1 “Mnogeleni Mndewa Imulungu, Imulungu wenu na mutende gaja goyolonda, siku zose gogeni malagizo gake na mafundizo gake na nzila zake. 2 Lelo kumbukeni gaja gamuifunzile mbuli ya Mndewa Imulungu, Imulungu wenu kubitila gaja gamugonile. Mweye awo mugonile siyo wanenu, mweye mona ukulu wake na udahi wake na nguvu zake, 3 na vilaguso vake na gaja gayamtendele Falao, imndewa wa Misili na isi yake yose. 4 Gaja gayawatendele iwakalizi wa Misili, na iwafalasi wao na imituka yao ya ng'hondo, na vija viyawakulule mbahali ya Shamu, viwakalile owakweleleza mweye, na Mndewa Imulungu viyawakomile wose na wakuduhu mbaka lelo. 5 Vivija kumbukeni gaja gayawatendele Mndewa Imulungu ako kuluwala vimukalile mnzila mokwiza hano, 6 na gaja gayawatendele iwazukulu wa Lubeni, Datani na Abilamu wanage Eliabu, isi viigubuke mgameso ga iwanhu wose wa Izilaeli na kuwameza hewo na iwanhu wa mng'anda mmwao na vibanda vao na fugo zao na iwasang'hanaji zao. 7 Meso genu gazona mbuli zose ng'hulu, azo ziyatendile Mndewa Imulungu.

8 “Avo gogeni malagizo gose goniwagwaa lelo, ili mudahe kuwa na nguvu ya kuchola kuisola isi ayo, yumuloka kuisola, 9 na mukale siku nyingi mwiisi ayo imemile maziwa na uki, iyaiduwile Mndewa Imulungu kwa wahenga zenu kamba kowagwaa hewo na ulelo wao. 10 Isi yumuchola kuisola haiigala na isi ya Misili, ako kumulawile, ako muhandaga mbeyu na kuzigelela mazi kamba kihati. 11 Lakini isi yumuchola kuisola, imema vigongo na makonde, isi ayo yotowiligwa na mvula. 12 Isi ayo yokalizigwa na Mndewa Imulungu, Imulungu wenu, Mndewa Imulungu, Imulungu wenu koilola goya toka chandusilo cha umwaka mbaka kuuhelelo wa umwaka.

13 “Avo mwahagagoga malagizo goniwagwaa lelo, mwahamnogela Mndewa Imulungu, Imulungu wenu, na mwahamsang'hanila kwa mizoyo yenu yose na kwa loho zenu zose, 14 avo kowagwaa mvula mumsimu ulondigwa, mvula za masika na mvula za vuli, na mweye mosenga ndiya yenu na divai yenu na mavuta genu. 15 Koyoteza mijani mmigunda yenu mbuli ya fugo yenu na mweye moja na kwiguta. 16 Avo, muiteganye, mizoyo yenu sikuiviziligwe, na mweye mohinduka na kuisang'hanila na kuitambikila imilungu iyagwe, 17 baho ng'hasiliki ya Mndewa Imulungu yowakila, na heyo koufunga ulanga ili mvula sikuitowe na migunda yenu sikuilele, avo hamukawa kufa mwiisi inogile iyowagwaa Mndewa Imulungu.

18 “Zikeni mbuli zangu zino mmizoyo yenu na mziloho zenu. Zifungeni mmakono genu na muzivale mvihanga venu kamba kinhu cha kukumbuka. 19 Wafunzeni wanenu mbuli azo, simulileni mbuli azo mwahakala mzing'anda zenu hebu mwahawa mmwanza hebu mwahawasa ikilo hebu imitondo mwahalamuka. 20 Zandikeni mbuli azo uchanha ya milango ya ng'anda zenu na mzinyivi za kwingila mmabuga genu, 21 ili siku zenu na siku za wanenu ziwe nyingi mna iisi Mndewa Imulungu iyaiduwile kowagwaa wahenga zenu, siku zose ulanga vonda uwe uchanha ya iisi.

22 “Mwahagagoga goya malagizo gano gose goniwagwaa, na mwahamnogela Mndewa Imulungu, Imulungu wenu, na kukweleleza nzila zake zose na kumgoga heyo, 23 avo Mndewa Imulungu kowawinga wanhu wa isi zose zili kuulongozi wenu, na mweye moisola isi ya wanhu wa isi zili na nguvu kubanza mweye. 24 Hanhu hohose honda mukanyage kwa magulu genu hokuwa henu. Zimbaka zenu zosongela kuluwala mbaka Lebanoni na kulawa lwanda lwa Fulate mbaka bahali ya Meditelania. 25 Kuduhu munhu yoyose yonda yadahe kugomba na mweye. Kokose konda muchole Mndewa Imulungu, Imulungu wenu kowagela bwembwe wanhu wa isi azo ili wawadumbe kamba viyalongile kotenda.

26 “Loleni, lelo nowekila kuulongozi wenu, kumweda na makungu, 27 momweda kamba mwahagoga malagizo ga Mndewa Imulungu, Imulungu wenu, gano goniwagwaa lelo, 28 na mopata makungu kamba hamgagoga malagizo ga Mndewa Imulungu, Imulungu wenu, na kuileka nzila iniwalagiza lelo, na moitambikila imulungu iyagwe ayo hamuijuwile. 29 Mndewa Imulungu, Imulungu wenu yahawavikiza mweye mwiisi yumuchola kuisola, mulonge mbuli za kumweda kulawa kulugongo lwa Gelizimu, na mulonge mbuli za makungu kulawa kulugongo lwa Ebali. 30 Vigongo avo va ako umwambu wa lwanda lwa Yolidani, mwambu wa kudihongela zuwa wa inzila, mwiisi ya Wakanaani iwokala ako Alaba mwambu kwa mwambu na Giligali behi na mibiki mikulu ya Mole. 31 Molondigwa kuloka ulwanda lwa Yolidani ili muchole mukaisole isi iyowagwaa Mndewa Imulungu, Imulungu wenu. Avo mwahaisola na kukala mumo, 32 iteganyeni, mugagoge malagizo gose na mafundizo gose goniwagwaa lelo.

<- Kumbukumbu 10Kumbukumbu 12 ->