1 Hiza, nu ammanon xillida gisho, nu Godaa Yesuus Kiristoosa baggara Xoossara nuus sarotethi de7ees. 2 Nuuni iya baggara ha77i nu eqida aadho keehatetha giddo ammanon gelida. Hessa gisho, nu Xoossaa bonchuwa shaaketanaw de7iya ufaysan ceeqetoos.

3 Hessa xalaala gidonashin, metoy danda7a eheysa nu eriya gisho, nu metuwanka ceeqetoos. 4 Qassi danda7ay genca, gencay ufaysi immeysa nu eroos. 5 Nuus immida Geeshsha Ayyaana baggara Xoossay ba siiquwa nu wozanan gussida gisho he ufaysay nuna yeellayenna.

6 Nuuni buroo daaburanchota gididi de7ishin, Xoossaa wodey gakin, Kiristoosi nagaranchota gisho hayqis. 7 Xillo asa gisho hayqana asi demmanaysi daro meto, shin keeha asa gisho hayqana asi ooni eri bentonna aggenna. 8 Shin nuuni buroo nagarancho gididi de7ishin, Kiristoosi nu gisho hayqis. Hessi Xoossay nuna ay mela siiqiyako iya siiquwa bessees. 9 Hiza, nuuni Kiristoosa suuthan xillidaba gidiko, ubbaafe aathidi iya baggara Xoossaa hanquwafe attana. 10 Nuuni Xoossara kase morke, shin iya Na7aa hayquwan iyara sigetida. Hessafe aathidi, ha77i nuuni Xoossara sigetidaape guye, iya na7aa de7uwa gaason nuuni attana. 11 Hessa xalaala gidonashin, ha77i nuna Xoossara sigethida nu Godaa Yesuus Kiristoosa baggara nu Xoossan ceeqetoos.

12 Addaame baggara nagari ha alamiya gelis. He nagaraa baggara hayqoy yis. Asi ubbay nagara oothida gisho hayqoy asa zare ubbaa gakis.[a] 13 Higgey imetanaape sinthe alamen nagari de7ees, shin higgey bayna wode nagari nagara gididi taybetenna. 14 Shin Addaamepe Muse gakanaw hayqoy asa ubbaa haaris. Hari attoshin, Addaameda higges kiitetonna ixidi, nagara oothiboonayisata bollaka hayqoy kawotis.

Addaamey yaana Yesuusas leemiso. 15 Shin Xoossaa aadho keehatethay Addaame nagaraa mela gidenna. Issi asa nagara baggara daro asay hayqis. Shin Yesuus Kiristoosa baggara Xoossaa aadho keehatethay asa ubbaas daridi imetis. 16 Addaame nagaraa giddoninne Xoossaa imota giddon daro dummatethi de7ees. Issi asa nagara gaason Xoossay iya bolla pirdis. Shin asay daro nagara oothinka Xoossaa aadho keehatethay xillotethaa ehis. 17 Issi asa nagara gaason hayqoy asa ubbaa bolla kawotis. Shin Yesuus Kiristoosa baggara Xoossaa aadho keehatethaanne xillotetha imota ekiya ubbay, xoono de7on de7oosona.

18 Hiza, issi asi nagara oothida gaason asa ubbaa bolla pirdi yidaysada issi asi xillo oothida gaason, Xoossay ase ubbaa xillisidi entaw de7o immees. 19 Issi asi kiitetonna ixida gaason, daro asay nagarancho gididaysada issi asa kiitetethan daro asay xillana.

20 Asay nagara wolqaa erana mela higgey yis, shin nagara wolqay darida wode Xoossaa aadho keehatethay aadhidi daris. 21 Nagari hayqo wolqan kawotidaysa mela Xoossa aadho keehatethay xillotethaa wolqan kawotidi, nu Godaa Yesuus Kiristoosa baggara nuna merinaa de7uwako kaalethees.

<- Roome Kiita 4Roome Kiita 6 ->