Wani 18

Ketsutsi kememɨte'uwi

(Wa 18:3-11 – Mat 26:47-56, Mar 14:43-50, Ruk 22:47-53)

1 Mɨpaɨ 'utayɨka kaneyani Ketsutsi teyɨ'ɨkitɨwamete wahamatɨa, Kiruni 'akiyaritsie mekaniukɨne haraweri muyemakaitsie paitɨ, mana kaneutahani teyɨ'ɨkitɨwamete wahamatɨa.

2 Kura miyetuanikekai muwa kanemariekaitɨni, mɨixa Ketsutsi teyɨ'ɨkitɨwamete wahamatɨa muwa memɨyukuxexeɨriwakaikɨ. 3 Kura kuyaxi warawitɨtɨ, tukita tehɨwemete mawari wewiwamete tewa'aitɨwamete wahetsɨa miemete meta paritseutsixi wahetsɨa miemete warawitɨtɨ, mana kaninuani 'utsikɨ me'ukɨxetɨ, meta tekɨxiteta watitataweme me'utɨkɨtɨ meta kutsirate mete'u'ɨtɨ.

4 Ketsutsi naime timaitɨ kemɨtiwiyarienikekai, wahepa kaneyani. Mɨpaɨ katiniwarutahɨawe:

—¿Kepaikɨ xepɨtehakuwautɨwe?

5 Mɨkɨ mɨpaɨ mekatenita'eiya:

—Ketsutsi natsaretitanaka.

Mɨkɨ mɨpaɨ katiniwarutahɨawe:

—Netsɨ nepɨhɨkɨ.

Kura miyetuanikekai mana kaniuwekaitɨni wahamatɨa. 6 Hikɨ «ne nepɨhɨkɨ» tiwarutahɨaweku yukutama mekaniyekɨne, mekanatixɨrieni kwiepa.

7 'Ayumieme tawarita Ketsutsi mɨpaɨ katiniwaruta'iwawiya:

—¿Kepaikɨ xepɨtehakuwautɨwe?

Mɨkɨ tawarita mɨpaɨ mekaniutiyuani:

—Ketsutsi natsaretitanaka.

8 Ketsutsi mɨpaɨ katiniwaruta'eiya:

—Yanepɨtixehahɨawe, ne nepɨhɨkɨ. Xɨkari xenetsikuwautɨweni ne, xekeniwaruhayewa 'ikɨ memɨyehukɨ.

9 Maye'anikɨ niukieya kemainekai: «Mɨkɨ pemɨnetsiyetuiri nixeime nepɨkaheuyehɨa».

10 Hikɨ Tsimuni Pekuru 'ixipara watihanaka, mawari wewiwamete tiwa'aitɨwame ti'uximayatameya katiniukwinitɨani, tserietana mieme nakaya kanawiteni. (Ti'uximayatame Maruku katinitewakaitɨni).

11 Hikɨ Ketsutsi mɨpaɨ Pekuru katiniutahɨawe:

—'A'ixipara keneuka'uta huyeritana. ¿Kamɨtsɨ ne nekarenu'ieni tekɨxita mieme ne'ukiyari mɨnetsi'itɨani yanemɨranayeyanikɨ?

Mawari wewiwamete tiwa'aitɨwame hetsɨa kemɨti'atɨarie Ketsutsi

(Wa 18:12-13 – Mat 26:57)

12 Hikɨ kuyaxi meta kuyaxi tiwa'aitɨwame meta huriyutsixi watukita tehɨwemete Ketsutsi mekaniuwiya. Mekanihɨani, 13 'Anatsi hetsɨa meri mekani'atɨani, mɨkɨ Kaipatsi munieya kanihɨkɨtɨkaitɨni, Kaipatsi mawari wewiwamete tiwa'aitɨwame kanihɨkɨtɨkaitɨni mɨkɨ wiyaritsie. 14 Kaipatsi kanihɨkɨtɨkaitɨni kemɨ'ane mɨwaruti'imaiyaxɨ huriyutsixi matsi 'aixɨa mɨyɨnikɨ xewitɨ tewi mɨmɨnikɨ teɨteri wahetsiemieme, 'utaitɨ.

