2 Te'aitamete 20

'Etsekiyaxi kemɨtiutakwinixɨ

(2Te 20:1-11 – 2Kem 32:24-26, Kits 38:1-8)

1 Merikɨtsɨ 'anatɨtɨ mɨtiyehane 'Etsekiyaxi katiniutakwine waɨkawamekɨ kaniumɨnitɨma. Kakaɨyari niukameya Kitsariyaxi 'Amuxi nu'aya hetsɨana kaninuani mɨpaɨ katinitahɨawe: «Yawé mɨpaɨ kanaineni: “'Atɨɨriyama wahepaɨtsita 'ari 'aixɨa ketineuyuri, karikɨ pekanimɨmɨkɨ, hawaikɨ 'aixɨa pepɨkatika'erieni”».

2 'Etsekiyaxi ta'aurie 'aweka 'ixumeri hepa heutanieretɨ, Yawé mɨpaɨ katiniutawawirieni: 3 «Yawé, kenena'eriwani ne yanepɨtikamiekai 'aixɨa 'anemekɨ 'ahepaɨtsita, meta ne'iyarikɨ 'aixɨa netiyukɨhɨawetɨ, meta yanepɨtiuyuri kemɨmatinake». Hikɨ 'ana 'Etsekiyaxi kaniutitsuani waɨkawa yuhiwerietɨ.

4 Hikɨ Kitsariyaxi 'iku'eirieka paratsiyu takwayaritsie ka'uyenewekaku, Yawé niukieya kanitaxeiya: 5 «Keneukunuaka 'Etsekiyaxi mɨpaɨ ketinetahɨawi, neteɨterima mɨtiwa'aitɨwame, ne Yawé kenemaine, 'ukiyarieya Rawiri Kakaɨyarieya: “Nepi'eni 'anenewieri meta nepixei 'a'ukai. 'Aixɨa pereu'eriekame nepɨmatsi'ayeitɨani kepemɨtikuye, hikɨ haika tukari 'aye'ayu pepɨyɨweni Kakaɨyari tukieyata pemɨmiekɨ. 6 'Akuxi tamamata heimana 'auxɨwime wiyari nekamanipitɨamɨkɨ. 'Ekɨri meta 'ikɨ kiekari nekanixetawikweitsitɨamɨkɨ 'Atsiriyutsie ti'aitame mɨkaxeka'unakɨ. Ne 'ikɨ kiekari hetsie nekanitanuamɨkɨ nehetsiemieme, meta Rawiri neti'uximayatsiriwame hetsiemieme neminaki'eriekɨ”».

7 Hikɨ Kitsariyaxi mɨpaɨ kaniutayɨni: «Xapa 'ikwaxiyari mɨtɨxiyari xekeneuhawiya». Mɨpaɨ mekateniuyurieni, hikɨ 'ana ti'aitame haiyayatsie mekaneiwirieni, 'ana 'aixɨa katiniuka'erieni.

8 'Etsekiyaxi mɨpaɨ Kakaɨyari niukameya katiniutahɨawekaitɨni:

—¿Ketita 'inɨari netixeiya mɨpaɨ nemɨretimanikɨ kename Yawé 'aixɨa netsiyurieni, meta kename neyɨweni haika tukari 'anukayayu tukita nemɨmiekɨ?

9 Kitsariyaxi mɨpaɨ katinita'eiya:

—'Ikɨ kanihɨkɨtɨni 'inɨari Yawé mɨmatsiyetuirie, yapemɨretimanikɨ kename yuri 'utaine: ¿Tau 'etɨriyaya hura 'inɨnɨatame tamamata mexɨa tiyeyani, nutsu kepera'eriwa puwakayani pɨta tamamata mexɨa?

10 'Etsekiyaxi mɨpaɨ katinitahɨawe:

—Pɨkakwaniwe xɨka 'etɨri yeyani, peru pukwaniwe yu'utɨma muwakayani.

11 Merikɨte Kakaɨyari niukameya Kitsariyaxi Yawé kaniutahɨawe, hikɨ Yawé yakatiniuyurieni tamamata mexɨa kaniwakayani tau 'etɨriyari 'Akatsi tau hurayari 'inɨnɨatameyatsie.

