2 Te'aitamete 19

Kitsariyaxi kemɨtiutahekɨataxɨ Kerutsareme kemɨtixɨnarienikekai

(2Te 19:1-13 – Kits 37:1-13)

1 Merikɨtsɨ kepauka ti'aitame 'Etsekiyaxi mɨtiutamari, yukamixa witsimɨ'ane kaneukatsana, hiwerika kamixayari kananakatɨni meta kaneyani Yawé tukita. 2 Metatsiere, kaniwarutanɨ'ani 'Eriyakini paratsiyuta mɨtihɨritɨarie, meta kemɨtiuyɨ ti'utɨwame Tsewina, metatsiere mawari wewiwamete waɨkawa memɨ'ukirawetsixi, yunaitɨ mɨkɨ hiwerika kamixayari mepanakatɨtɨkatei, kaniwarutanɨ'ani memɨtehetixatakɨ Kakaɨyari niukameya Kitsariyaxi 'Amuxi nu'aya matɨa. 3 Mɨpaɨ mekatenitahɨawe: «Mɨpaɨ kanaineni 'Etsekiyaxi: “Hikɨ hiwerika tukariyari pɨhɨkɨ meta 'uximatɨarika meta nanaimarika, kepauka tɨɨri memɨtinunuiwarɨme hepaɨ meta wamama muti'uxixɨ mɨkayɨwe hepaɨ. 4 Heiwatɨ Yawé 'akakaɨyari 'i'enieni naime kuyaxi tiwa'aitɨwame kemutayɨ, mɨkɨ ti'aitɨwameya, 'Atsiriyatsie ti'aitame meiyenɨ'a, Kakaɨyari mayeyuri 'axamɨtitahɨawekɨ. Yawé 'akakaɨyari 'uximatɨarika ke'ipitɨani mi'enikɨ kemutayɨ. Kamɨtsɨ, nenewieri keneupitɨa tahetsiemieme teɨteri 'akuxi temɨtahayewatɨwe”».

5 Kepauka ti'aitame 'Etsekiyaxi parewiwametemama Kitsariyaxi hetsɨa memanukɨ, 6 mɨkɨ mɨpaɨ katiniwarutahɨawe: «Tixe'aitɨwame mɨpaɨ xeketenetahɨawi kename mɨpaɨ haine Yawé: “Pepɨkaheumaka 'axaniuki pemu'enikɨ, meta nehepaɨtsita miemekɨ kememutiyua 'Atsiriyatsie ti'aitame parewiwametemama. 7 Neuxei. Ne xeime 'iyari hetsiena nepɨkayeni, hikɨ mɨkɨ yɨkɨ timarieme kaniyemieni yukwieyaritsie paitɨ. Mana paitɨ yanepɨtiyurieni mɨmierienikɨ 'ixiparakɨ”».

8 Kepauka kuyaxi tiwa'aitɨwame mɨpaɨ mɨretima kename 'Atsiriyatsie ti'aitame hayeyakai Rakixi mɨrakutewatsie, Hikɨ kaneyani kaneitaxeiya Riwina kiekatari warekwineme.

9 Hikɨta Tsenakeriwi tiniutaxatɨarieni kename Tiraka, Kutsi kwieyaritsie ti'aitame, hayeyakai 'itamienike, hikɨ 'ayumieme tawarita niuki kanenɨ'ani 'Etsekiyaxi hetsɨa, 10 mɨpaɨ mɨtitahɨawarienikɨ: «'Ekɨ, 'Etsekiyaxi, Kura kwieyaritsie ti'aitame: Hawaikɨ pepɨka'ipitɨaka 'akakaɨyari, hetsiena pemɨtiwiya, matiku'itaiyani mɨpaɨ 'utaitɨ: “Hawaikɨ, 'Atsiriya kwieyaritsie ti'aitame, Kerutsareme kiekariyaritsie pɨkaheutahani”. 11 'Ekɨri pekatinimaika kememɨte'uyuri 'Atsiriyatsie te'aitamete naitsarie kwieyaritetsie, mepɨwaruka'unaxɨ naime. ¿Kamɨtsɨ 'ekɨ mɨpaɨ petiku'eriwa kename petawikweni? 12 ¿Kamɨtsɨ ne'ukiyarima memɨwaruka'unaxɨ kiekarite: Kutsani, Karani, Xetsepi meta teɨteri 'Ereni kiekatari Teratsaxi memɨtamakai, wakakaɨyarixi wahetsie mete'utanua? 13 Hawaikɨ mepɨkatehenakixɨ Kamati kwieyaritsie ti'aitame meta 'Axipari kwieyaritsie ti'aitame, Tsepariwahini kiekariyaritsie ti'aitame meta Henaha yatɨni 'Iwaha».

