1 Mndewa Adoni Sedeki wa Yelusalemu viyahulike Yoshua kadisola buga da Ai na kudinanga na imndewa wake kamba viyaditendile buga da Yeliko na mndewa wake, na viyahulike iwenekae wa Gibeoni wailumba na Waizilaeli, na sambi okala hamoja na hewo, 2 kadumba ng'hani, kwavija buga da Gibeoni dikala kulu ng'hani hagati ya mabuga ga kindewa na dikala kulu kubanza Ai, na wambigalo wose wakala magalu. 3 Avo, Adoni Sedeki imndewa wa Yelusalemu, kagala usenga kwa Hohamu mndewa wa Hebuloni na Pilamu mndewa wa Yalimuti na Yafia mndewa wa Lakishi na Debili mndewa wa Eguloni, kawalongela, 4 “Izoni munitaze kuditowa buga da Gibeoni, kwavija wailumba hamoja na Yoshua na iwanhu wa Izilaeli.” 5 Abaho awo iwandewa watano wa Waamoli, mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni wailumba hamoja na iwakalizi zao, abaho wachola Gibeoni, weka ng'hambi kudizunguluka dibuga na kudivamila.

6 Iwanhu kulawa Gibeoni wamgalila usenga Yoshua ako Giligali kuna ing'hambi, wamulongela, “Sikuutuleke siye wasang'hanaji wako, wize himahima utuhonye na ututaze, kwavija iwandewa wose wa Waamoli iwokala mwiisi ya kuvigongo waiting'hana watutowe siye.”

7 Avo, Yoshua hamoja na wakalizi zake wose na waja weli magalu wasegela Giligali. 8 Mndewa Imulungu kamulongela Yoshua “Sikuuwadumbe hewo kwavija niye niwagela mmakono gako, kuduhu munhu yonda yakuhume.” 9 Avo kilo kigima watembela kulawa Giligali mbaka Gibeoni, Yoshua kawalawilila kwa kuwasinhukiza. 10 Nayo Mndewa Imulungu kawagela bwembwe Waamoli kuulongozi wa Waizilaeli na Waizilaeli wawakoma wanhu wengi ako Gibeoni na wawawinga mna inzila ya umtelemko wa Beti Holoni na wawakoma mbaka Azeka na Makeda. 11 Abaho viwakalile owakimbila Waizilaeli kumtelemko wa Beti Holoni, baho Mndewa Imulungu kawatowela mvula ya mibwe mikulu kulawa kuulanga viwakalile mnzila mbaka ako Azeka na wakomigwa. Iwanhu wengi wafa kwa mvula ayo ya mibwe kubanza awo wakomigwe na iwanhu wa Izilaeli.

12 Kipindi acho Yoshua kamulongela Mndewa Imulungu mgameso ga Waizilaeli wose mna isiku ayo Mndewa Imulungu viyawagelile Waamoli mmakono ga Waizilaeli,

16 Awo iwandewa watano wakimbila na waifisa ako kuna imhango ako Makeda. 17 Yoshua kalongeligwa mbuli ayo, “Awo iwandewa watano oneka, waifisa mna imhango ako Makeda.” 18 Yoshua kalonga, “Bimbiliseni mibwe mikulu muike aho hamulomo wa imhango, na wekeni wanhu waikalize, 19 lakini mweye sikumukale. Wakwelelezeni iwanhu owehila watoweni kusongela kukisogo. Sikumuwaleke wengile mna gamabuga gao, kwavija Mndewa Imulungu, Imulungu wenu kawagela mmakono genu.” 20 Yoshua na Waizilaeli viwamambukize kuwakoma iwanhu wose na wanhu wadodo wasigale wakimbilila kuna gamabuga gazunguluswe senyenge ya mibwe. 21 Abaho iwanhu wose wabwela kwa Yoshua kuna ing'hambi ako Makeda. Kuduhu munhu mwiisi ayo yagezile kulonga kinhu chochose kihile kwa Waizilaeli.

