Kumbukumbu 10

Musa kobokela kabili Malagizo Longo

(Kulawa 34:1-10)

1 “Abaho Mndewa Imulungu kanongela, ‘Songola vibao vibili va mabwe kamba vija va ichanduso, na utende sanduku da mbao, abaho ukwele kuno kulugongo kumwangu, 2 na niye nokwandika mvibao vivo mbuli zizija zikalile zandikigwe mvibao vija viubenile, abaho uvigele ivibao vivo mdisanduku.’

3 “Avo, nitenda sanduku da mbiki wa mkese na nisongola ivibao vibili va mabwe kamba vija va ichanduso, abaho nivigoga mmakono nikwela navo uchanha kulugongo. 4 Mndewa Imulungu kandika mna ivibao vivo mbuli zizija kamba za ichanduso. Gaja Gamalagizo Longo gayawalongele kuja kulugongo, lukalile lokwaka moto, mna isiku ija vimuiting'hane. Abaho Mndewa Imulungu kanigwaa avo ivibao. 5 Nihinduka, nihumuluka hasi kulawa kulugongo kamba Mndewa Imulungu viyanilagize, na nivigela avo ivibao mdisanduku dinhendile, na va mmo mdisanduku kamba Mndewa Imulungu viyanilagize.”

6 Wanhu wa Izilaeli wagendelela na mwanza kulawa kuvisima va wanhu wa ulelo wa Yaakani mbaka Moseloti. Kuko Haluni kafa na kazikigwa. Imwana Eleazali kasola isang'hano ya ulava nhosa. 7 Kulawa kuko wachola mbaka Gudigoda na kulawa Gudigoda mbaka Yotibata, hanhu heli na vizanda vingi va mazi. 8 Kipindi acho, Mndewa Imulungu kawasagula iwanhu wa kabila da Lawi wadipape sanduku da lagano da Mndewa Imulungu, na wamsang'hanile kamba walava nhosa na wawatambikile iwanhu kwa twaga jake mbaka vino lelo. 9 Lekaavo wanhu wa kabila da Lawi wabule uhazi wa isi kamba Waizilaeli wayao. Mndewa Imulungu ayo uhazi wao kamba Mndewa Imulungu, Imulungu wenu viyawalongele.

10 “Nikala kulugongo kwa siku malongo mane, imisi na ikilo kamba aho haichanduso. Mndewa Imulungu kanitegeleza kabili na katogola kamba hawakoma bule. 11 Abaho kanongela, ‘Segela ugendelele na umwanza wako uwalongoze iwanhu ili wadahe kwingila na kuisola isi iniiduwile kwa wahenga zao kamba nowagwaa hewo.’

Kumdumba Mndewa Imulungu

12 “Avo mweye wanhu wa Izilaeli Mndewa Imulungu, Imulungu wenu kolonda choni kumwenu, ila mumdumbe Mndewa Imulungu, Imulungu wenu, muzikweleleze nzila zake zose, mumnogele na mumsang'hanile Mndewa Imulungu, Imulungu wenu, kwa mizoyo yenu yose na kwa loho zenu zose, 13 na mugoge malagizo na mafundizo ga Mndewa Imulungu goniwagwaa lelo, mbuli ya ganogile genu wenyego. 14 Loleni, ulanga hata ulanga uli uchanha ng'hani, mwenyego Mndewa Imulungu, Imulungu wenu, isi yose na vose vili mumo vake heyo. 15 Vivija Mndewa Imulungu kawanogela iwahenga zenu na kawasagula mweye wanhu wa ulelo wa hewo muwe wanhu zake hanhu ha iwanhu wayagwe wose kamba viili lelo. 16 Avo kulawa sambi mudigoge lagano da Mndewa Imulungu mna imizoyo yenu na sikumuwe wadala kabili.[a] 17 Kwavija Mndewa Imulungu, Imulungu wenu ayo Imulungu wa imulungu na Mndewa wa iwandewa. Heyo ayo Imulungu mkulu na yeli na udahi na wakudumbigwa, habagula iwanhu na habokela hongo. 18 Kowagwaa haki iwana iwakiwa na wagane na kowanogela wanhu baki na kowagwaa ndiya na viwalo. 19 Avo, muwanogele wanhu baki, kwavija na mweye vivija mukala wanhu baki ako mwiisi ya Misili. 20 Mdumbeni Mndewa Imulungu, Imulungu wenu na mumsang'hanile na mumgoge ng'hani na muiduwile kwa twaga jake. 21 Heyo ayo wakuigodela, heyo ayo Imulungu wenu, yawatendele mbuli zino ng'hulu na zakudumbiza, zimonile kwa meso genu wenyego. 22 Wahenga zenu viwacholile Misili wakala wanhu malongo saba waiyeka, lakini sambi Mndewa Imulungu, Imulungu wenu kawatenda muwe wengi kamba nhondo za kuulanga.

<- Kumbukumbu 9 Kumbukumbu 11 ->