyiꞌja tuꞌn kyklet. 15 Quꞌn noq tpajlin ẍi el iꞌjlin Judiy tuꞌn Dios, tkyaqil nimil nya Judiy ma kyij toj wen tukꞌa Dios. Me noqit chi meltzꞌaj, manyorxitla kyꞌiwbꞌilx tuꞌn qMan Dios tibꞌaj tkyaqil nimil Judiy ex nya Judiy, exsintla jun anqꞌbꞌil kyxol kyimnin. 16 Quꞌn te Abraham te qMan Dios teꞌ, ex ok te xjanxix, junx kyukꞌa txqantl tnejil kyxeꞌchil aj Judiy. Exsin ikyqex kye txqantl aj Judiy kchi okil xjanxix. Ikytziꞌn tzeꞌnku jun tze; qa bꞌaꞌn tlokꞌ, il tiꞌj tuꞌn kyel tqꞌobꞌ bꞌaꞌn.

17 Quꞌn ayetzin kye aj Judiy tzeꞌnqekuꞌ tqꞌobꞌ jun wiq tqan lobꞌj tbꞌanilxix wen, ex ayetzin kye aj nya Judiyqiꞌy tzeꞌnqeku tqꞌobꞌ jun tqan lobꞌj toj kꞌuꞌl. Ikyqetziꞌn aj Judiy, ayeꞌ mi xkubꞌ kynimin, bꞌeꞌx ẍi ok xikybꞌita te kyxel. Atzin jaꞌlin, nchi anqꞌin tiꞌjjo tlokꞌ tnejil tqan lobꞌj, ex tuꞌnxjo anetziꞌn ate kychwinqila. 18-19 Me mi jaw kynimsin kyibꞌa kyibꞌajjo aj Judiy, quꞌn akula kyqꞌmay: Ma chi el txꞌemit kye aj Judiy, ex ma qo oka te kyxel toj Tkawbꞌil Dios, qa chi chijiꞌy. Nya bꞌaꞌn kyxima ikyjo, quꞌn nyaqe kyeꞌ nchi kaꞌchin te tlokꞌ tze; qalaꞌ a tlokꞌ tze nkꞌaꞌchin kyiꞌja. 20 Quꞌn noq tuꞌn mix kubꞌe kynimin kye aj Judiy ja ẍi ele txꞌemite, ex ayetzin kyeꞌ ma chi ok te kyxel noq tuꞌn kynimbꞌila. Tuꞌnpetziꞌn, mi kyjaw kynimsin kyibꞌa, qalaꞌ kyajsintz tiꞌj kyanmiꞌn, quꞌn ex ikyxjo aku chi el txꞌemita. 21 Quꞌn qa ma chi el ttxꞌeꞌmin Dios aj Judiy, aye tqꞌobꞌku tqan lobꞌj, ex ikyxjo kyeꞌ, ¿Tin quꞌniltz nlay chi el txꞌemin kyeꞌ, qa ma tzꞌel kyiꞌjliꞌn?

22 Quꞌn tzꞌelku kynikyꞌa te: Wenxix te Dios kyukꞌaꞌ waꞌlqe toj kynimbꞌil; me kujxix kyukꞌa nchi kubꞌ tzꞌaq. Ex ayetzin kyeꞌ, il tiꞌj tuꞌn tkubꞌ kybꞌinchinjiꞌy wen, ex tuꞌn kyxi lipeꞌy tiꞌj qMan Dios, quꞌn qa mina, ex ikyx kyejiꞌy aku chi el txꞌemiꞌn tuꞌn. 23 Ex ikyxjo kye aj Judiy, qa ma chi meltzꞌaj, kchi kꞌwel xikybꞌin juntl majl, quꞌn at te Dios tipin tuꞌn tbꞌantjo ikyjo tuꞌn. 24 Quꞌn qa ayiꞌy nya Judiyqiꞌy, ma chi el txꞌemiꞌn tiꞌj jun toj kꞌul tqan lobꞌj, tuꞌn kyok xikybꞌiꞌn tiꞌj jun toj ja tqan lobꞌj, a mixsin yaꞌtzjo kyeꞌ, ayeꞌ tqꞌobꞌkuxix tqan lobꞌj, ayeꞌ aj Judiy, qa ma chi meltzꞌaj, chi okil xikybꞌin tiꞌjxixjo ttxuyil tbꞌanil tqan lobꞌj.

