Link to home pageLanguagesLink to all Bible versions on this site
3
Ayhudeta Ammano Ixo
1 Yaatin, Ayhude giddon ay dummatethi de7ii? Woyko qaxaretethan ay maadey de7ii? 2 Tumaka Ayhude gidoy daro ogera maaddees. Ubbaafe sinthe Xoossay ba qaala hadara Ayhudetas immis.

3 Yaatin, entafe issoti issoti qaala ammanonna ixiko, enta ixoy Xoossaa ammanetetha diggiyee? 4 Diggenna! Asa ubbay wordancho gidikoka Xoossay tuma gido. Geeshsha Maxaafan,

“Ne qaalan ne xillaasa;
nena mooteysa pirdan lathaasa”
geetetidi xaafetis.[a]

5 Yaatin, nu nagaray Xoossay xillo gideysa bessiyaba gidiko, nu woyganee? Xoossay nu nagaraa gisho, nu bolla pirdiko, like gidenneyee? Haysa taani asa qofatho gayis. 6 Hessi ubbaraka hanenna. Hessada haniko, Xoossay ha alamiya bolla waati pirdanee?

7 Shin ta wordotethay Xoossa tumaa qoncisidi, iya bonchuwa darsi bessiyaba gidiko, yaatin, ayis ta bolla nagaranchoda pirdeetii? 8 Issi issi asay, “Lo77oy yaana mela iita oothoos” yaagidi tamaarsiyada oothidi tana mootosona. Hessa mela asaa bolla yaa Xoossaa pirday like.

Asi Ubbay Nagarancho
9 Yaatin, nuuni woyganee? Nu Ayhudeti, Ayhude gidonaysatape aadhonayee? Gidenna! Ayhude gidin, Ayhude gidonna ixin ubbay nagarancho gideysa taani kasetada hintew odas.

10 Geeshsha Maxaafan,

“Xillo asi issoyka baawa.[b]
11 Akeekiya asi baawa,
Xoossaa koyiya oonika baawa.
12 Asa ubbay Xoossaas zoko zaaridosona;
ubbay issife pathonnaba gididosona.
Lo77o oothiya oonika baawa;
issi asika baawa.
13 Enta doonape keyiya qaalay,
dooyetida duufope keyiya xinqo mela;
banta inxarsan cimmoosona.
Enta doonape ase wodhiya,
shoosha marzey keyees.[c]
14 Enta doonan camo odaynne baadethi kumis.[d]
15 Enti suuthi gussanaw ellesoosona.[e]
16 Enta ogiyan dhayoynne qohoy de7ees.
17 Enti sarotetha ogiya erokona.
18 Banta de7uwan Xoossaas yayyokonna”
geetetidi xaafetis.[f]

19 Ase ubbaa doona oythanawunne kumetha alamiya Xoossaa pirdaafe garsan shiishanaw, higgey imetiday higgefe garsan aqeysatas gideysa nu eroos. 20 Hessa gisho, oonika higges kiitetidi Xoossaa sinthan xillanaw danda7enna. Higgey asi ubbay nagarancho gideysa bessees.[g]

Xillotethi Ammanona
21 Shin ha77i Xoossay asi higgey baynashin xilliya oge qoncisis. He ogiya Muse higgeynne nabeti markatidosona. 22 Ha xillotethaa, Xoossay Yesuus Kiristoosa baggara asa ubbaas shaakoy bayna immees.

23 Asa ubbay nagara oothidosona; Xoossay entaw immida bonchuwafe haakidi attidosona. 24 Shin enti Xoossaa aadho keehatethan, woziya Kiristoos Yesuusa baggara coo xillidosona. 25 Xoossay Yesuus Kiristoosa yarsho oothidi immiday, iya ammaniya ubbay iya suuthan nagara atotethi demmana melasa. Xoossay hessa oothiday ba danda7an kase nagaraa taybonna aggidi, ba xillotethaa bessanaasa. 26 Ha77i wodiyan Yesuusa ammaniya ubbaa xillisidi, Xoossay ba huuphen xillo gideysa bessees.

27 Yaatin, nu ceeqetiyabay aybi de7ii? Aybika baawa. Nuuni ceeqetey higges kiitetiya gishoyee? Akay! Ammano gishosa. 28 Xoossay ase xillisey ammanonape attishin, higges kiitetethan gidonnaysa nu akeekos.

29 Woyko Xoossay Ayhudeta xalaala Xoosseyee? Ayhude gidonaysatas Xoosse gidenneyee? Tuma, Ayhude gidonaysataska I Xoosse. 30 Xoossay isso; Ayhudetanne Ayhude gidonnayisata ammanon xillisey iya.[h] 31 Yaatin, nuuni higgiya ammano gisho shaaros guusseyee? Gidenna! Higgiya minthosipe attishin.

<- Roome Kiita 2Roome Kiita 4 ->