'Etsekiyaxi kemɨtiuyutanenewi

(2Te 19:14-19 – Kits 37:14-20)

14 'Etsekiyaxi xapa kananuhurieni nɨ'ariekate wamamatsie, hikɨ kanekaterɨwa. Kwitɨta kaneyani Yawé tukita, muwa xapa kaniutawera Yawé hɨxie, 15 hikɨ hɨxiena mɨpaɨ katiniuyunenewieni: «Yawé, 'Ixaheri Kakaɨyarieya, matsiteɨtamete memu'ana wahixɨata 'a'uwenitsie pemaka: 'ekɨ xeikɨa naitsarie kwiepa te'aitamete wakakaɨyari pekanihɨkɨtɨni. 'Ekɨ pekaninetɨani muyuawi meta kwie. 16 Yawé, kenakatutsiri meta keneu'ena, kenanutanieri, Yawé, meta keneutanierixɨa, keneu'eni niuki Tsenakeriwi meiyenɨ'a, 'axamɨmatitahɨawekɨ Kakaɨyari pemayeyuri.

17 »Yawé, kaniyuritɨni te'aitamete 'atsiriyutsixi 'ikɨ nuiwarite yunaime mekaniwarakumaweriya meta wakwie. 18 Wakakaɨyarixi taipa mekaniwareuxɨrieni, mekaniwareuyehɨani, mɨkɨ kakaɨyarixi memɨkahɨkɨtɨkaikɨ matsi kɨyexi meta tetexi memɨhɨkɨtɨkaikɨ, tewi mamaya wewiyaya xeikɨa. 19 Yawé takakaɨyari, hikɨri ximɨxi, ketaneutawikweitsitɨa mɨkatatsika'unakɨ, hikɨ yunaitɨ te'aitamete kwiepa memɨtama mɨpaɨ memɨtehetimanikɨ kename 'ekɨ xeikɨa, Yawé, Kakaɨyari pehɨkɨ».

Tsenakeriwi kemɨtiumɨ

(2Te 19:20-37 – Kits 37:21-38, 2Kem 32:20-21)

20 Hikɨ Kitsariyaxi 'Amuxi nu'aya 'ikɨ niuki 'Etsekiyaxi kanenɨ'airieni: «Mɨpaɨ kanaineni Yawé, 'Ixaheri Kakaɨyarieya: “Waɨkawa kepemɨnetiutawawiri Tsenakeriwi, 'Atsiriyatsie ti'aitame hepaɨtsita, nekamaniu'enieni. 21 'Ikɨ niuki kanihɨkɨtɨni ne, Yawé, kenemutayɨ hepaɨtsitana:

»”Tsiyuni kiekariyari, 'uka 'ɨimari hepaɨ,

pumatsi'atse matsinanaimatɨ, Tsenakeriwi 'aku.

Kerutsareme yumu'u puyuitɨwa

matsixeiyatɨ pemɨ'ata'unaxɨkɨ.

22 ¿Kemɨ'ane peputati?

¿Kemɨ'ane hepaɨtsita 'axapeputayɨ?

¿Kemɨ'ane pepanutahiwiexɨa,

meta kemɨ'ane peyuta'ɨretɨ kwi pepanutixei?

'Iya Mɨpatsie 'ixaheritsixi wahetsiemieme pekaniuyurieni.

23 'Ekɨ pekaniwareyenɨ'ani 'anɨ'arima

Yawé 'axamemɨtetahɨawekɨ, mɨpaɨ me'utiyuatɨ:

‘Nekaxetate kuyaxa miemete memɨyumɨirekɨ

hɨri 'amanutitɨtɨtsie paitɨ nekananutiyani,

Riwanu hɨriyaritsie paitɨ.

Kariuxa 'amutɨtɨ mana mieme nekaniuxɨrieni,

meta huku yemekɨ 'aixɨa mɨ'anene.

Teewa paitɨ nepuyene mɨka'uyeiyaxietsie,

meta hakewa 'ɨtsi mewawemetɨkai.

24 Haputsu neputiwewi hipame wakwieyaritsie,

hikɨ mɨkɨ haa ne'anuhareka nekaheuharimɨtɨ nepatɨa.

Neketatekɨ naime haa 'Ekipitu mieme

nepukawatsiɨxaxɨa’.

25 »”¿Kari 'atsipepɨkatimate?

Mɨixa wiyari kananuyemieni mɨkɨ nemɨtiukuha'aritɨa.

Meripaitɨtɨ ne mɨpaɨ nekaniutayɨni,

hikɨri 'ayumieme nekaneye'atɨani.