22 Abaho Yoshua kalonga, “Vuguleni umulomo wa imhango na muwagale awo iwandewa watano kumwangu.” 23 Watenda vivo, wawagala awo iwandewa watano kwa Yoshua, mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni. 24 Wandewa awo viwagaligwe kwa Yoshua, Yoshua kawakema Waizilaeli wose na iwakulu wa wakalizi wacholile na heyo kuna ing'hondo kawalongela, “Kweseni behi muwakanyage iwandewa wano mzisingo.” Na hewo wakwesa behi wawakanyaga mzisingo. 25 Yoshua kawalongela, “Sikumudumbe hebu kunyawanyawa, mugangamale na muwe magalu, kwavija vino vivo Mndewa Imulungu vonda yawatendele iwanhu owehila omuitowa nao.” 26 Abaho Yoshua kawakoma na kawawamba mna imibiki mitano. Wakala aho mbaka ichungulo. 27 Zuwa vidingile, Yoshua kalagiza zing'huli zisegesigwe mna imibiki na zasiligwe mna imhango iwakalile waifisile. Abaho weka mibwe mikulu hamulomo wa imhango, na mabwe gago ga kuko mbaka lelo.

28 Siku didijo Yoshua kadisola buga da Makeda, na kamkoma imndewa wa buga dijo kwa sime na kawakoma iwanhu wose wakalile mumo na hamulekile hata imoja. Kamtendela imndewa wa Makeda kamba viyamtendele mndewa wa ako Yeliko.

29 Abaho Yoshua na Waizilaeli wose wasegela ako Makeda wachola kudivamila buga da Libina. 30 Mndewa Imulungu kadigela buga dijo na imndewa wake mmakono ga Waizilaeli. Wawakoma iwenekae wose kwa misime na hawamulekile hata munhu imoja. Yoshua kamtendela mndewa ayo kamba viyamtendele imndewa wa Yeliko.

31 Abaho Yoshua na Waizilaeli wose wasegela ako Libina wachola ako Lakishi, wadizunguluka buga dijo na kudivamila. 32 Mna isiku ya kabili Mndewa Imulungu kadigela buga dijo mmakono ga Waizilaeli, wawakoma wenekae wose wa buga dijo kamba viwatendile ako Libina.

33 Abaho Holamu mndewa wa Gezeli keza kuwataza iwanhu wa Lakishi. Lakini Yoshua kamkoma hamoja na wanhu zake wose, hamsigase hata munhu imoja.

34 Abaho Yoshua na Waizilaeli wose wasegela ako Lakishi wachola Eguloni. Wadizunguluka buga dijo na kudivamila. 35 Siku didijo wadisola buga dijo, na wawakoma wanhu wose kamba viwatendile ako Lakishi.

36 Abaho Yoshua na Waizilaeli wose wasegela ako Eguloni wachola Hebuloni, na wadivamila buga dijo, 37 na wadisola hamoja na ivijiji vake na wamkoma imndewa wake na iwenekae wake wose, hawamulekile hata munhu imoja kamba viwatendile ako Eguloni.

38 Abaho Yoshua na Waizilaeli wose wabweleganya mbaka kudibuga da Debili na wadivamila, 39 na wadisola buga dijo na vijiji vake. Wamkoma mndewa wake na iwenekae wose na hawamulekile hata munhu imoja kamba viwatendile kudibuga da Hebuloni na imndewa wake na kudibuga da Libina na imndewa wake.

40 Avo Yoshua kaisola isi yose, isi ili kuvigongo na isi ya Negebu na kudibawe na kuna imitelemuko. Kawakoma iwandewa wose na hamulekile hata munhu imoja, ila kawalava ili wabanangigwe iwanhu wose kamba viyamulagize Mndewa Imulungu, Imulungu wa Izilaeli. 41 Yoshua kawahuma iwanhu wose kulawa Kadeshi Balinea mbaka Gaza na kulawa isi yose ya Gosheni mbaka ako Gibeoni. 42 Yoshua kaisola isi ayo yose na iwandewa wose kwa mwanza umoja, kwavija Mndewa Imulungu, Imulungu wa Izilaeli kawagombela. 43 Abaho Yoshua na Waizilaeli wose wabwela kuna ing'hambi ako Giligali.

<- Yoshua 9Yoshua 11 ->