୫ [b]ସୁଜୋଗ୍ତି ସତ୍ ବ୍ୟବ୍ହାର୍ କିଜି ଅବିସ୍ବାସ୍ରି ଲୋକା ଲାକ୍ତୁ ବୁଦିଦାନ୍ ନେଗେନ୍ତାନ୍ ସାଲାବୁଲାଦୁ । ୬ ମି ମାଟା ୱିଜୁଦିନ୍ ଦୟା ୱାଜା ସାୱି ମାରି ମୋନ୍ତିଙ୍ଗ୍ ୱେଡ଼ିକାକିନିକେଙ୍ଗ୍ ଆପିତ୍ । ୱିଜେରିଙ୍ଗ୍ ଏଣ୍ତେସ୍ ଟିକ୍ ଉତର୍ ସିଦେଙ୍ଗ୍ ଆଟ୍ନିଦେର୍, ଇୟା ମାଟା ମିର୍ ନେସ୍ନିକା ଦର୍କାର୍ ମାନାତ୍ ।
୧୦ [f]ନା ୱାଲେ ଅର୍ସେ ଜଇଲ୍ତୁ ମାର୍ଇ ଆରିସ୍ଟାର୍କସ୍ ମାରି ୱାନି ୱାଲେ ବର୍ଣ୍ଣବାଦି କୁଟୁମ୍ତି ତଡ଼ାନ୍ ମାର୍କ ବା ମିଙ୍ଗିଁ ନମସ୍କାର୍ ଜାଣେକିଜିନାନ୍ । ମାର୍କ ମି ଲାକ୍ତୁ ୱାତିଙ୍ଗ୍ ୱାନିଙ୍ଗ୍ ନେଗେନ୍ କୁକ୍ତୁ, ଇୟା ଆଦେସ୍ ମିଙ୍ଗିଁ ଆଗ୍ଡ଼ିରାନ୍ନେ ୱେର୍ତାମାନାର୍ । ୧୧ ମାରି, ଯୁସ୍ତ ଦର୍ଦାନ୍ ଜାଣାସିନା ଯିହୋଶୁୟ ବା ମିଙ୍ଗିଁ ନମସ୍କାର୍ ଜାଣେକିଜିନାନ୍; କ୍ରିସ୍ଟାନ୍ ଦର୍ମ ମାନାତିମାନିକାର୍ କେବଲ ଇୟା ମୁଏର୍ ଜିହୁଦି ମାପୁରୁଦି ରାଜି ଉଣ୍ତିଙ୍ଗ୍ ନା ୱାଲେଅର୍ସେ ପାଣିକିନିକାନ୍ ଆଜି ନାଙ୍ଗିଁ ନାଣ୍ତ ସାହାଜ୍ୟ କିତାମାନାର୍ ।
୧୨ [g]ମି ଦଲ୍ତି ମାରି ଅରେନ୍ ଲୋକ୍ ମାରି କ୍ରିସ୍ତ ଜିସୁଦି ସେବାକିନି ଏପାଫ୍ରା ବା ନମସ୍କାର୍ ଜାଣେକିଜିନାନ୍ । ଏଣ୍ତେସ୍ ମିର୍ ଟିକ୍ ମାରି ମାପୁରୁଦି ୱିଜୁ ବଦା ବିସୟ୍ତାନ୍ ପୁରା ମାନାଜି ଡାଟ୍ କ୍ରିସ୍ତ ବିସ୍ବାସି ୱାଜା ଦୁଙ୍ଗୁଁଏଣ୍ଗା ନିନ୍ଡ୍ରେଙ୍ଗ୍ ଆଟ୍ନିଦେର୍, ଆୟାଉଣ୍ତିଙ୍ଗ୍ ୱାନ୍ ୱିଜୁଦିନ୍ ମାପୁରୁଦି ଲାକ୍ତୁ ସାନିଜିନିୱାଜା ସାକ୍ତିଦି ପାର୍ତାନା କିଜିନାନ୍ । ୧୩ ଇରିଙ୍ଗ୍ ୱାନ୍ ମି ଉଣ୍ତିଙ୍ଗ୍ ମାରି ଲାଅଦିକିଆ ମାରି ହିଏରାପଲିଦି ଲୋକା ଉଣ୍ତିଙ୍ଗ୍, ୱାନ୍ କିତିମାନି କାସ୍ଟୁପାଣି ବିସୟ୍ତାନ୍ ନାନ୍ ନିଜେ ଇୟା ସାକ୍ୟ ୱେର୍ସିନା । ୧୪ [h]ଲାଡ୍ତି ଡାକ୍ତର୍ ଲୁକ ମାରି ଦିମା ମିଙ୍ଗିଁ ନମସ୍କାର୍ ଜାଣେକିଜିନାର୍ ।
୧୫ ଲାଅଦିକିଆଦୁ ମାନି ତଡ଼ାନ୍କୁ ନି ତାଙ୍ଗିଁକି, ତାଙ୍ଗିଁ ନୁମ୍ଫା ମାରି ତାମି ଇନ୍ଡ୍ର ଉନ୍ଡ୍ରେମାନୁ ଆଜିମାନି ମଣ୍ତଲିଦି ୱିଜେରିଙ୍ଗ୍ ମା ନମସ୍କାର୍ ଜାଣେକିଦୁ । ୧୬ ମାରି, ମିର୍ ଏଣ୍ତେସ୍ ଇୟା ଆକୁ ପଡ଼ାତି ୱିସ୍ତିଙ୍ଗ୍ ଲାଅଦିକିଆ ମଣ୍ତଲିଦୁ ବା ଏଣ୍ତେସ୍ ଇକା ପଡ଼ାଦେଙ୍ଗ୍ ଆଟ୍ନାର୍, ମାରି ଲାଅଦିକିଆଦି ମଣ୍ତଲିଦି ତଡ଼ାନ୍କୁ ନି ତାଙ୍ଗିଁକି ମି ଲାକ୍ତୁ ଆମା ଆକୁ ପୋକ୍ତାନାର୍, ଆକା ମିର୍ ବା ଏଣ୍ତେସ୍ ପଡ଼ାଦେଙ୍ଗ୍ ଆଟ୍ନିଦେର୍, ଇୟାଉଣ୍ତିଙ୍ଗ୍ ଜାତୁନ୍ ଆଦୁ । ୧୭ [i]ମାରି ଆର୍କିପତିଙ୍ଗ୍ ୱେର୍ନି, “ପ୍ରବୁଦି ସେବା କିନି ଉଣ୍ତିଙ୍ଗ୍ ମିଙ୍ଗିଁ ଆମା ଦାଇତ୍ ସିଆୟ୍ଆତାମାରାତ୍, ଆକା ଏଣ୍ତେସ୍ ୱାଜାବା ୱିସ୍ତୁ ।”
୧୮ ନାନ୍ ପାଉଲ ନା ନିଜେଦି କିୟୁଦାନ୍ ଇୟା ନମସ୍କାର୍ ରାସ୍ସିନା । ନା ଜଇଲ୍ତି ଅବସ୍ତାଦିଙ୍ଗ୍ ବାଣାମାଟ୍ ।