1 Yaatin, nuuni woyganee? Xoossaa aadho keehatethay darana mela nagaran minnidi de7ino? 2 Akay, nuuni nagaras hayqidaba gidiko, yaatin, nuuni hizape waanidi nagaran daanee? 3 Nu ubbay Kiristoos Yesuusara issifanaw xammaqetida wode iya hayquwan iyara issifanaw xammaqetidaysa ereketiyee? 4 Nu xammaqetida wode Kiristoosara hayqidanne moogetida. Kiristoosi Xoossaa Aawa boncho wolqan hayqope dendidaysa mela nuka ooratha de7on daana.[a]

5 Nu iya hayquwan iyara issino gidiko, hessadaka, iya denduwan iyara issino gidana. 6 Nu hizape nagaras aylle gidonna melanne nu nagarancho asatethaa wolqay dhayana mela nu cima asatethay Kiristoosara kaqetidaysa eroos. 7 Issi asi Kiristoosan hayqidaba gidiko, I nagara wolqafe la77a keyis. 8 Nuuni Kiristoosara hayqiko, iyara de7on daanaysa ammanoos. 9 Kiristoosi hayqope dendida gisho, zaari I hayqonaysanne hayqoy sinthafe iya haaronnaysa nu eroos. 10 I hayqida wode nagaras issitoho wursethi gakanaw hayqis, shin ha77i de7on Xoossaas de7ees. 11 Hessadaka, hinte nagaras hayqidi, Godaa Kiristoos Yesuusa baggara Xoossas de7on de7eysa qopite.

12 Hessa gisho, hinte, hinte asatethaa amuwas kiitetonna mela hayqiya hinte asatethaa nagari haaropo. 13 Qassi hinte asatethaa nagara oothanaw geellatetha miishe oothidi immofite. Shin hinte hayqope dendidi, de7on de7iya asada hinte asatethaa Xoossaas immite. Qassi hinte kumetha asatethaa xillo ooso oothanaw Xoossaas aathidi immite. 14 Hinte Xoossaa aadho keehatetha garsan de7eetape attishin, higgefe garsan de7onna gisho nagari hintena haaranaw bessenna.

15 Yaatin, nu woyganee? Higgefe garsan gidonashin, Xoossaa aadho keehatetha garsan de7iya gisho nagara oothaneyee? Akay! 16 Hinte issi asas kiitetanaw hintena aylle oothidi immiya wode he hinte kiiteteysas aylle gideysa ereeta. Hessadaka, hinte nagaras kiitetiko, hintew hayqo ehiya nagaraas aylle gideeta. Woyko hinte Xoossas kiitetiko xillotethi ehiya Xoossaas aylle gideeta. 17 Kase hinte nagaras aylle, shin ha77i hinte ekida tuma timirtiyas kumetha wozanape kiitetida gisho Xoossaas galati gido. 18 Hinte nagara aylletetha qashope biletidi xillotetha aylle gidideta.

19 Hinte hinte qofan daaburancho gidiya gisho, taani oodeska geliya ogen odayis. Kase hinte, hinte asatethaa tunanne iitabaa oothanaw aylle oothidi immidaysa mela ha77i hinte asatethaa geeshshi gidana mela xillotetha aylle oothidi immite.

20 Hinte nagaras aylletidi de7iya wode xillotethas haareteketa. 21 Hintena ha77i yeellayiya beni hinte iita oosuwape ay maade demmidetii? He oosota wursethay hayqo. 22 Shin hinte nagara aylletetha qashope biletidi, Xoossaas aylle gidideta. Hessi hintena geeshshi oothidi merinaa de7uwako kaalethees. 23 Nagara gatey hayqo. Shin Xoossay, nu Godaa Kiristoos Yesuusa baggara immiya imotay merinaa de7o.

<- Roome Kiita 5Roome Kiita 7 ->