Pekuru kemɨtiyuku'imawakai kename Ketsutsi kamatekai

(Wa 18:16-18 – Mat 26:69-70, Mar 14:66-68, Ruk 22:55-57)

15 Merikɨtsɨ Tsimuni Pekuru Ketsutsi kaniuweiyakaitɨni, xewitɨta tiyɨ'ɨkitɨwame tiweiyakai, mawari wewiwamete tiwa'aitɨwame mɨkɨ tiyɨ'ɨkitɨwame kanimatekaitɨni, Ketsutsi hamatɨa kaneutahani mawari wewiwamete tiwa'aitɨwame kurarutana paitɨ. 16 Matsi Pekuru mana kaniutiwekaitɨni takwa kitenie 'aurie. Hikɨ mɨkɨ tiyɨ'ɨkitɨwame mawari wewiwamete tiwa'aitɨwame mimatekai mana kaneyani, kitenie tihɨweme kaniutahɨawe, hikɨ kuraruta paitɨ Pekuru kani'atɨani. 17 'Ɨimari kitenie mɨtihɨwemetɨkai mɨpaɨ Pekuru katiniutahɨawe:

—¿'Ekɨta 'ikɨ tewi teyɨ'ɨkitɨwametemama wahetsɨa mieme pekatihɨkɨ?

Pekuru mɨpaɨ kaniutayɨni:

—Ne nepɨkahɨkɨ.

18 Hikɨ te'uximayatamete tukita tehɨwemete wahamatɨa mana mekaniuti'ukaitɨni mekɨɨxetɨ me'atinaika, muhaɨtɨkaikɨ. Pekuru wahamatɨata kaniutiwekaitɨni kɨɨxetɨ.

'Anatsi Ketsutsi kemɨtiuta'iwawiyaxɨ

(Wa 18:19-24 – Mat 26:59-68, Mar 14:55-65, Ruk 22:63-71)

19 Merikɨtsɨ mawari wewiwamete tiwa'aitɨwame Ketsutsi kaniuta'iwawiya teyɨ'ɨkitɨwametemama wahepaɨtsita, tita mɨti'ɨkitakai hepaɨtsita.

20 Ketsutsi mɨpaɨ katinita'eiya:

—Ne teɨteri wahɨxie nekatinikuxatakaitɨni kwiepa, ne neheyemekɨ nekatini'ɨkitakaitɨni tukiteta, tuki 'amɨpatata, hakewa yunaitɨ huriyutsixi memɨyutixexeɨriwa. Ne tixaɨtɨ nepɨkatikuxatakai 'awie. 21 ¿Ketitayari penetiku'iwawiya ne? Keniwaruta'iwawiya mɨkɨ memɨnetsi'eniekai pɨta tsiparatsɨ kenemɨtiwakuxaxatɨwakai. Mɨkɨ mekatenimaika kenemutayɨ.

22 Mɨpaɨ 'utayɨku, xewitɨ tukita tihɨweme mana mutiwekai Ketsutsi 'aurita kaneukuwani mɨpaɨ 'utaitɨ:

—¿Mɨpaɨ petiku'eiya mawari wewiwamete tiwa'aitɨwame?

23 Ketsutsi mɨpaɨ katinita'eiya:

—Xɨkatsɨ 'axane'utayɨni, ketineutahekɨata ketitakɨ 'axanemɨtiutayɨ. Mexɨka 'aixɨa ne'utaineni, ¿ketitayari penetikuwaya?

24 Hikɨ 'Anatsi kaneinɨ'ani hɨakame Kaipatsi hetsɨa mawari wewiwamete tiwa'aitɨwame hetsɨa.

Pekuru tawarita kemɨtiyuku'imawakai kename Ketsutsi kamate

(Wa 18:25-27 – Mat 26:71-75, Mar 14:69-72, Ruk 22:58-62)

25 Merikɨtsɨ Tsimuni Pekuru mana kaniutiwekaitɨni kɨɨxetɨ.

Hikɨ mɨpaɨ katiniuta'iwawiyarieni:

—¿'Ekɨ teyɨ'ɨkitɨwametemama wahetsɨa mieme pekatihɨkɨ?

Mɨkɨ kaniyuta'imani, mɨpaɨ kaniutayɨni:

—Ne nepɨkahɨkɨ.

26 Xewitɨ mawari wewiwamete tiwa'aitɨwame te'uximayatametemama, Pekuru nakaya meukuwitekai kanimarieyatɨkaitɨni, mɨkɨ mɨpaɨ katinitahɨawe:

—¿Tamɨ ne nekamerexei harawerita hamatɨana peheyeikame?

