Aj Rom 10

1 Erman, atzin wejiꞌy waj tukꞌa tkyaqil wanmiꞌn ex toj nnaꞌj Diosa, tuꞌn kykletjo nxjalila, aj Israel. 2 Quꞌn ojtzqiꞌn wuꞌn, qa kyajxix tuꞌn kyxi lipe tiꞌj Dios, me noqtzin tuꞌn mikyxiꞌ tzeꞌnkuꞌ taj qMan. 3 Mi nxi kyqꞌon kyibꞌ tojjo tumil, tzeꞌnkuꞌ taj Dios, qalaꞌ el kyiꞌjlin t-xim tuꞌn kyok tzꞌaqle twutz. Ex nkyjyoꞌn juntl tumil tzeꞌn tten tuꞌn kyklet kyuꞌnx kyibꞌx noq tuꞌn kybꞌinchbꞌin, a tuꞌn tjapin bꞌaj tkawbꞌil Moisés kyuꞌn. 4 Me ntiꞌ tajbꞌiꞌn ojtxe kawbꞌil anetziꞌn tuꞌn qok te tzꞌaqle twutz qMan Dios. Quꞌn ate Crist ma tzꞌel qꞌinte tipin ojtxe kawbꞌil qibꞌaj, a awo ma qo nimin tiꞌj. Quꞌn a ojtxe kawbꞌil nqanintaq qiꞌj tuꞌn qkyim. 5 Quꞌn tqꞌma Moisés qa aku qo ok te tzꞌaqle twutz Dios tuꞌn tjapin bꞌaj tkawbꞌil quꞌn:

Ex atzin xjal qa ma japin bꞌaj tkyaqil kawbꞌil tuꞌn,

at tchwinqil te jun majx, chi Moisés.[a]

Me ntiꞌx jun njapin tuꞌn.

6 Me atzin teꞌ tuꞌn qok tzꞌaqle twutz qMan Dios noq tuꞌn qnimbꞌil, ntqꞌmaꞌn toj Tuꞌjil Tyol Dios:

Mi kubꞌ kyqꞌmaꞌn toj kyanmiꞌn,

¿Ankye kjawix toj kyaꞌj qꞌil tumil tuꞌn qklet?[b]

Quꞌn qa ma qo yolin ikyjo, nkubꞌ qqꞌmaꞌn nyakuj qa mix kꞌuꞌl Crist qꞌol tumil.

7 Ex mi kubꞌ kyximiꞌn,

¿Ankye kꞌwelix toj kynajbꞌil kyimnin qꞌil tumil tuꞌn qklet?

Quꞌn qa ma qo yolin ikyjo, nkubꞌ qqꞌmaꞌn nyakuj qa mix jatz anqꞌin Crist kyxol kyimnin qꞌol tumil qe.

8 ¿Me tiꞌtzin ntqꞌmaꞌn Tuꞌjil Tyol Dios tiꞌjjo lo? Chiꞌ kyjaluꞌn:

Nqayin taꞌ Tumil kyukꞌiy.

Ex ayexa chi kꞌwel qꞌmante tuꞌn kytziꞌy, ex toj kyanmiꞌn.[c]

Me atzin tumiljo lo tiꞌjjo Tbꞌanil Tqanil kolbꞌil, a nqyoliꞌn: 9 Qa ma kubꞌ tqꞌmaꞌn tuꞌn ttziꞌy ex toj tchwinqila, qa a Jesús tAjawa; ex qa ma txi tnimiꞌn toj tanmiꞌn qa jatz anqꞌintl Jesús kyxol kyimnin tuꞌn qMan Dios te chojbꞌil tila, ok kletila. 10 Quꞌn noq tuꞌn qanmin, kxele qnimin tuꞌn qok tzꞌaqle twutz qMan Dios. Ex tuꞌn qtzi ex tuꞌn qchwinqil kꞌwele qyekꞌine qa a Jesús qAjaw, tuꞌn qklet tuꞌn. 11 Quꞌn ntqꞌmaꞌn toj Tuꞌjil Tyol Dios kyjaluꞌn: Alkye knimil tiꞌj, nlay tzꞌel toj ttxꞌixew.[d]

