Wani 19

Ketsutsi kemɨtiutaxanetsie

(Wa 19:1-16 – Mat 27:27-31, Mar 15:16-20)

1 Hikɨ Piratu Ketsutsi kanewitɨni, katiniuta'aita mɨkuweiyaxɨanikɨ. 2 Kuyaxi xuya kurunayari me'utatsaka mu'uyatsie mekanenutimanirieni, meta herie mieme 'ixuriki mɨtaɨraɨyekɨ mekanenakuwirieni.

3 Hɨxiena mekani'axekaitɨni mɨpaɨ me'utiyuatɨ:

—Ke'aku huriyutsixi tiwa'aitɨwame.

Mɨpaɨ mete'ikɨhɨawetɨ mekanenutawayakaitɨni.

4 Hikɨ tawarita takwa kaniwayeyani Piratu, mɨpaɨ katiniwarutahɨawe:

—Kamɨ 'ena takwa paitɨ nepɨxe'atɨirieni xemɨtemaikakɨ tixaɨtɨ nemɨkatiukaxeikɨ hetsiena nemɨtiuhɨpanikɨ.

5 Hikɨ Ketsutsi kaniwayeyani xuya kurunayari 'anamatɨ, herie mieme 'ixuriki mɨtaɨraɨye 'anakuwietɨ.

Piratu mɨpaɨ katiniwarutahɨawe:

—Kamɨ tewi.

6 Hikɨ mawari wewiwamete tewa'aitɨwamete meta tehɨwemete kepauka memixei mekaniutihiwa mɨpaɨ me'utiyuatɨ:

―Kuruxitsie keneumi'a, kuruxitsie keneumi'a.

Piratu mɨpaɨ katiniwarutahɨawe:

—Xemetsɨ xekenanuwitɨki, kuruxitsie xekenemi'a. Neri tixaɨtɨ nepɨkatiukaxei hetsiena nemɨtiuhɨpanikɨ.

7 Huriyutsixi mɨpaɨ mekatenita'eiya:

—Tame 'inɨari niukiyari tekanexeiyani, mɨkɨ 'inɨari kemaine, kaneuyeweka 'ikɨ mɨmɨnikɨ Kakaɨyari nu'aya mayuyeitɨakɨ.

8 Piratu 'ikɨ niuki 'u'enieka matsi waɨkawa kanimakaitɨni. 9 Tawari 'itsɨkame kiita heutahaka mɨpaɨ Ketsutsi katiniutahɨawe:

—Hakewa pepemieme 'ekɨ.

Ketsutsi pɨka'ita'ei: 10 Piraturi mɨpaɨ katinitahɨawe:

—¿Pekanetita'eiya? Pekatimate ne heitserie nemexeiya nemɨmatsixɨnakɨ, heitserie nerexeiyata kuruxitsie nemɨmatsimienikɨ.

11 Ketsutsi mɨpaɨ katinita'eiya:

—'Ekɨ heitserie pepɨkahexeiyanikeyu nehepaɨtsita taheima miemekɨ xɨka pekapitɨariekake. 'Ayumieme kemɨ'ane mɨnetsiyetua 'ahetsɨa, mɨkɨ matsi waɨkawa 'axakatiniuyurieni.

12 Piratu 'ayumiemeri katinikuwaunekaitɨni kemɨtixɨnakɨ. Peru huriyutsixi mekaniutihiwa mɨpaɨ me'utiyuatɨ:

—Xɨka 'ikɨ pe'uxɨna, Ti'aitame Tsetsaxi pepɨkanaki'erie. Yunaitɨ te'aitamete memayuyeitɨwa Tsetsaxi mekanaye'unieka.

13 Hikɨ Piratu 'ikɨ waniuki 'u'enieka Ketsutsi kaniwayehana. Mana kaniukayerɨni Piratu yu'uwenitsie Makutenutsariya mɨrakutewatsie (hepɨrayutsixi waniukikɨ Kawata mɨrakutewatsie). 14 'Iya tukaritsie mekaniha'aritɨakaitɨni Patsikwa 'ixɨarariyari. 'Etsiwatɨkaku tuka kanayeiximekaitɨniri, mɨpaɨ katiniwarutahɨawe huriyutsixi:

—Kamɨ tixe'aitɨwame.