27 Tawarita kaniuyuta'imani Pekuru, hikɨ yapauka kaniutahiwa wakana.

Piratu hetsɨa kemɨti'atɨarie Ketsutsi

(Wa 18:29-40 – Mat 27:11-18, 20-23, Mar 15:2-15, Ruk 23:2-3, 18-25)

28 Hikɨ Kaipatsi hetsɨa meheyekɨneka Ketsutsi mekani'atɨani 'itsɨkame kie, kaniuyuimuanatɨkaitɨniri. Mɨkɨri mepɨkaheutahaxɨa 'itsɨkame kiita kapa meka'itiyatɨ me'akɨnekɨ, matsi Patsikwa 'ikwaiyari memɨtekwanikɨ. 29 'Ayumieme Piratu takwa kaniwayeyani wahɨxie, mɨpaɨ kaniutayɨni:

—¿Ketitakɨ 'ikɨ tewi xetexaneta?

30 Mɨkɨ mɨpaɨ mekatenita'eiya:

—Xɨka 'ikɨ 'axakatiyurienenike, tepɨkamatsiyetuirienikeyu.

31 Hikɨ Piratu mɨpaɨ katiniwarutahɨawe:

—Xekenanuwitɨki, xekeneuta'inɨata xe'inɨari niukiyari kemaine.

Huriyutsixi mɨpaɨ mekatenitahɨawe:

—Tame heitserie tepɨkahexeiya tewi temumienikɨ.

32 Mɨkɨkɨ mɨpaɨ katinaye'ani Ketsutsi niukieya, kemutainekai kemɨtimɨnikekai tikuxatatɨ.

33 Hikɨ tawarita Piratu 'itsɨkame kiita kaneutahani, hikɨ Ketsutsi kaniutahɨawe, mɨpaɨ katinitahɨawe:

—¿'Ekɨ huriyutsixi petiwa'aitɨwame?

34 Ketsutsi mɨpaɨ katinita'eiya:

—¿'Akɨmana mɨpaɨ petiutaine, hipatɨ nutsu mɨpaɨ memete'utahɨawixɨ nehepaɨtsita?

35 Piratu mɨpaɨ katinita'eiya:

—¿Ne netihuriyu? 'Ateɨterima, mawari wewiwamete tewa'aitɨwamete mepɨmatsiyetua nehetsɨa. ¿Kepetiuyuri?

36 Ketsutsi mɨpaɨ katinita'eiya:

—'Ena kwiepa pɨkamieme kenemɨti'aita. Xɨka 'ena kwiepa miemetɨnike kenemɨti'aita, nehetsɨa miemete tehɨwemete mekaniyukwitɨwenikeyu nemɨkayetuiyanikɨ huriyutsixi wahetsɨa. Matsi hikɨ kenemɨti'aita 'ena pɨkamieme.

37 Piratu mɨpaɨ katinitahɨawe:

—Kaukatsɨ peti'aitame 'ekɨ.

Ketsutsi mɨpaɨ katinita'eiya:

—'Ekɨtsɨ mɨpaɨ pekaniutaineni kename ne ti'aitame nehɨkɨ. Ne 'ayumieme nekaniutinuiwa, 'ayumieme kwiepa nekaninuani, nemɨtitahekɨatakɨ tita yuri mɨraine hepaɨtsita. Yunaitɨ yuri mɨraine hetsiemiemete mekaneni'enieka ne'utaniukame.

38 Piratu mɨpaɨ katinitahɨawe:

—¿Ketita tihɨkɨ yuri mɨraine?

Hikɨ mɨpaɨ 'utayɨka tawari kaniwayeyani huriyutsixi wahɨxie, mɨpaɨ katiniwarutahɨawe:

—Ne tixaɨtɨ nepɨkatiukaxei hetsiena nemɨtiuhɨpanikɨ. 39 'Ipaɨ kani'aneni xeyeiyari, xeime nemɨxexɨnirienikɨ Patsikwa 'ixɨararipa. Merikɨte, ¿xekateyuwaɨriya nemɨxexɨnirieni “huriyutsixi tixe'aitɨwame”?

40 Hikɨ yunaitɨ mekaniutihiwa mɨpaɨ me'utiyuatɨ:

—Mɨkɨ pɨkatixaɨ, Waxawaxi pɨta.

'Iya Waxawaxi katininawayametɨkaitɨni.

<- Wani 17 Wani 19 ->