12 Quꞌn junx kyoklinxjal kykyaqil twutz qMan; qa Judiy, mo minaj. Quꞌn junchꞌin tAjaw Tkyaqil kyibꞌaj kykyaqilxjal, ex nxi tqꞌoꞌn tkyꞌiwbꞌil kyibꞌaj kykyaqiljo nchi kubꞌsin kywutz te. 13 Quꞌn ikytziꞌn ntqꞌmaꞌn toj Tuꞌjil Tyol Dios kyjaluꞌn: Kykyaqiljo nchi kubꞌsin kywutz te qMan Dios tuꞌn kyklet, ok kchi kletilch.[e]

14 ¿Me tzeꞌntzin tten aj kykubꞌsin kywutz te Dios, qa naꞌm kynimin tiꞌj? ¿Ex tzeꞌntzin tten tuꞌn kynimin tiꞌj, qa naꞌm kybꞌinte Tqanil? ¿Ex tzeꞌntzin tten tuꞌn kybꞌinte, qa mix aꞌl xi qꞌmante Tbꞌanil Tqanil kye? 15 ¿Ex tzeꞌntzin tten tuꞌn t-xi qꞌmaꞌn Tqanil, qa mix aꞌlx xi chqꞌonkye? Ikytziꞌn tzeꞌnku ntqꞌmaꞌn toj Tuꞌjil Tyol Dios: Tbꞌanilxix kyuliljo aye nchi qꞌmante Tbꞌanil Tqanil kolbꞌil.[f]

16 Me nya tkyaqilxjo ma kubꞌ kynimin a Tbꞌanil Tqanil kolbꞌil, quꞌn ikytziꞌn tzeꞌnku tqꞌma Isaías toj Tuꞌjil Tyol Dios:

Ay wAjaw, ¿Ma atpela aꞌla ma txi bꞌiꞌn teꞌ Tbꞌanil Tqanila, a ma txi qqꞌmaꞌn?[g]

17 Quꞌn nqo klet qa ma txi qbꞌiꞌn, ex qa ma txi qnimin Tbꞌanil Tqanil tiꞌj Crist.

18 ¿Mipela xkybꞌi tkyaqil xjal Tbꞌanil Tqanil kolbꞌil? Matxi, quꞌn ikytziꞌn ntqꞌmaꞌn Tuꞌjil Tyol Dios:

Ma tzꞌel tqꞌajqꞌojil twiꞌ tkyaqil tchꞌiysbꞌin qMan Dios toj tkyaqil twutz txꞌotxꞌ.

Ex a Tqanil ma kanin kyukꞌa kykyaqil xjal.[h]

19 Tuꞌnpetziꞌn, ¿Ma naꞌmpetzila tel kynikyꞌ aj Israel te? Matxi, quꞌn tnejilxix tqꞌma Moisés toj Tuꞌjil Tyol Dios:

Ex kchi okil nqꞌoꞌn toj xkyꞌaqbꞌil tiꞌj juntl tnam, a nya Ntanimach.

Ex kchi qꞌojlila tiꞌj juntl tnam, a ntiꞌ tnabꞌl toj kywutza.[i]

20 Ex ikyxjo tqꞌma Isaías kujxix wen:

Me ayetziꞌn a mi nchi jyontaq wiꞌja, ma chin kneta kyuꞌn.

Ex ma txi nyekꞌin wibꞌa kye, a mi nchi qanlajtaq wiꞌjach.[j]

21 Me nyolin Isaías kyiꞌj aj Israel kyjaluꞌn:

Tkyaqil qꞌij nchin txokiꞌn kyiꞌjjo xjal, a kykyꞌeꞌ tuꞌn kynimin, ex xmiletzꞌqech.[k]

<- Aj Rom 9 Aj Rom 11 ->