1 Hikɨ 'iyatukaritsie 'ixaheritsixi ti'aitame mepɨkahexeiyakai, Rani xiɨyarimama kwie mekaniwautɨwekaitɨni yuhetsiemieme hakewa memekuyaxekɨ, mɨkɨ 'akuxi mepɨkayetuiriyariewekai yukwie, hipatɨ kememɨteyetuiriyarie 'Ixaheri niwemama. 2 Rani xiɨyarimama Tsura meta 'Etsitahuri metitetɨ, yu'auxɨwime kwinimieme memɨteheuyutakwiwawe mekaniwaranayexeiya kwie memɨxeiyayukɨ 'awie. Mɨpaɨ mekateniwarutahɨawe: «Xekenehu, kwie xekenexeiyayu».

Mɨkɨ hɨritsie mekaniye'axɨani 'Epɨrahini kwieyaritsie, Mikahiyaxi kie mekaniye'axɨani, mana mekanitiheteitɨni. 3 Kepauka mana memu'axɨa Mikahiyaxi kie, rewi tewiyari niukieya mekaniu'enieni mekaneitimani, 'ayumieme mɨpaɨ mekatenita'iwawiya:

―¿Kemɨ'ane 'uwa pɨmatsi'atɨa? ¿Kepetiyuriene? ¿Tita petikuwaune 'uwa?

4 Temaikɨ katiniwarutaxatɨani Mikahiyaxi kemɨtiparewi, mɨpaɨ kaniutayɨni:

―Pɨnetsi'uta'ini nepɨmawari wewiwameya pɨneti'iwitsitɨa.

5 Mɨkɨ mɨpaɨ mekatenitahɨawe:

―Tematsiwawirie Kakaɨyari pemɨtahɨawekɨ mɨpaɨ temɨtehetimanikɨ xɨka 'aixɨa tetehakunuaxɨakuni.

6 Mawari wewiwame mɨpaɨ katiniwarutahɨawe:

―Xekenehu kayuwatɨ xehexeiyatɨ. Yawé kexemɨte'akunuaxɨani pɨtimate 'aixɨa pɨtixehakunuitɨani xehuyeta.

7 Memuyu'auxɨwi mekanekɨne, Rahitsi mekaniye'axɨani, mana mekaniuneniere teɨteri mekaniwaruxeiya 'aixɨa meteheukutekame, kayuwatɨ meta yu'iyarikɨ, kememɨte'u'uwakai tsiruniyutsixi. Tixaɨtɨ pɨkatiwareuyehɨakai naime mekateniukaxexeiyakaitɨni. 'Ateewa paitɨ mekatenitekaitɨni tsiruniyutsixi mematitekaitsie, hipame wahamatɨa mepɨkayuxewiriyakai. 8 Kepauka memakunuaxɨa Tsura meta 'Etsitahuri kiekariyaritsie, wa'iwama mɨpaɨ mekateniwaruta'iwawiya:

―¿Ke'aku xetehakunuaxɨa?

9 Mɨkɨ mɨpaɨ mekaniutiyuani:

―Hikɨmɨtɨka, tekaniwaretakwikuni. Kwie 'aixɨa 'anekame tekanexeiya. Xeme mɨpaɨ xeteheukuteni 'atsixekateyurietɨ. Xepɨkayu'iyaritɨaka xeimieme tepɨteheyurieni. 10 Kepauka mana xemɨ'axɨani, kiekari xekanetaxeiyakuni 'aixɨa raku'anekame meta kwie 'ahakuyeukame Kakaɨyari mɨxeyetuirie. Yemekɨ mɨkɨ kwieyaritsie tixaɨtɨ pɨkareuyewetse.

11 Hikɨ Tsura meta 'Etsitahuri mekaniyekɨne 'ataxewime tsienituyari Rani xiɨyarimama yutupi me'u'ɨtɨ meheuyukwiyuka. 12 Mekanekɨne Kiriati-Yeharini mekanikuyaxe Kura kwieyaritsie. 'Ayumieme hikɨ Kiriati-Yeharini 'utatanatsie “Rani kiekatari memaka'uxipi” katinakutewaka. 13 Manata memɨyekɨ mekanekɨne muhɨriyatsie 'Epɨrahini kwieyaritsie, Mikahiyaxi kie mekaniye'axɨani.

14 Hikɨ yu'auxɨwitɨ kwie memekuxei Rahitsi kwieyari, yu'iwama mɨpaɨ mekateniwarutahɨawe:

―Mɨpaɨ xetemate 'ikɨ kii 'ena muku'uta mawari wewiwame kamixaya 'etsimɨnena heriemieme kanexeiyani meta hipame kakaɨyarixi, xeime xixiyakame pɨratakɨ wetsitɨariekame. ¿Hikɨ xeme kexehaitɨkani?