Ok kchi kletil aj Judiy

25 Ayiꞌy werman, waja tuꞌn tel kynikyꞌa teꞌ yol ewintaq ojtxe, tuꞌntzin mi tzꞌok kyqꞌoꞌnexix kyibꞌa te aj nabꞌl: Ayetziꞌn junjun aj Judiy ma kubꞌ kychꞌuẍsin kyanmin, nya te jun majx; qalaꞌ noq tuꞌn tjapin bꞌaj kybꞌaja, aye nya Judiyqiy, toj kynimbꞌil. 26 Ajtzin tbꞌajjo ikyjo, kykyaqilx aj Israel kchi kletil, tzeꞌnku ntqꞌmaꞌn Tuꞌjil Tyol Dios:

Tzul Kolil toj Sion qꞌol tzaqpibꞌl kye aj Judiy.

Ex k-elil paꞌn tkyaqil nya wen kyiꞌj aj Israel.[f]

27 Atzin wejiꞌy Nyol kyijlin bꞌant tiꞌj kyukꞌa, aj tel wiꞌn kyilch.[g]

28 Aye xjal aj Judiy i ok ajqꞌoj tiꞌjjo Tbꞌanil Tqanil kolbꞌil, noq tuꞌn xi qꞌoꞌn tumil kolbꞌil kyeꞌy, ayiꞌy nya Judiyqiꞌy. Me kꞌuꞌjlinqe tuꞌn qMan Dios, quꞌn ax jaw skꞌoꞌnkye atxix ojtxe kyukꞌa tnejil kyxeꞌchil. 29 Quꞌn tkyaqiljo o tzaj tqꞌoꞌn Dios, nlay tzꞌel tiꞌn; ex a txokbꞌil tuꞌn kyok te Ttanim, nlay txꞌixpit. 30 Quꞌn ikytzin tzeꞌnku kyeꞌ ojtxe. Ma tzꞌel kyiꞌjliꞌn Dios. Me tzaj qꞌaqꞌin tkꞌuꞌj Dios kyiꞌja, noq tuꞌn mix kubꞌe kynimin aj Israel. 31 Exsin ikyxjo jaꞌlin, ma tzꞌel kyiꞌjlin aj Israel Dios, tuꞌn ttzaj qꞌaqꞌin tkꞌuꞌj kyiꞌj, ikyxjo tzeꞌnku kyeꞌ. 32 Quꞌn tkyaqil xjal o tzꞌok tqꞌoꞌn Dios tjaqꞌ tqanbꞌil, tuꞌn tel kyiꞌjlin, ex tuꞌn ntzaj qꞌaqꞌinl tkꞌuꞌj Dios kyiꞌj kykyaqil xjal tuꞌntzintla kyklet, aye aj Judiy ex nya Judiy.

33 Ntiꞌ juntl tzeꞌnku te qMan Dios. Quꞌn nimxla taꞌye t-xilin tnabꞌl ex jniꞌ tojtzqibꞌl. Nlayxla tzꞌel qnikyꞌ te jniꞌ t-ximbꞌitz; nlayxla tzꞌel pjetjo jniꞌ tkawbꞌil; ex nlayxla bꞌant xpichꞌit tkyaqil tumil quꞌn. 34 ¿Ma atpela jun n-el tnikyꞌ tiꞌjjo tnabꞌl qAjaw? Ex ¿Ma atpela jun o tzaj xnaqꞌtzinte?[h] 35 Ex ¿Ma atpela jun o txi qꞌoꞌnte chꞌin te qAjaw, tuꞌntzintla tzaj tqꞌoꞌn t-xel? 36 Quꞌn tkyaqilx antza ntzaje te qMan Dios, ex ax kubꞌ bꞌinchinte tkyaqil, ex ax tAjaw Tkyaqil. Nimxit tbꞌi qMan Dios te jun majx. Ikyxitjo.

<- Aj Rom 10 Aj Rom 12 ->