1 Abaho Yabini imndewa wa Hazoli, viyazihulike mbuli azo, katuma usenga kwa Yobabu imndewa wa Madoni na kwa imndewa wa Shimuloni na imndewa wa Akishafu, 2 na kwa iwandewa wakalile kuvigongo va mwambu wa kasikazini, na kwa awo wakalile Alaba ikalile mwambu wa kusini wa Kineleti, na kwa awo wakalile ako kudibawe, na kwa awo wakalile ako Nafati Doli umwambu wa kudihongela zuwa. 3 Vivija kagala usenga kwa Wakanaani wakalile mwambu wa kudilawila zuwa na mwambu wa kudihongela zuwa na kwa Waamoli na Wahiti na Wapelizi na Wayebusi awo wakalile kuvigongo, na kwa Wahivi wakalile hasi ya ulugongo lwa Helimoni mwiisi ya Misipa. 4 Avo wasegela wose na iwakalizi wao wengi ng'hani, hewo wakala wengi kamba msanga wa mwhani, wakala na mituka mingi na falasi wengi. 5 Avo iwandewa awo waiting'hana na iwakalizi wao wose, wachola kwika ng'hambi yao ako kuna gamazi ga Melomu ili waitowe na Waizilaeli.

6 Mndewa Imulungu kamulongela Yoshua, “Sikuuwadumbe hewo, kwavija mayo saa kamba ino nowakoma wose kwa kuwagela mmakono ga Waizilaeli, na gweye kowakanha imigiha iwafalasi na kuisoma moto mituka yao.” 7 Avo Yoshua na iwakalizi zake wawezila kwa kuwasinhukiza ako kuna gamazi ga Melomu na kuwavamila. 8 Mndewa Imulungu kawagela mmakono ga Waizilaeli, wawatowa na kuwawinga mbaka Sidoni ing'hulu na mbaka ako Misilefoti Maimu na mbaka ako umwambu wa kudilawila zuwa wa kubonde da Misipa. Wawatowa na kuwakoma wose. 9 Yoshua kawatendela kamba Mndewa Imulungu viyamulongele. Kawakanha imigiha iwafalasi wao na kaisoma moto imituka yao.

10 Yoshua viyakalile kobwela, kadisola buga da Hazoli. Kamkoma imndewa wa buga dijo kwavija buga da Hazoli dikala ikilongozi wa undewa wose awo. 11 Kaditowa buga dijo na kawakoma wose wakalile mumo, kuduhu munhu yakalile yasigale na kadisoma moto dibuga da Hazoli.

12 Vivija kagasola mabuga gose gayagwe na iwandewa wao kawagoga na kawakoma kwa sime. Kagabananga gose, kamba Musa imsang'hanaji wa Mndewa Imulungu viyamulagize. 13 Lakini Waizilaeli hawagasomile moto gamabuga gazengigwe kuvihame, ila buga da Hazoli diiyeka, ajo Yoshua kadisoma moto. 14 Waizilaeli wasola vinhu vose vikalile mna gamabuga gago na zifugo, lakini wawakoma iwenekae wose kwa sime, na hawamulekile hata munhu. 15 Kamba Mndewa Imulungu viyamulagize Musa msang'hanaji wake na heyo Musa kamulagiza Yoshua na Yoshua katenda gose, na halekile chochose mna igago gose Mndewa Imulungu gayamulagize Musa.

16 Avo Yoshua kaisola isi yose ayo, isi ya kuvigongo va Yuda na bawe jake na isi ya Negebu na isi yose ya Gosheni na isi ya Alaba na isi ya kuvigongo va Izilaeli na bawe jake, 17 kulawa lugongo lwa Halaki behi na Seili mbaka Baali Gadi kubonde da Lebanoni hasi ya lugongo lwa Helimoni. Heyo kawagoga iwandewa wa isi azo zose na kawakoma. 18 Yoshua kaitowa na iwandewa awo wose kwa kipindi kitali. 19 Kuduhu buga diilumbile na iwanhu wa Izilaeli, ila buga da Gibeoni amo muwakalile okala Wahivi. Waizilaeli wagasola mabuga gose gayagwe kwa kuitowa ng'hondo. 20 Vivo viyalondile Mndewa Imulungu kuitenda mizoyo yao midala, na wachole kuitowa na Waizilaeli ili walavigwe kwa kubanangigwa na sikuwoneligwe bazi ila wakomigwe kamba Mndewa Imulungu viyamulagize Musa.

21 Kipindi acho Yoshua kachola kuwakoma Waanaki wakalile okala ako kuna iisi ya kuvigongo, kulawa Hebuloni na Debili na Anabu na isi yose ya kuvigongo va Yuda na isi yose ya kuvigongo va Izilaeli. Yoshua kagananga mabuga gao gose na kawakoma wose. 22 Kuduhu munhu mna iwanhu awo wa Anaki yasigale mwiisi ya Izilaeli, ila wasigala mwiisi ya Gaza na Gati na Ashidodi.

23 Avo Yoshua kaisola isi yose kamba vigali gose gayalongile Mndewa Imulungu kwa Musa. Yoshua kawagwelela isi ayo Waizilaeli kamba uhazi wao, na kawagolela kamba makabila gao vigeli. Abaho isi yose ibwihila na kukala kuduhu ng'hondo kabili.

<- Yoshua 10Yoshua 12 ->