Nɨ'ariekate wawiruniyatari

(2Te 20:12-21 – Kits 39:1-8, 2Kem 32:32-33)

12 Mɨkɨ tukaritsie Meruraki-Wararani Wararani nu'aya, ti'aitame Wawiruniya kwieyaritsie, 'Etsekiyaxi xapa kanenɨ'airieni meta 'imikierite, mɨretimaikaikɨ kename rekuyekai. 13 'Etsekiyaxi waɨkawa niyutemawiekaitɨni mɨkɨ 'imikierite ranupika, hikɨ mɨkɨ nɨ'ariekate tinaime katiniwaruxeitsitɨani tita mɨrexeiyakai mɨraye'atɨka: Pɨrata, huru meta witsimɨtiu'ɨatɨka, hatseiti 'aixɨa mɨ'ane, meta naime piinite kuyaxa timieme. Tinaime katiniwaruxeitsitɨani paratsiyuta timieme, nitixaɨtɨ pɨkatiuhayewaxɨ.

14 Hikɨ Kitsariyaxi Kakaɨyari niukameya kaneyani ti'aitame 'Etsekiyaxi hetsɨa, mɨpaɨ katinita'iwawiya:

—¿Ketita meteheuyehɨakai mɨkɨ teɨteri? ¿Hakewa mepeyekɨ?

Mɨpaɨ katinita'eiya 'Etsekiyaxi:

—'Ateewa paitɨ mepeyekɨ, Wawiruniya paitɨ mepeyekɨ mepɨnetsikuxeiyatɨwekai.

15 Kakaɨyari niukameya mɨpaɨ katinita'iwawiya:

—¿Ketita 'aparatsiyuta mete'uxei?

'Etsekiyaxi mɨpaɨ katinita'eiya:

—Naime nekatiniwaruxeitsitɨani ketipaɨmetɨ muwa mɨtiyepine. Tixaɨtɨ pɨkatiyuhayewaxɨ nepiinite mɨraye'atɨka nemɨkatiwaruxeitsitɨa naitɨ katiniuxeiyarieni.

16 Hikɨ Kitsariyaxi mɨpaɨ katinitahɨawe:

—Keneu'eni Yawé niukieya: 17 'Uxa'atɨni warie tukari kanaye'amɨkɨ mɨkɨ naitɨ 'aparatsiyuta timieme mɨranɨtɨkieni, meta naitɨ ketita meripaitɨ 'a'ukiyarima memɨte'uti'utakai, naitɨ mɨkɨ katinanɨtɨkiemɨkɨ Wawiruniya paitɨ. Nitixaɨtɨ pɨkatiyuhayewa, Yawé mɨpaɨ kanaineni. 18 Hipatɨ 'aniwema meta 'anuiwarima mekananuhapaniekuni memɨteheta'uximayatakɨ Wawiruniya kwieyaritsie ti'aitame paratsiyuyata mɨkɨ mepɨkahepitɨarieni tɨɨri memuwarayexexeiyanikɨ.

19 'Etsekiyaxi mɨpaɨ katinita'eiya:

—Yawé niukieya 'ekɨ pemɨnetsi'atɨiri 'aixɨa kananuyɨneni.

Mɨpaɨ putayɨ mɨpaɨ tiku'eriwatɨ: «Mexi ne ne'uyeika, 'aixɨa 'iyari tepu'uwani teka'uximatɨarietɨ».

20 Hipatɨta kemɨtiuyɨ 'Etsekiyaxi ti'aitakaku, meta kemɨtitɨrɨkaɨyekai metatsiere kemɨtitawewi haa mukamarike 'amupa meta haa huyeyari kiekaritsie meutayune kemɨtiutawewi, mɨkɨ naitɨ katinaka'uka kemɨtiuyɨ xapayaritsie Kura kwieyaritsie te'aitamete waxapatsie. 21 'Etsekiyaxi kaniumɨni, nu'aya Manatsexi titewatɨ kanitsutɨani ti'aitatɨ hetsiena mieme.

<- 2 Te'aitamete 19 2 Te'aitamete 21 ->