Wasemi 14

Samsoni na mtwanzi kulawa Timina

1 Siku dimoja Samsoni kahumuluka ako Timina, kuko kamona mtwanzi imoja, ayo kakala mndele wa Mfilisiti. 2 Viyabwelile ukae kawalongela tatake na mamake, “Nimona mndele imoja wa Mfilisiti ako Timina. Avo nolonda munisolele yawe mwehe wangu.” 3 Lakini tatake na mamake wamulongela, “Vino kuduhu mndele yoyose kuna iwandugu zako hebu kwa iwanhu wetu wose mbaka uchole kusola mwehe kwa Wafilisiti, iwanhu hawengile kumbi bule?” Lakini Samsoni kamulongela tatake, “Nisoleleni mndele ayo, niye nimnogela.”

4 Tatake na mamake hawajuwile kamba mbuli ayo ilawa kwa Mndewa Imulungu, kwavija kakala kozahila nyafasi ili yawakoboze Wafilisiti, kwavija kipindi acho Wafilisiti wakala owatawala Waizilaeli.

5 Abaho, Samsoni kachola Timina na tatake na mamake, viwavikile kumigunda ya mizabibu ako Timina, baho kalawila mwana wa simba kambumila Samsoni. 6 Baho Loho ya Mndewa Imulungu imwingila Samsoni, hamoja kakala kaduhu kinhu mmakono gake, kambalula simba ayo, kamba munhu yobalula mwana wa mbuzi. Lakini Samsoni hawalongele bule tatake na mamake mbuli ayo. 7 Abaho kahumuluka kachola kalonga na ayo imndele, Samsoni kamnogela mndele ayo. 8 Vikibitile kipindi kabwela kuko Timina kumsola ayo imndele. Viyakalile mnzila kahinduka yalole umtufi wa ija isimba, aho kona nyuki na uki ukala mumo. 9 Avo, kausola uki awo mmakono na kakala koja kuno kogenda mnzila. Kawavikila tatake na mamake kawagwaa uki na hewo vivija wauja. Lakini hawalongele bule kamba uki awo kaulava mumtufi wa simba.

10 Tatake kachola ukae kwa ayo imndele na Samsoni katenda nyimwilinyimwili kamba viwakalile wang'hali otenda iwabwanga. 11 Wafilisiti viwamone Samsoni wamgalila wabwanga malongo madatu wakale na heyo kwa inyimwilinyimwili. 12 Samsoni kawalongela, “Niye nowategela kitendawili kimoja. Kamba mwahanongela fambulo jake choni kuzisiku saba za inyimwilinyimwili, nowagwaa viwalo malongo madatu va kitani na nowagwaa viwalo malongo madatu viyagwe, 13 lakini kamba hamdaha bule kukitegula kitendawili acho, mweye monigwaa viwalo malongo madatu va kitani na monigwaa viwalo malongo madatu viyagwe.” Hewo wamulongela, “Ona, longa tukihulike acho ikitendawili.” 14 Samsoni kawalongela,

“Kulawa kwa ayo yajaga, kilawa kinhu chakuja,

na kulawa kwa mwene nguvu, kilawa kinhu cha mulile.”

Kwa siku ndatu wabwanga awo hawadahile kutegula kitendawili acho.

15 Avo, siku da ikane wamulongela mwehe wake Samsoni, “Umbembekeze mkasano wako yatutegulile acho ikitendawili, ama tokusoma moto gweye na ng'anda ya tatako. Vino, mweye mutugoneka hano twize mutuboke vinhu vetu?” 16 Mwehe wa Samsoni kamcholela Samsoni akuno kolila, kamulongela, “Gweye konihila, huninogela bule. Kuwategela kitendawili wanhu zangu na hunongele bule ukutegula kwake.”

Samsoni kamwidika, “Niye siwalongele bule hata tatangu na mamangu, avo nokulongelaze gweye?” 17 Lakini kagendelela kulila kwa siku zose saba za inyimwilinyimwili. Siku da saba Samsoni kamtegulila imwehe ikitendawili acho kwavija kamgaza ng'hani. Imwehe kawalongela iwanhu zake ikitendawili acho. 18 Siku dija da saba zuwa hadinahonga wamulongela Samsoni,

“Kinhu gani chamulile kubanza uki?

Nani mwene nguvu kubanza simba?”

Samsoni kawedika, “Maza hamulimile na ng'ombe wangu sambi mujuwe kutegula ikitendawili changu.”

19 Baho Loho ya Mndewa Imulungu imwingila Samsoni kwa nguvu, na heyo kachola kudibuga da Ashikeloni, kawakoma wanhu malongo madatu, abaho kavisola viwalo vao, kawagwaa wanhu awo wakitegule ikitendawili chake. Abaho kachola ukae kwa tatake akuno kagevuzika. 20 Na imwehe wa Samsoni kagweleligwa imbwiga yamwimilile viyakalile komsola isiku ya nyimwilinyimwili.

<- Wasemi 13 Wasemi 15 ->