15 Mɨkɨ 'ahurawa me'ukɨneka, Rewi tewiyari kiita mekaneutahaxɨani, Mikahiyaxi kiiya mɨhɨkɨtɨkai, mekanitahɨawe 'aixɨa 'anemekɨ. 16 'Ataxewime tsienituyari Rani xiɨyarimama kitenie mekaniti'ukaitɨni yutupi me'u'ɨtɨ memeuyukwiyu metetahɨtɨ kitenie. 17 Meyu'auxɨwitɨ kwie memekuxeiyakai mekaneutahaxɨani kakaɨyari mɨxixiya pɨratakɨ mɨwetsitɨarie mekanewayekweni, meta mawari wewiwame kamixaya 'etsimɨnena meta hipame kakaɨyarixi. Mexi kuyaxi 'ataxewime tsienituyari yutupi me'u'ɨtɨ memeuyukwiyu kitenie mawari wewiwame hamatɨa meti'ukai.

18 Kepauka memeutahaxɨa Mikahiyaxi kiita memuyu'auxɨwi, kakaɨyari mɨxixiya pɨratakɨ mɨwetsitɨarie memɨwayekwei meta mawari wewiwame kamixaya 'etsimɨnena meta hipame kakaɨyarixi, mawari wewiwame mɨpaɨ katiniwaruta'iwawiya:

―¿Kexeteyurie?

19 Mɨkɨ mɨpaɨ mekaniutiyuani:

―Kayuwatɨ. 'Atsipepɨkahaineni. Kɨmɨ ketananuweiya, ta'ukiyari tamawari wewiwame pepayani. Matsi 'aixɨa pɨyɨni xeinuiwari 'Ixaheri hetsiemiemete wamawari wewiwame pemɨhɨkɨtɨni, keyuri xeime tɨɨriyamama wahetsiemieme xeikɨa.

20 Mawari wewiwame kaniuyukatemawieni. Katinepini mawari wewiwame kamixaya 'etsimɨnena meta hipame kakaɨyarixi meta mɨxixiya pɨratakɨ mɨwetsitɨarie, hikɨ wahamatɨa kaneyani. 21 Mɨkɨ yuniwema yutewama yupiinite metewara'arietɨ mekanekɨne mewaranuhaitɨiyatɨ.

22 'Ateewa paitɨri me'uhukaku Mikahiyaxi kie meyekɨneka, Mikahiyaxi 'aurie memɨtitekai mekaniuyukuxeɨrieni Rani xiɨyarimama mekaniwaranukuweiya. 23 Wa'utɨa meheuhiwaxɨaximekaku, Rani xiɨyarimama yu'utɨa mekananakuneniere Mikahiyaxi mɨpaɨ mekateniuta'iwawiya:

―¿Kekuta titayari 'ateɨterima petiwara'inie?

24 Mikahiyaxi mɨpaɨ kaniutayɨni:

―Xeme nekakaɨyarixi xepɨwarenawa, ne nemɨwarutiwewi, meta nemawari wewiwame xepewitɨ mɨya xeteheyurieka xepeyekɨ. Tixaɨtɨ xepɨkanete'uhayewi. 'Akuxi xeneteha'iwawiya panatsi xekatemate.

25 Rani xiɨyarimama mɨpaɨ mekaniutiyuani:

―Kwinimieme pepɨkatatiuhiwiwani, tietɨtsɨ hipatɨ memɨniuyeha'a ta'iwama memɨxeniutakwi, 'ekɨ meta 'atɨɨriyama memɨniwarukwi.

26 Mɨpaɨ me'utiyuaka Rani xiɨyarimama mekanekɨne. Mikahiyaxi waxeiyatɨ kwinimieme memɨtetɨrɨkawikaikɨ mana kaniyenuani yukie kaneyani. 27 Mɨpaɨ mekateniuyupinitɨani Rani xiɨyarimama Mikahiyaxi mɨtiutiwewiekai meta mawari wewiwameya, mekanekɨne Rahitsi, kiekari kayuwatɨ hexeiyakame mekayukweriwayurietɨ, mana kiekatari 'ixiparakɨ mekaniwarukwini, wakiekari mekaniutataiya. 28 Nixewitɨ pɨkawaruparewi, Tsiruni 'ateewa paitɨ pɨti'anekai, mɨkɨ xeime hamatɨa mepɨkayuxewiriyakai. Mɨkɨ kiekari hayewerikaku pɨyemakai, Weti-Xekuwi kiekariyaritsie mepɨte'awiyakai.

'Arike mɨkɨ Rani xiɨyarimama kiekari 'aixɨa mekaniukuyurieni mana mekanitiyaxe. 29 Rani meteniterɨwa yututsi mema'eriwanikɨ kemɨtitewakai, 'Ixaheri nu'aya mɨhɨkɨtɨkai, tsepa meripaitɨ mɨkɨ kiekari Rahitsi mɨtitewakai. 30 Mana mekanitakeni kakaɨyari mɨxixiya pɨratakɨ mɨwetsitɨarie memeyexeiyanikɨ, mɨkɨ Kunatani, Keritsuni nu'aya Muitsexi teukarieya meta niwemama mawari wewiwamete mekanakɨne Rani xiɨyarimama wahetsiemieme kepaukake memehapanie. 31 Rani xiɨyarimama Mikahiyaxi kakaɨyarieya mɨxixiya pɨratakɨ mɨwetsitɨarie mekanayexeiyakaitɨni yuheyemekɨ, Kakaɨyari tukieya Tsiru mɨrakutewatsie 'uwekakutɨtɨ.

<- 'Itsɨkate 17'Itsɨkate 19 ->