15 Mɨkɨ matsi mɨpaɨ mekateniuhiwa:

—Kenanuwitɨki, kenanuwitɨki, kuruxitsie kenemi'a.

Piratu mɨpaɨ katiniwarutahɨawe:

—¿Kamɨtsɨ kuruxitsie netimieni tixe'aitɨwame?

Mawari wewiwamete tewa'aitɨwamete mɨpaɨ mekatenita'eiya:

—Tame xeime tepɨkahexeiya tati'aitɨwame, Tsetsaxi xeikɨa pɨtati'aitɨwame.

16 Hikɨ kaniwayetuirieni kuruxitsie mɨmierienikɨ. Hikɨ Ketsutsi mekanehana.

Ketsutsi kemɨtiumierie kuruxitsie

(Wa 19:17-24 – Mat 27:33-44, Mar 15:22-32, Ruk 23:33-43)

17 Yukuruxi 'atɨtɨ mana kaneyani Mɨki Mu'uya Manuka mɨrakutewatsie (hepɨrayutsixi waniukikɨ Kurukuta mɨrakutewatsie). 18 Mana kuruxitsie mekanitiwieni, meta yuhutame hamatɨana mekaniwarutiwɨtɨani tapa xeime tapata xeime, Ketsutsi wahixɨata.

19 Meta Piratu 'inɨari kaniuta'utɨani, kuruxitsie kaneimani, mɨpaɨ katine'ukaitɨni: «Ketsutsi natsaretitanaka huriyutsixi tiwa'aitɨwame». 20 Huriyutsixi yumɨiretɨ 'utɨarika mekanakaterɨwa, kiekari mehurakaikɨ Ketsutsi mamierietsie. Hepɨrayutsixi, xumatari, kɨriyekutsixi waniukitekɨ pɨraye'uxakaita.

21 Hikɨ huriyutsixi mawari wewiwamete tewa'aitɨwamete mɨpaɨ Piratu mekateniutahɨawe:

—“Huriyutsixi tiwa'aitɨwame” pepɨkatiku'utɨwani, matsi pɨta ketineu'utɨa “Huriyutsixi tiwa'aitɨwame muyuxatakai”.

22 Piratu mɨpaɨ katiniwaruta'eiya:

—Kenemɨtiu'utɨa nekatiniuta'utɨaniri.

23 Hikɨ kuyaxi Ketsutsi kuruxitsie me'utiwieka, 'ixurikiteya mekaneutahuriexɨani. Naukame mekanayeitɨani, yuxexuitɨ kuyaxi xei'ixurikiyari memexeiyanikɨ. Tetɨata mieme 'ixurikieya pɨkawipekai, 'ayexewimekɨ xeikɨa pɨ'itsekai naitɨ.

24 Hikɨ mɨpaɨ mekateniyutahɨawe:

—Tepɨka'ititsanani, matsi tepɨtata'iwa, tsiparatsɨ kemɨ'ane pe'iwa.

Merikɨtsɨ mɨpaɨ mekateniuyurieni kuyaxi. Mɨpaɨ katinaye'atɨarieni 'utɨarika mɨpaɨ maine:

«Ne'ixurikite mepɨyutahuritɨa,

meta mekaniyuta'iwa ne'ixɨrikikɨ».

25 Ketsutsi kuruxieya 'aurie Ketsutsi maamaya mekaniti'ukaitɨnita, maamaya 'iwaya, Mariya Kɨreupa 'ɨyaya, Mariya Mararatanaka yunaitɨ. 26 Kepauka Ketsutsi yumaama muxei meta tiyɨ'ɨkitɨwame mɨnaki'eriekai 'auriena 'uweme, yumaama mɨpaɨ katiniutahɨawe:

—'Ukaratsi 'aku, mana 'aniwe kaniuweni.

27 Meta tiyɨ'ɨkitɨwame mɨpaɨ katiniuhɨritɨani:

—Kamɨ 'amaama.

Mɨkɨ tukaritsietɨtɨ tiyɨ'ɨkitɨwame yukie kanitanaki'erieni.

