1 Muhɨriyatsie 'Epɨrahini kwieyaritsie xewitɨ kaniuyeikakaitɨni, Mikahiyaxi titewatɨ, 2 mɨkɨ yumaama mɨpaɨ katiniutahɨawe:

―Xeimiriyari heimana xeitsienituyari (1.100) pɨrata tuminiyari pemunawatsiyarie meta mɨkɨ tuminikɨ 'axa'aneme pemɨyetua niuki, ne mɨkɨ pɨrata nepexeiya, ne nematsi'unawatsiri.

Maamaya mɨpaɨ katinitahɨawe:

―Yawé 'aixɨa kematsiyurieka, neniwe.

3 Kepauka Mikahiyaxi yumaama tumini mu'ɨitɨa xeimiriyari heimana xeitsienituyari pɨrata tuminiyari, maamaya mɨpaɨ katinitahɨawe:

―Yemekɨ waɨkawa patsiekame nepayeitɨani nepɨrata Yawé hetsie, neniwe xeime kakaɨyari mɨtawewienikɨ xixiyakame pɨratakɨ wetsitɨariekame. Hikɨ 'ayumieme nepɨmatsi'ɨitɨani.

4 Kepauka mɨkɨ yumaama mu'ɨitɨa, mɨkɨta huta tsienituyari pɨrata tuminiyari nanaka'ɨni, xeime kaniu'ɨitɨani pɨrata tsuname, mɨkɨ kɨmana kakaɨyari xixiyakame kaniutawewieni pɨratakɨ meta kwaxiyariekame, mɨkɨ Mikahiyaxi kiita kaneutakerieni.

5 Mɨkɨ Mikahiyaxi yutuki kanexeiyakaitɨni. Mɨkɨ mawari wewiwame kamixaya 'etsimɨnena heriemieme kaniutawewieni meta hipame kakaɨyarixi, xeime yuniwe patsiekame kanayeitɨani mawari wewiwame mɨhɨkɨtɨnikɨ. 6 'Ana 'ixaheritsixi ti'aitame mepɨkahexeiyakai, yuxexuitɨ kemɨtiwanake xeikɨa mekateniyuriekaitɨni.

7 Xewitɨ temaikɨ rewi tewiyari Wereni Kura kwieyaritsie kiekame, Kura xiɨyarimama watsata kaniuyeikakaitɨni, 8 Wereni kiekaritsie kaniyeyani 'ikuwaunetɨ hekwamekɨ hakewa mekanikɨ. Huyeta 'umietɨ Mikahiyaxi kie kaniye'ani hɨritsie 'Epɨrahini kwieyaritsie.

9 Mikahiyaxi mɨpaɨ katinita'iwawiya:

―Hakewa pepeyetɨa.

Mɨkɨ mɨpaɨ kaniutayɨni:

―Ne rewi tewiyari nekanihɨkɨtɨni, Wereni kiekame, Kura kwieyaritsie, 'uximayatsika nepukuwaune hawaikɨ nemekanikɨ.

10 Mikahiyaxi mɨpaɨ katinitahɨawe:

―Nekie keneukani, nepaapa kenehɨkɨtɨni nemawari wewiwame kenehɨkɨtɨni, ne nematsikɨ'ɨitɨwani tamamata pɨrata tuminiyari xeiwiyaritsie meta 'akemari 'a'ikwai.

11 Temaikɨ rewi tewiyari kaniuyuwaɨriya kiena mukanikɨ, Mikahiyaxi yuniwe hepaɨ katinimaikaitɨni. 12 Hikɨ Mikahiyaxi, rewi tewiyari kaniutikemaritɨani, mɨpaɨ mɨkɨ mawari wewiwameya kanayani, kiena 'ukaitɨ. 13 Mikahiyaxi mɨpaɨ kaniutayɨni: «Hikɨ mɨpaɨ nepɨtimate Yawé waɨkawa pɨnetsiparewieni, rewi tewiyari nemawari wewiwame nemayeitɨakɨ».

<- 'Itsɨkate 16'Itsɨkate 18 ->