'Ayumieme 'ekɨ pekaniwaruka'una mɨkɨ

kiekarite yukuraru memexeiyatɨkatei 'a'atitetewame.

26 'Ayumieme kiekatari mekatɨrɨkawitɨ mekanakɨkani,

me'iyɨrietɨ meta meyutetewiyatɨ.

Tupiriyate yeuta mieme hepaɨ mekani'aneneni,

'ɨxa mɨyɨyɨri hepaɨ,

tupiriya kii heima mɨtineika hepaɨ

mɨtiwauke katiwaweriwawetɨ.

27 »”Ne nepɨtimate kepauka pemanukayeixa,

kepauka pemɨwayeyeika, kepauka pemeutahake,

meta kepauka pemuyeha'arɨwe nehepaɨtsita.

28 Pemuyeha'akɨ nehepaɨtsita,

meta 'axakepemutayɨ nemɨmatsi'u'enikɨ,

ne kwatsiturai 'atsuritsie nekaniuyekemɨkɨ

meta nekameniutapirenutɨamɨkɨ,

meta kemɨ'ane huye 'utɨa pemunua,

yanepɨtiyurieni mɨkɨ 'utɨata pemakunuanikɨ.

29 »”'Ikɨ 'inɨari kanihɨkɨtɨni 'ekɨ, 'Etsekiyaxi, 'ahetsiemieme:

»”'Ikɨ wiyaritsie yukɨmana mɨtitixuawere xekatenitikwaikuni,

hutarieka wiyaritsieta mana mɨtitineni xepɨtetikwani.

Peru hairieka wiyaritsie xepɨka'eni meta xepɨka'itsana,

kaxie xepɨka'eni meta takariyari mepɨtikwani.

30 Tawari Kura nuiwarimama memɨyuhayewaxɨ memɨka'ukwi

tetɨata mepɨtekawiyaxɨani meta wapaitɨ 'ikwaxi mepɨtixuaweriya.

31 Karikɨ hipatɨ Kerutsareme kiekatari menitawikweikuni,

Tsiyuni yemuriyari hetsie kiekatari yunaitɨ mepɨkakwini hakakɨ.

Mɨpaɨ pɨtiyɨni waɨkawa nemɨwanaki'eriekɨ,

ne Yawé Naimekɨnemɨtɨrɨkaɨye.

32 »”Ne, Yawé, yurikɨ mɨpaɨ nekanaineni 'Atsiriyatsie ti'aitame hetsiemieme:

»”Hawaikɨ 'ikɨ kiekariyaritsie pɨkahatahani,

meta nixeime 'ɨrɨkɨ pɨkatamɨnitɨma.

Pɨka'itamieni 'ikɨ kiekari meta memuyukunarɨma 'a'ɨtɨ pɨkawayani,

pɨkatatetsatɨma kiekari kuraruyari heima makatsunakɨ.

33 Matsi yu'utɨma kanakunuamɨkɨ kemɨ'ane huyeyari 'utɨa munua.

Peru 'ikɨ kiekariyaritsie pɨkahatahani.

Ne, Yawé, mɨpaɨ nekanaineni.

34 Nehetsiemieme, meta neti'uximayatsiriwame Rawiri nemɨnaki'eriekɨ,

'ikɨ kiekari hetsie nekanitanuamɨkɨ meta nekanitawikweitsitɨamɨkɨ”».

35 Kwitɨwa mɨkɨ tɨkaritsie Yawé niukieya tuayameya kanayeyani, hikɨ kaniwarukwini xeitsienituyari heimana nauka tewiyari heimana 'auxɨwi miriyari (185.000) kuyaxi 'atsiriyutsixi. 'Uxa'arieka ximeri kepauka wa'iwama memanuku'ui, mana yunaitɨ mɨkɨ mekwikwi'itɨ mekanitiheteitɨni. 36 Hikɨ 'ana Tsenakeriwi 'Atsiriyatsie ti'aitame, hakewa memetitekai kananukukeni meta kaneyani. Hikɨ Niniwe yukiekaritsie kaninuani, mana kaniyuhayewa. 37 Peru xeime tukaritsie, mexi yunenewiekai titunumawetɨ yukakaɨyari Nitsiruki tukita, 'ana niwemama 'Aruramereki meta Tsaretsexi matɨa mekanimieni 'ixiparakɨ, hikɨ me'imieka mekaniyuta'una 'Ararati kwieyaritsie paitɨ. Hikɨ hetsiena mieme nu'ayatɨtɨta 'Etsaxikaruni titewatɨ kanitsutɨani ti'aitatɨ.

<- 2 Te'aitamete 18 2 Te'aitamete 20 ->