Ketsutsi yu'iyari kemɨtiyetua

(Wa 19:29-30 – Mat 27:48, 50, Mar 15:36-37, Ruk 23:36)

28 'Anari Ketsutsi mɨpaɨ timaitɨ naitɨ 'ari maye'atɨariekɨ, 'utɨarika maye'atɨarienikɨ mɨpaɨ kaniutayɨni:

—Nepeuharimɨkɨ.

29 Xari mana kaniukateitɨni winu matsina hɨnetɨ, hikɨ haa 'itseweme mukuxani me'utahɨniyaka winu matsinakɨ, hitsupu kɨyeyaritsie me'iyeka, teniena mekaneititserieni. 30 Ketsutsi he'inɨataka winu matsina mɨpaɨ kaniutayɨni:

—Kanaye'aniri.

Yumu'utsie 'anakatutsireka yu'iyari kaniyetuani.

31 Merikɨtsɨ 'iya tukaritsie 'ixɨarari mekaniha'aritɨakaitɨni. 'Ayumieme huriyutsixi Piratu mekaniutawawirieni wawatute memɨtitarakɨ memɨwaraka'ɨnikɨ, kaxarite memɨkayuhayewakɨ kuruxitsie me'uyewɨtɨ 'uxipiya tukaritsie. 'Iya 'uxipiya tukaritsie yemekɨ patsiekamekɨ memuyukuxexeɨriwakaikɨ. 32 'Ayumieme kuyaxi mana mekaniu'axɨani, kuruxitsie memuyewɨkai hamatɨana xeime watuteya mekaniutitara, xeimetatsiere watuteya mete'utitaraxɨ. 33 Ketsutsi hetsɨa me'u'axɨaka watuteya mepɨka'utitaraxɨ memixeikɨ mɨkime. 34 Matsi xewitɨ kuya pitsikakɨ 'akitana kaneititseni, hikɨ yapauka kananeni xuriya meta haa. 35 Kemɨ'ane munierixɨ katiniutahekɨata, tita mɨtitahekɨata kaniyuritɨni. Mɨkɨta katinimaika yuri mutainekɨ, yuri xemɨte'eriekakɨ xemeta. 36 Mɨpaɨ katiniuyɨni 'utɨarika maye'atɨarienikɨ mɨpaɨ mutaine: «'Umeyarieya pɨka'akamurarieni». 37 Tawarita xewitɨ 'utɨarika 'ipaɨ kanaineni: «Mekanixeiyakuni kemɨ'ane memutse».

Teukiyapa kememɨteheitate Ketsutsi

(Wa 19:38-42 – Mat 27:57-61, Mar 15:42-47, Ruk 23:50-56)

38 Merikɨtsɨ 'arike Kutse 'Arimateya kiekame Piratu kaniutawawirieni menukwenikɨ Ketsutsi kaxarieya. Kutse Ketsutsi hetsɨa mieme katiniyɨ'ɨkitɨwametɨkaitɨni 'awie, mɨwamakaxekaikɨ huriyutsixi. Piraturi kanipitɨani, hikɨ kaneyani, kaxarieya kanekweni. 39 Nikuremu manata kaninuani meripaitɨ hetsɨana munua yɨwikɨta. Mɨkɨ mixaxi meta 'aruhe witsimu'ɨa yunɨkame kani'atɨani merieneka hepaɨ paɨmeme. 40 Hikɨ Ketsutsi kaxarieya mekanekweni, mekaniku'eima 'ixurikitekɨ witsimu'ɨa me'ikawirieka. Mɨpaɨ kani'aneni huriyutsixi wayeiyari teukiyakɨ. 41 Mana kuruxitsie mamierietsie haraweri kaniyemakaitɨni. Harawerita teukiyapa hekwamekɨ mɨwaye'inierie kanikumakaitɨni. Xewitɨ 'akuxi mɨkɨ teukiyapa pɨkakateukiewekai. 42 Muwa 'ayumieme Ketsutsi mekaneutateni, huriyutsixi memɨyuha'aritɨakaikɨ 'iya tukaritsie, teukiyapa mehurakaikɨ.

<- Wani 18 Wani 20 ->